"චරිත සහතිකය නීත්‍යානුකූලයි; සමාජ මාධ්‍ය හරහා ශිෂ්‍යයාගේ අයිතිවාසිකම් කැඩී ඇත" - ආදි ශිෂ්‍ය සංගමය කියයි
කොළඹ 08, සී.ඩබ්ලිව්.ඩබ්ලිව්. කන්නන්ගර විද්‍යාලයේ සිසුවෙකුට නිකුත් කරන ලද නිල පාසල් චරිත සහතිකයක් සමාජ මාධ්‍ය ඔස්සේ ප්‍රචාරය වීමේ සිදුවීම මුල් කරගනිමින් උද්ගතව ඇති මතභේදාත්මක තත්ත්වය හමුවේ, අදාළ සිසුවාට එරෙහිව එම විද්‍යාලයේ විදුහල්පතිනිය විසින් බොරැල්ල පොලිසිය වෙත පැමිණිල්ලක් ඉදිරිපත් කර තිබේ.
විදුහල්පති එන්. එච්. එස්. කේ. විජේතුංග විසින් ජූලි 20 වන දින සිදුකරන ලද මෙම පැමිණිල්ලට අදාළව, බොරැල්ල පොලිසියේ පරිගණක අපරාධ විමර්ශන අංශය මඟින් විශේෂ විමර්ශනයක් ආරම්භ කර ඇත. ඒ අනුව, අදාළ සිසුවා වෙත දුරකථනයෙන් ඇමතුමක් ලබා දෙමින් ජූලි 23 වන දින පෙරවරුවේ ප්‍රකාශයක් ලබා දීම සඳහා බොරැල්ල පොලිසිය හමුවේ පෙනී සිටින ලෙස දැනුම් දී ඇති බව පොලිස් මාධ්‍ය කොට්ඨාසය තහවුරු කරයි.
ලංකා ගුරු සංගමයේ විවේචනය
මෙම ක්‍රියාමාර්ගය පිළිබඳව අදහස් දක්වන ලංකා ගුරු සංගමයේ ලේකම් ජෝසප් ස්ටාලින් සඳහන් කරන්නේ, වැරදි තොරතුරු ඇතුළත් චරිත සහතිකයක් නිකුත් කිරීම සම්බන්ධයෙන් විමර්ශනයක් පැවැත්විය යුත්තේ විදුහල්පතිනියට එරෙහිව මිස ශිෂ්‍යයාට එරෙහිව නොවන බවයි.
අදාළ චරිත සහතිකයේ පැවති දෝෂ සම්බන්ධයෙන් අධ්‍යාපන අමාත්‍යාංශයට සහ කලාප අධ්‍යාපන කාර්යාලයට පැමිණිලි කිරීමෙන් අනතුරුව, විදුහල්පතිනිය විසින් එය නිවැරදි කර නව චරිත සහතිකයක් සිසුවා වෙත ලබා දී ඇති බව ද ස්ටාලින් පෙන්වා දෙයි. එලෙස නිවැරදි කළ සහතිකයක් ලබා දීමෙන් පසුව ද ශිෂ්‍යයාට එරෙහිව මෙලෙස පොලිස් පැමිණිල්ලක් ගොනු කිරීම අසාධාරණ බව හෙතෙම වැඩිදුරටත් කියා සිටියි.
ආදි ශිෂ්‍ය සංගමයේ නිල ස්ථාවරය
මේ අතර, සිද්ධිය සම්බන්ධයෙන් නිල නිවේදනයක් නිකුත් කරමින් කන්නන්ගර විද්‍යාලීය ආදි ශිෂ්‍ය සංගමය පෙන්වා දෙන්නේ සමාජ මාධ්‍ය ඔස්සේ සංසරණය වූ අදාළ චරිත සහතිකය, එම අවස්ථාවේ පැවති විනය වාර්තා සහ ශිෂ්‍යයාගේ හැසිරීම් රටාවන් සලකා බලා පාසල් පරිපාලනය විසින් නිකුත් කරන ලද නීත්‍යානුකූල නිල ලේඛනයක් බවයි.
ශිෂ්‍යයකුගේ විනය හා සදාචාරාත්මක ගුණාංග ඇගයීම පාසල් පරිපාලනය සතු පූර්ණ බලතලයක් වන අතර, මෙවැනි පෞද්ගලික නිල ලේඛනයක් සමාජ මාධ්‍ය ඔස්සේ ප්‍රචාරය කිරීම මඟින් අදාළ ශිෂ්‍යයාගේ මූලික අයිතිවාසිකම් කඩවීමක් සිදුව ඇති බව ද එම සංගමය නිරීක්ෂණය කරයි.
පාසලේ දශක ගණනාවක කීර්තිනාමයට හානි වන අයුරින් අසත්‍ය තොරතුරු ප්‍රචාරය කිරීමෙන් සහ සමාජ මාධ්‍ය තුළ අනවශ්‍ය මතභේද ඇති කිරීමෙන් වළකින ලෙසත්, යම් ගැටලුවක් පවතී නම් ඒවා නිසි නෛතික හා පරිපාලන ක්‍රමවේද ඔස්සේ යොමු කරන ලෙසත් ආදි ශිෂ්‍ය සංගමය සියලු සමාජ මාධ්‍ය පරිශීලකයන්ගෙන් ඉල්ලා සිටියි.
