පොලිස් බලය අත්තනෝමතික ලෙස යොදවමින් නීතිය ඉදිරියේ සමාන සැලකිලි ලැබීමේ අයිතිය උල්ලංඝනය කර ඇති බවට තීන්දු වෙයි
2022 වසරේ පැවැති මහජන අරගල සමයේදී සමාජ මාධ්‍ය ක්‍රියාකාරිකයෙකු වන අනුරුද්ධ බණ්ඩාර අත්අඩංගුවට ගෙන රඳවා තබාගැනීම මඟින්, එවකට බස්නාහිර පළාත් භාර ජ්‍යෙෂ්ඨ නියෝජ්‍ය පොලිස්පතිවරයාව සිටි දේශබන්දු තෙන්නකෝන් සහ කොළඹ උතුර විශේෂ විමර්ශන ඒකකයේ එවකට ස්ථානාධිපති නලින් ශ්‍රියන්ත යන නිලධාරීන් විසින් පෙත්සම්කරුගේ මූලික අයිතිවාසිකම් උල්ලංඝනය කර ඇති බව ශ්‍රේෂ්ඨාධිකරණය තීන්දු කර තිබේ.
සෝභිත රාජකරුණා, ජනක් ද සිල්වා සහ මේනකා විජේසුන්දර යන ත්‍රිපුද්ගල ශ්‍රේෂ්ඨාධිකරණ විනිසුරු මඬුල්ල විසින් අනුරුද්ධ බණ්ඩාර ඉදිරිපත් කළ මූලික අයිතිවාසිකම් පෙත්සම විභාග කිරීමෙන් අනතුරුව මෙම නියෝගය ප්‍රකාශයට පත්කරන ලදී.
සිද්ධියේ පසුබිම සහ පෙත්සම්කාර පාර්ශ්වයේ කරුණු දැක්වීම
2022 අප්‍රේල් මස 01 වනදා උතුරු කොළඹ විශේෂ විමර්ශන ඒකකයේ නිලධාරීන් පිරිසක් සිය නිවසට කඩා වැදී, පෞද්ගලික බඩු බාහිරාදිය පරික්ෂා කරමින් විදේශ ගමන් බලපත්‍රය, ජංගම දුරකථනය සහ ලැප්ටොප් පරිගණකය භාරයට ගත් බව පෙත්සම්කරු සඳහන් කර සිටියේය.
එමෙන්ම, සිය විද්‍යුත් තැපැල් සහ සමාජ මාධ්‍ය ගිණුම් පරීක්ෂා කරමින්, එකල ක්‍රියාත්මක වූ "GoHomeGota 2022" සමාජ මාධ්‍ය ව්‍යාපාරය සහ සංවිධානය වෙමින් පැවැති සාමකාමී විරෝධතා සම්බන්ධයෙන් ප්‍රශ්න කරමින්, කිසිදු සාධාරණ හේතුවක් නොමැතිව තමන්ව අත්අඩංගුවට ගත් බව පෙත්සම්කරු වැඩිදුරටත් අධිකරණය හමුවේ කරුණු දක්වා තිබිණි.
අධිකරණ තීන්දුව සහ නීතිමය පදනම
දීර්ඝ නඩු විභාගයකින් අනතුරුව තීන්දුව ප්‍රකාශයට පත් කරමින් ශ්‍රේෂ්ඨාධිකරණය පෙන්වා දුන්නේ, දණ්ඩ නීති සංග්‍රහයේ 120 වන වගන්තිය යටතේ පෙත්සම්කරු අත්අඩංගුවට ගැනීමට තරම් ප්‍රමාණවත් හෝ සාධාරණ කරුණු වගඋත්තරකාර නිලධාරීන් හමුවේ නොතිබූ බවයි. අදාළ අත්අඩංගුවට ගැනීම දේශපාලනික වශයෙන් රජය විවේචනය කිරීම හේතුවෙන් සිදුකර ඇති බව නිරීක්ෂණය වන බැවින්, එය නීතියට පටහැනි ක්‍රියාවක් බව අධිකරණය අවධාරණය කළේය.
පොලිස් බලය අත්තනෝමතික ලෙස යොදවමින්, ආණ්ඩුක්‍රම ව්‍යවස්ථාවේ 13(1) වගන්තියෙන් සහතික කර ඇති අත්තනෝමතික ලෙස අත්අඩංගුවට නොගැනීමේ අයිතිය මෙන්ම, 12(1) වගන්තිය යටතේ නීතිය ඉදිරියේ සමාන සැලකිලි ලැබීමට ඇති මූලික මිනිස් අයිතිවාසිකම ද අදාළ නිලධාරීන් විසින් උල්ලංඝනය කර ඇති බව තීන්දුවේ සඳහන් වේ.
නියෝජනය සහ අවසන් නියෝගය:
මෙම නඩු තීන්දුව මඟින් වගඋත්තරකරුවන්ගේ ක්‍රියාකලාපය නීතිවිරෝධී බවට තීන්දු කළද, පෙත්සම්කරු වෙනුවෙන් වන්දි හෝ නඩු ගාස්තු ප්‍රදානය කිරීමක් සිදුකර නොමැත.
පෙත්සම්කාර අනුරුද්ධ බණ්ඩාර වෙනුවෙන් තනුක නන්දසිරි සහ මනුජය ද සිල්වා යන නීතිඥවරුන් සමඟ ජනාධිපති නීතිඥ සාලිය පීරිස් පෙනී සිටි අතර, වගඋත්තරකරුවන් වෙනුවෙන් රජයේ නීතිඥ සජිත් බණ්ඩාර පෙනී සිටියේය.
