කන්නියා උණුපැන් ලිං භූමියේ විහාරයක් හැදීමේ සූදානමක්? උතුරෙන් ප්‍රබල විරෝධයක්

පුරාවිද්‍යාත්මක හා නීතිමය රාමුවට අනුව පමණක් කටයුතු කරන්නැයි උතුරේ නියෝජිතයන්ගෙන් ඉල්ලීමක්.

ත්‍රිකුණාමල දිස්ත්‍රික්කයේ පිහිටි ඓතිහාසික, ආගමික සහ සංස්කෘතිකමය වශයෙන් වැදගත් ස්ථානයක් වන කන්නියා උණුපැන් ලිං සංකීර්ණ භූමියේ බෞද්ධ විහාරස්ථානයක් ඉදිකිරීම සඳහා මුලපිරීමේ පුවතක් හේතුවෙන් ප්‍රදේශයේ ජනතාව අතර දැඩි නොසන්සුන්තාවයක් හටගෙන ඇති බව වාර්තා වේ.

ඉලංකෙයි තමිල් අරසු කච්චි (ITAK) පක්ෂයේ ත්‍රිකුණාමල දිස්ත්‍රික් සාමාජිකයකු මෙන්ම 'ජෙයකුමාර්ස් ග්ලෝබල්' සංවිධානයේ සභාපති සහ සමාජ සේවකයකු වන කුමාර් ජෙයකුමාර් මාධ්‍ය වෙත අදහස් දක්වමින් මේ බව පැවසීය.

කන්නියා භූමියේ ඓතිහාසික හා ආගමික පසුබිම

කුමාර් ජෙයකුමාර් පෙන්වා දෙන්නේ කන්නියා උණුපැන් ලිං සංකීර්ණය යනු දෙමළ ජනතාවට, විශේෂයෙන්ම හින්දු භක්තිකයන්ට දීර්ඝ කාලීන ඓතිහාසික සහ ආත්මීය බැඳීමක් සහිත පුණ්‍ය භූමියක් බවයි. අතීතයේ සිටම අදාළ භූමියේ සිව කෝවිලක් සහ පිල්ලෙයාර් කෝවිලක් පැවැති බවත්, මියගිය ඥාතීන් වෙනුවෙන් අවසන් ආගමික වතාවත් සිදුකරන පූජනීය ස්ථානයක් ලෙසත් මෙම ස්ථානය භාවිත වූ බව උතුරේ ජනතාව පවසති.

පැරණි පිල්ලෙයාර් කෝවිල පිහිටි ස්ථානය ලෙස සැලකෙන භූමියේ මෙලෙස බෞද්ධ විහාරස්ථානයක් සඳහා මුල්ගල තැබීමට කටයුතු යොදා ඇති බවට පැතිර යන තොරතුරු හේතුවෙන් ප්‍රදේශවාසීන් අතර නොසන්සුන්කමක් නිර්මාණය වී ඇති බව හෙතෙම සඳහන් කළේය.

නීතිමය සහ පුරාවිද්‍යාත්මක ප්‍රවේශයක අවශ්‍යතාවය

කන්නියා යනු හුදෙක් ආගමික ස්ථානයක් පමණක් නොව, ත්‍රිකුණාමලයේ ඉතිහාසය, පාරම්පරික උරුමය සහ දෙමළ ජනතාවගේ සංස්කෘතික අනන්‍යතාව හා බද්ධ වූ ස්ථානයක් බව මෙම මාධ්‍ය හමුවේදී අවධාරණය කෙරිණි. මෙවැනි සංවේදී ස්ථානයක් සම්බන්ධයෙන් යම් තීරණයක් ගන්නේ නම්, අදාළ සියලු පාර්ශ්ව සමඟ සාකච්ඡා කර, පවතින නීතිමය රාමුවට අනුකූලව මෙන්ම පුරාවිද්‍යාත්මක සහ ඓතිහාසික සාධක පදනම් කරගෙන පමණක් එය සිදුකළ යුතු බව ඔහු ප්‍රකාශ කළේය.

මෙම ගැටලුව සම්බන්ධයෙන් විවිධ සිවිල් සංවිධාන සහ ප්‍රදේශවාසීන් මතු කරන කනස්සල්ල කෙරෙහි රජයේ සහ අදාළ බලධාරීන්ගේ අවධානය යොමු විය යුතු අතර, සිංහල, දෙමළ සහ මුස්ලිම් ජනතාව සහජීවනයෙන් වෙසෙන ත්‍රිකුණාමල දිස්ත්‍රික්කය තුළ ජාතිවාදී හෝ ආගමික නොසන්සුන්තාවන් ඇති නොකිරීමට වගබලා ගැනීම සැමගේ වගකීමක් බව ද මෙහිදී අවධාරණය කෙරිණි.

අදාළ භූමියේ සංවර්ධන හෝ ඉදිකිරීම් කටයුත්තක් සිදු කරන්නේ නම්, එය අධිකරණ නියෝග, නීතිමය ක්‍රියාපටිපාටීන් සහ සියලු ආගමිකයන්ගේ සංස්කෘතික හැඟීම්වලට ගරු කරමින් සිදුකළ යුතු බවත්, කන්නියා භූමියේ සැබෑ පුරාවිද්‍යාත්මක තත්ත්වය පිළිබඳව බලධාරීන් ප්‍රසිද්ධ පැහැදිලි කිරීමක් කළ යුතු බවත් ජෙයකුමාර් වැඩිදුරටත් ඉල්ලා සිටියේය.

මෙහිදී දෙමළ ජනතාව නියෝජනය කරන මැතිඇමැතිවරුන් සහ මන්ත්‍රීවරුන් ද මෙම තත්ත්වය හමුවේ නිසි මැදිහත්වීමක් සිදුකළ යුතු බවට ද ප්‍රදේශයේ ජනතාවගෙන් ඉල්ලීම් ඉදිරිපත්ව ඇත.


(මුල් සටහන : M. Faizal Ismail )
faizalrj@gmail.com


මුලාශ්‍රය : puthiyakural.lk