අධිකරණයේ ස්වාධීනත්වය රැකගැනීමට සත්‍යය හෙළිදරව් කිරීමේ අවශ්‍යතාව අවධාරණය කෙරේ
පාර්ලිමේන්තු සභා ගර්භය තුළ මන්ත්‍රීවරුන් කිහිපදෙනෙකු විසින් වත්මන් අගවිනිසුරු ප්‍රීති පද්මන් සූරසේන ඉලක්ක කරගනිමින් ඉදිරිපත් කර ඇති බරපතළ චෝදනා සම්බන්ධයෙන් පාර්ලිමේන්තු මට්ටමින් ගෙන ඇති හෝ ගැනීමට නියමිත පියවර කවරේදැයි විමසමින් විපක්ෂ පාර්ලිමේන්තු මන්ත්‍රී දයාසිරි ජයසේකර, කථානායක වෛද්‍ය ජගත් වික්‍රමරත්න වෙත අද (31) ලිඛිත ඉල්ලීමක් යොමු කර තිබේ.
ආණ්ඩුක්‍රම ව්‍යවස්ථාවේ 4(ඇ) ව්‍යවස්ථාව ප්‍රකාරව ජනතාවගේ අධිකරණ බලය ක්‍රියාත්මක වන අධිකරණ පද්ධතියේ ස්වාධීනත්වය, ගෞරවය සහ මහජන විශ්වාසය ආරක්ෂා කිරීමේ වගකීම පාර්ලිමේන්තුව සතුව පවතින බව පෙන්වාදෙන මන්ත්‍රීවරයා, මෙම ගැටලුව සම්බන්ධයෙන් කරුණු 07ක් ඔස්සේ කථානායකවරයාගෙන් නිල පැහැදිලි කිරීමක් ඉල්ලා ඇත.
සභා ගර්භයේදී මතු වූ ප්‍රධාන චෝදනා පහ
මන්ත්‍රීවරයා සිය ලිපිය මඟින් පෙන්වා දෙන්නේ මෑත දිනවලදී පාර්ලිමේන්තුව තුළ අගවිනිසුරුවරයා සම්බන්ධයෙන් මූලික වශයෙන් කරුණු පහක් ප්‍රසිද්ධියේ සංවාදයට ලක්ව ඇති බවයි.
* අගවිනිසුරුවරයාගේ පුත්‍රයා වන දිමුතු සූරසේන නමින් කොළඹ ප්‍රදේශයේ රුපියල් මිලියන 185ක් පමණ වටිනා සුඛෝපභෝගී මහල් නිවාසයක් මිලදී ගැනීම හෝ හිමිකර ගැනීම.
* අදාළ දේපළ අත්පත් කරගැනීමේ මූලාශ්‍රය සහ වත්කම් බැරකම් ප්‍රකාශන සමඟ එහි ඇති සබඳතාව.
* අගවිනිසුරුවරයාගේ උපන් සහතිකය, විවාහ සහතිකය සහ දරුවන්ගේ උප්පැන්න සහතික සම්බන්ධයෙන් මන්ත්‍රීවරයෙකු විසින් මතු කරන ලද සැකසහිත තොරතුරු.
* ආන්දෝලනාත්මක 'එක්ස්ප්‍රස් පර්ල්' (X-Press Pearl) නෞකා ව්‍යසනයට අදාළව ශ්‍රී ලංකා රජයට හිමිවිය යුතු වන්දි ලබාගැනීමේ නඩු කටයුතුවල ප්‍රගතිය හා ඊට අදාළ ක්‍රියාමාර්ග.
* ඉහත සඳහන් පවුලේ දේපළ වත්කම් සහ එක්ස්ප්‍රස් පර්ල් වන්දි ක්‍රියාවලිය අතර යම් අනීතික සබඳතාවක් හෝ අයුතු බලපෑමක් සිදුවී ඇත්දැයි එල්ල වී ඇති සැකය.
චෝදනාවල සත්‍ය අසත්‍යතාව විමර්ශනය කිරීමේ වැදගත්කම
අදාළ චෝදනා කිසිවක් තමන් විසින් සත්‍ය යැයි පූර්ව නිගමනයකට නොඑළඹෙන බව සඳහන් කරන දයාසිරි ජයසේකර, එහෙත් රටේ ඉහළම අධිකරණයේ ප්‍රධානියා සම්බන්ධයෙන් මහජන නියෝජිතයින් විසින් වරප්‍රසාද යටතේ මෙවැනි ප්‍රකාශ සිදුකිරීම නොසලකා හැරීම සමස්ත අධිකරණ ක්ෂේත්‍රයේම පැවැත්මට හානිකර බව පෙන්වා දෙයි.
"මෙම චෝදනා සත්‍ය නම්, ඒවා නීතියේ ආධිපත්‍යයට සහ විනිසුරුවරුන්ගේ ආචාරධර්මවලට අදාළව බරපතළ කාරණයක් බැවින් ස්වාධීන ආයතන මගින් පරීක්ෂණ පැවැත්විය යුතුයි. අනෙක් අතට මේවා අසත්‍ය හෝ පදනම් විරහිත ප්‍රකාශ නම්, එයින් අගවිනිසුරුවරයාගේ කීර්තිනාමයට සහ අධිකරණයේ ගෞරවයට සිදුවන හානිය වැළැක්වීමට සත්‍ය තත්ත්වය රටට හෙළිදරව් කළ යුතුයි," යනුවෙන් එම ලිපියේ සඳහන් වේ.
කථානායකවරයාගෙන් ඉල්ලා ඇති කරුණු හත
මෙම තත්ත්වය හමුවේ පාර්ලිමේන්තුවේ වගකීම පෙරදැරි කරගනිමින් මන්ත්‍රීවරයා කථානායකවරයාගෙන් පහත සඳහන් කරුණු සම්බන්ධයෙන් ලිඛිත පිළිතුරක් අපේක්ෂා කරයි.
1- අදාළ චෝදනා සම්බන්ධයෙන් කිසියම් මන්ත්‍රීවරයෙකු විසින් නිල වශයෙන් ලේඛන හෝ සාක්ෂි සභාගත කර තිබේද?
2- ඒ සම්බන්ධයෙන් කථානායක ධුරය මට්ටමින් කිසියම් මූලික සොයාබැලීමක් හෝ පියවරක් ගෙන තිබේද?
3- මෙම කරුණු විමර්ශනය සඳහා බලයලත් ස්වාධීන ආයතන වෙත යොමු කර තිබේද?
4- වත්කම් සහ දේපළ පිළිබඳ කාරණා නීත්‍යානුකූලව විමර්ශනය කිරීමට අදාළ ආයතන වෙත යොමු කර ඇත්ද?
5- එක්ස්ප්‍රස් පර්ල් වන්දි නඩුව සම්බන්ධයෙන් නීතිපති දෙපාර්තමේන්තුවෙන් හෝ අදාළ ආයතනවලින් නිල පැහැදිලි කිරීමක් ලබාගෙන තිබේද?
6- මෙම චෝදනා අසත්‍ය බව තහවුරු වුවහොත්, අධිකරණ පද්ධතියේ සහ අගවිනිසුරුවරයාගේ ගෞරවය රැකගැනීමට පාර්ලිමේන්තු මට්ටමින් ගන්නා පියවර කවරේද?
7- චෝදනා සනාථ කිරීමට ප්‍රමාණවත් කරුණු ඇත්නම්, නීතිය ක්‍රියාත්මක කිරීම සඳහා බලධාරීන්ට යොමු කරන්නේද?
අධිකරණයේ ස්වාධීනත්වය ආරක්ෂා විය යුත්තේ විනිසුරුවරුන්ට එල්ල වන අනවශ්‍ය බලපෑම්වලින් පමණක් නොව, විනිසුරුවරුන් සම්බන්ධයෙන් ඉදිරිපත් වන සාක්ෂි සහිත බරපතළ කරුණු පිළිබඳ විනිවිදභාවය තහවුරු කිරීමෙන් බව පෙන්වාදෙන මන්ත්‍රීවරයා, කථානායකවරයාගේ කඩිනම් අවධානය මේ සඳහා යොමුවනු ඇතැයි අපේක්ෂා කරයි.
