*අභියාචනාධිකරණයේ ජ්‍යෙෂ්ඨතම විනිසුරු ආර්. ගුරුසිංහගේ විශ්‍රාමයට පෙර කඩිනම් පියවරක් ඉල්ලයි
ශ්‍රේෂ්ඨාධිකරණයේ පවතින පුරප්පාඩු කඩිනමින් සම්පූර්ණ නොකිරීම හේතුවෙන් අභියාචනාධිකරණයේ ජ්‍යෙෂ්ඨ විනිසුරුවරුන්ගේ උසස්වීම් ප්‍රමාද වීම සහ අධිකරණ පද්ධතියේ පරිපාලන ස්වාධීනත්වයට එල්ල විය හැකි බලපෑම් පිළිබඳව ශ්‍රී ලංකා නීතිඥ සංගමය (BASL) ජනාධිපති අනුර කුමාර දිසානායක වෙත දැඩි අවධානය යොමු කර තිබේ.
නීතිඥ සංගමයේ සභාපති රජීව් අමරසූරිය සහ ලේකම් නලින් ද සිල්වාගේ අත්සනින් යුතුව 2026 අගෝස්තු 17 දිනැතිව ජනාධිපතිවරයා වෙත යොමු කර තිබූ මෙම රහසිගත ලිපිය, පසුගිය සති අන්තයේදී මාධ්‍ය වෙත ප්‍රසිද්ධ කිරීමට නීතිඥ සංගමයේ කවුන්සිලය තීරණය කර ඇත.
පුරප්පාඩු 4ක් තිබියදී සිදු වූ විශ්‍රාම ගැන්වීමක්
නීතිඥ සංගමය පෙන්වා දෙන්නේ, ශ්‍රේෂ්ඨාධිකරණයේ පුරප්පාඩු 4ක් පැවති පසුබිමක අභියාචනාධිකරණයේ ජ්‍යෙෂ්ඨ විනිසුරුවරයෙකු වූ ධම්මික ගණේපොල ට හිමිවිය යුතුව තිබූ උසස්වීම නොලබාම වයස අවුරුදු 63 සම්පූර්ණ වීමෙන් පසු පසුගිය මැයි 8 වනදා විශ්‍රාම යෑමට සිදුවූ බවයි. දීර්ඝ කාලීන සේවයක් සහිත ජ්‍යෙෂ්ඨ විනිසුරුවරයෙකුගේ සේවය මෙලෙස අහිමි වීම සමස්ත අධිකරණ පද්ධතියටම සිදු වූ පාඩුවක් බව නීතිඥ සංගමය අවධාරණය කරයි.
මීට අමතරව, 1996 වසරේදී අධිකරණ සේවයට එක්වූ අභියාචනාධිකරණයේ වැඩබලන සභාපති ධුරය ද හෙබවූ ජ්‍යෙෂ්ඨතම විනිසුරු ආර්. ගුරුසිංහ ද මෙම මස අවසානයේදී විශ්‍රාම යෑමට නියමිතව සිටින බව එම ලිපියේ සඳහන් වේ. හිටපු අගවිනිසුරු මුර්දු ප්‍රනාන්දු විසින් 2025 ජූලි මාසයේදීම ගුරුසිංහ ගේ නම ශ්‍රේෂ්ඨාධිකරණ විනිසුරු ධුරයක් සඳහා නිර්දේශ කර තිබුණ ද, එම පත්වීම මෙතෙක් සිදුව නොමැති බැවින් ඔහුගේ විශ්‍රාමයට පෙර ඒ පිළිබඳ කඩිනම් පියවර ගන්නා ලෙස නීතිඥ සංගමය ජනාධිපතිවරයාගෙන් ඉල්ලා සිටී.
ජ්‍යෙෂ්ඨත්වයට මුල්තැන දීමේ වැදගත්කම
අධිකරණ පත්වීම් සහ උසස්වීම් සිදුකිරීමේදී මෙතෙක් පැවති සම්ප්‍රදායට අනුව ‘ජ්‍යෙෂ්ඨත්වය’ පදනම් කරගැනීමේ වැදගත්කම නීතිඥ සංගමය සිය ලිපියෙන් අවධාරණය කර ඇත. යම් විනිසුරුවරයෙකුට එරෙහිව පැහැදිලි හා ඔප්පු කළ හැකි අඩුපාඩුවක් හෝ අතපසුවීමක් නොමැති තාක් කල්, ස්ථාපිත සම්ප්‍රදායන්ගෙන් බැහැරවීම අධිකරණයේ ස්වාධීනත්වය සහ මහජන විශ්වාසය පළුදු කිරීමට හේතු විය හැකි බව එම ලිපියේ දැක්වේ.
උසස්වීම් දීර්ඝ කාලයක් ප්‍රමාද කිරීම හරහා අධිකරණ නිලධාරීන් මත අනවශ්‍ය මානසික හා වෘත්තීය පීඩනයක් එල්ල වන අතර, එය යුක්තිය පසිඳලීමේ ක්‍රියාවලියේ කාර්යක්ෂමතාවට ද සෘජු බලපෑමක් එල්ල කරන බව නීතිඥ සංගමය පෙන්වා දෙයි.
ව්‍යවස්ථාදායක සභාවටත් පිටපත්
ඉකුත් අගෝස්තු 12 වැනිදා ජනාධිපතිවරයා හමුවූ අවස්ථාවේදී, මාසයක් ඇතුළත ශ්‍රේෂ්ඨාධිකරණයේ සහ අභියාචනාධිකරණයේ පවතින පුරප්පාඩු පිරවීමට පියවර ගන්නා බවට ලබාදුන් සහතිකය නීතිඥ සංගමය යළි සිහිපත් කර තිබේ.
මෙම ලිපියේ පිටපත් අග්‍රාමාත්‍ය ආචාර්ය හරිනි අමරසූරිය, කථානායක ආචාර්ය ජගත් වික්‍රමරත්න, විපක්ෂ නායක සජිත් ප්‍රේමදාස සහ ආණ්ඩුක්‍රම ව්‍යවස්ථා සභාවේ සියලුම සාමාජිකයින් වෙත ද යොමු කර ඇත.
මුලාශ්‍රය :
The Island පුවත් වාර්තාව: BASL takes exception to Justice Ganepola being denied a place in SC
