*"සිදුවූයේ සමාජ සත්කාරක ව්‍යාපෘති ක්‍රියාත්මක කිරීමක්": මන්ත්‍රී පාර්ශ්වයෙන් කරුණු දැක්වීමක්
හිටපු අමාත්‍යවරයෙකු මෙන්ම පාර්ලිමේන්තු මන්ත්‍රීවරයෙකු ද වන රවී කරුණානායක අද (31) පෙරවරුවේ අල්ලස් හෝ දූෂණ චෝදනා විමර්ශන කොමිෂන් සභාව හමුවේ පෙනී සිටියේය. ඒ, ජාතික ලොතරැයි මණ්ඩලයේ විශේෂ ව්‍යාපෘතියක් සඳහා බඳවාගත් සේවකයන් තිදෙනෙකු බාහිර රාජකාරි සඳහා යොදවා රජයට මූල්‍යමය පාඩුවක් සිදුකළ බව කියන සිදුවීමකට අදාළව සිදුකෙරෙන විමර්ශනයක් සම්බන්ධයෙන් ප්‍රකාශයක් ලබාදීම සඳහා ය.
විමර්ශනයේ පසුබිම සහ පෙනී සිටීම
මෙම විමර්ශනයට අදාළව ප්‍රකාශයක් සටහන් කරගැනීම සඳහා මීට පෙර අවස්ථාවක අල්ලස් කොමිසම හමුවේ පෙනී සිටින ලෙස මන්ත්‍රීවරයා වෙත දැනුම් දී තිබුණි. එහෙත් එම අවස්ථාවේදී ඔහු පෙනී නොසිටි පසුබිමක, පසුගියදා කොමිසමේ නිලධාරීන් පිරිසක් මන්ත්‍රීවරයාගේ කොළඹ පිහිටි නිවස වෙතද ගොස් තිබූ බව වාර්තා විය.
කෙසේවෙතත්, එම අවස්ථාවේදී ඔහු නිවසේ රැඳී නොසිටි අතර, සිය දියණියගේ විවාහ මංගල්‍ය කටයුතු හේතුවෙන් ප්‍රකාශය ලබාදීම සඳහා වෙනත් දිනයක් ලබාදෙන ලෙස ඔහුගේ නීතිඥවරුන් මාර්ගයෙන් කොමිසමෙන් ලිඛිත ඉල්ලීමක් සිදුකර තිබිණි. ඒ අනුව ලබාදුන් පෙර දැනුම්දීමට එකඟව මන්ත්‍රීවරයා අද දින පෙරවරුවේ අල්ලස් කොමිසම හමුවේ පෙනී සිටිමින් අදාළ ප්‍රකාශය ලබාදී ඇත.
සේවක අනියුක්තිය සහ මන්ත්‍රී පාර්ශ්වයේ ස්ථාවරය
අදාළ චෝදනාව සම්බන්ධයෙන් කරුණු පැහැදිලි කරන මන්ත්‍රීවරයාගේ පාර්ශ්වය පෙන්වා දෙන්නේ, ජාතික ලොතරැයි මණ්ඩලය හරහා බඳවාගෙන තිබූ අදාළ නිලධාරීන් තිදෙනා විශේෂ ව්‍යාපෘති සම්බන්ධීකාරකවරුන් ලෙස අමාත්‍යාංශය වෙත මුදාහැර තිබුණේ ආයතනික සමාජ වගකීම් (CSR) ව්‍යාපෘති රැසක් කළමනාකරණය කිරීම සඳහා බවයි.
විශේෂයෙන්ම, ජනාධිපති ලේකම් කාර්යාලය යටතේ ක්‍රියාත්මක වූ නිදන්ගත වකුගඩු රෝග (CKD) අරමුදල ශක්තිමත් කිරීම අරමුණු කරගනිමින් ජාතික ලොතරැයි මණ්ඩලය විසින් හඳුන්වා දුන් 'නීරෝගා' ලොතරැයි වැඩසටහනේ සම්බන්ධීකරණ කටයුතු මෙම නිලධාරීන් වෙත පැවරී තිබූ බව සඳහන් වේ.
'ගම්මැද්ද' ප්‍රජා සත්කාරක ව්‍යාපෘති සහ පරිපාලන ක්‍රියාවලිය
ඊට අමතරව, 'සිරස ' මාධ්‍ය ජාලයේ 'ගම්මැද්ද' වැඩසටහන මඟින් ඉදිරිපත් කළ යෝජනාවකට අනුව ජනාධිපති කාර්යාලය සහ මුදල් අමාත්‍යාංශය ඒකාබද්ධව උතුරු මැද සහ නැගෙනහිර පළාත්වල ජනතාවට පිරිසිදු පානීය ජලය ලබාදීමේ සමාජ සත්කාරක ව්‍යාපෘතියේ මෙහෙයුම් කටයුතු ද ජාතික ලොතරැයි මණ්ඩලය වෙත පවරා තිබූ බවත්, අදාළ නිලධාරීන් එම ප්‍රජා සත්කාරක වැඩසටහන්වල ක්ෂේත්‍ර කටයුතු සඳහා සක්‍රීයව දායක වූ බවත් එම පාර්ශ්වය අවධාරණය කරයි.
එමෙන්ම, අදාළ නිලධාරීන්ගේ සේවා පැමිණීමේ වාර්තා නිසි පරිදි සම්පූර්ණ කර ජාතික ලොතරැයි මණ්ඩලය වෙත නිරන්තරයෙන් යොමුකර තිබූ බව පෙන්වා දෙන මන්ත්‍රීවරයාගේ පාර්ශ්වය, නිසි පරිපාලන ක්‍රමවේදයකට යටත්ව ජනතා සුබසාධනය වෙනුවෙන් සිදුකළ මෙවැනි ප්‍රජා සත්කාරක ව්‍යාපෘති සම්බන්ධීකරණය දේශපාලන අරමුණු මුල්කරගනිමින් විකෘති සහගත ලෙස අර්ථකථනය කිරීම අසාධාරණ බව වැඩිදුරටත් සඳහන් කරයි.
