* ජල වාෂ්පීභවනය වැළැක්වීම, වනඅලි ආරක්ෂාව සහ හරිත හයිඩ්‍රජන් නිෂ්පාදනයට නව මාවතක්
ශ්‍රී ලංකා බලශක්ති ක්ෂේත්‍රයේ නවමු සංධිස්ථානයක් සටහන් කරමින් මෙරට ප්‍රථම ඇළ මාර්ගයක් මත ඉදිකෙරෙන 'Canal-Top Solar' සූර්ය බලශක්ති ව්‍යාපෘතියේ මූලික ශක්‍යතා අධ්‍යයනය මහියංගනයේ වියානා ඇළ ආශ්‍රිතව සිදුකර තිබේ.
කිලෝමීටර් 20කට අධික දිගකින් යුත් වියානා ඇළ ප්‍රදේශයට වසරේ වැඩි කාලයක් ලැබෙන ප්‍රශස්ත සූර්යාලෝකය සලකා බලමින් මෙම නියමු ව්‍යාපෘතිය සඳහා අදාළ ස්ථානය තෝරාගෙන ඇත.
බලශක්ති උත්පාදනයට එහා ගිය පාරිසරික සහ බහුකාර්ය වාසි
ඇළ මාර්ගයට ඉහළින් සූර්ය පැනල සවිකිරීම හරහා විදුලිය උත්පාදනයට අමතරව පාරිසරික වාසි රැසක් හිමිවන බව පරීක්ෂණ කණ්ඩායම් පෙන්වා දෙයි. විශේෂයෙන් අධික රශ්මිය සහිත කාලගුණයේදී ජලය වාෂ්පීභවනය වීම පාලනය කිරීම සහ ජලයේ උෂ්ණත්වය සුදුසු මට්ටමක පවත්වා ගැනීමට මෙමඟින් හැකියාව ලැබේ.
එමෙන්ම, අනාගතයේදී හරිත හයිඩ්‍රජන් (Green Hydrogen) වැනි දියුණු බලශක්ති ප්‍රභවයන් නිෂ්පාදනය සඳහා පදනම සකස් කිරීම මෙන්ම, ව්‍යාපෘතියට අනුබද්ධව ඉදිකෙරෙන ආරක්ෂිත විදුලි අලි වැට නිසා වනඅලීන් ඇළට වැටීම වැළැක්වීමේ අමතර ආරක්ෂාවක් ද හිමිවේ.
විශේෂඥ සහ මැතිඇමැති නිරීක්ෂණය
පසුගිය 20 වනදා මහියංගනයේදී පැවැති විශේෂ ක්ෂේත්‍ර නිරීක්ෂණය සහ ප්‍රගති සමාලෝචන සාකච්ඡාව සඳහා පාර්ලිමේන්තු මන්ත්‍රීවරුන් වන රවීන්ද්‍ර බණ්ඩාර, සුදත් බලගල්ල ඇතුළු ප්‍රාදේශීය මහජන නියෝජිතයෝ සහභාගී වූහ.
මීට අමතරව ශ්‍රී ලංකා සුනිත්‍ය බලශක්ති අධිකාරියේ සභාපති මහාචාර්ය විජේන්ද්‍ර බණ්ඩාර, අධ්‍යක්ෂ ජනරාල් ඉංජිනේරු රෝහණ රම්බොඩගේ, ලංකා විදුලි බෙදාහැරීමේ සමාගමේ (LECO) සැලසුම් ඉංජිනේරු අසිත අත්තනායක ඇතුළු ශ්‍රී ලංකා මහවැලි අධිකාරියේ ජ්‍යෙෂ්ඨ ඉංජිනේරුවෝ පිරිසක් ද එක්ව සිටියහ.
ලෝකයේ ප්‍රමුඛ රටවල දැනටමත් සාර්ථකව භාවිත කෙරෙන මෙම තාක්ෂණය ශ්‍රී ලංකාවට හඳුන්වාදීම හරහා හරිත බලශක්ති ප්‍රතිපත්තිය නව මාවතකට යොමුකිරීමට අපේක්ෂිතයි.
