ජාතික ලොතරැයි මණ්ඩලයේ විශේෂ ව්‍යාපෘතියක් සඳහා බඳවා ගත් සේවකයන් තිදෙනෙකු දේශපාලන කටයුතු සඳහා යොදවා රජයට පාඩුවක් සිදු කළ බව කියන සිද්ධිය සම්බන්ධයෙන් අත්අඩංගුවට ගත් හිටපු මුදල් අමාත්‍ය රවී කරුණානායක ඇප මත මුදා හැරීමට කොළඹ අතිරේක මහේස්ත්‍රාත් ලියාන් වරුෂ විතාන අද (31) නියෝග කළේය.
ලක්ෂ 10 බැගින් ශරීර ඇප දෙකක් විදෙස් ගමන් තහනමක්
සැකකරුට රුපියල් ලක්ෂ 10 බැගින් වූ ශරීර ඇප දෙකක් නියම කළ මහේස්ත්‍රාත්වරයා, ඔහුගේ විදෙස් ගමන් තහනම් කිරීමට ද නියෝග කළේය. අදාළ නඩුව කැඳවූ අවස්ථාවේදී අල්ලස් හෝ දූෂණ චෝදනා විමර්ශන කොමිෂන් සභාව විසින් ඉදිරිපත් කළ කරුණු සලකා බැලීමෙන් අනතුරුව මෙම නියෝගය ලබාදී තිබේ.
ප්‍රකාශයක් ලබාදීමට පැමිණි අවස්ථාවේ අත්අඩංගුවට
රවී කරුණානායක අද අල්ලස් කොමිසම හමුවට පැමිණ තිබුණේ විමර්ශනයට අදාළව ප්‍රකාශයක් ලබාදීම සඳහාය. එහිදී ඔහු අත්අඩංගුවට ගෙන තිබිණි. විමර්ශනයට අදාළව කොමිසම හමුවේ පෙනී සිටින ලෙස අවස්ථා හතරකදී දැනුම් දී තිබුණ ද ඔහු එහි පෙනී නොසිටි බව අල්ලස් කොමිසම අධිකරණයට දන්වා සිටියේය.
රවී කරුණානායක කොමිසම හමුවේ පෙනී නොසිටීම හේතුවෙන් අල්ලස් කොමිසමේ නිලධාරීන් පිරිසක් පසුගිය 29 වැනිදා ඔහුගේ නිවසට ගොස් ඇති බව අධිකරණයට දැනුම් දී තිබේ.එහිදී ඔහු නුවරඑළිය ප්‍රදේශයට ගොස් ඇති බව දැනුම් දී තිබුණ ද, සිදුකළ විමර්ශනවලදී ඔහු හම්බන්තොට ප්‍රදේශයේ සිටින බවට තොරතුරු ලැබුණු බව අල්ලස් කොමිසම සඳහන් කළේය.
ලොතරැයි මණ්ඩලයේ අරමුදලින් සේවකයින් තිදෙනෙකුට වැටුප්
2015 ජනවාරි 12 වැනිදා සිට 2017 මැයි 22 වැනිදා දක්වා මුදල් අමාත්‍යවරයා ලෙස කටයුතු කළ කාලය තුළ, මුදල් අමාත්‍යාංශයේ විශේෂ ව්‍යාපෘතියක් බව සඳහන් කරමින් පුද්ගලයින් තිදෙනෙකු ජාතික ලොතරැයි මණ්ඩලයේ අරමුදල්වලින් වැටුප් ගෙවීමේ පදනම මත කොන්ත්‍රාත් පදනමින් බඳවා ගෙන ඇති බව විමර්ශන නිලධාරීන් අධිකරණයට දන්වා සිටියහ.
එම පුද්ගලයන් දෙදෙනෙකු සම්බන්ධීකරණ නිලධාරීන් ලෙසත්, අනෙක් පුද්ගලයා කළමනාකරණ සහකාරවරයෙකු ලෙසත් බඳවාගෙන තිබූ බව සඳහන් විය. ඔවුන් ජාතික ලොතරැයි මණ්ඩලයට කිසිදු සේවයක් ලබා නොදී එම මණ්ඩලයෙන් වැටුප් හා දීමනා ලබාගෙන ඇති බවට අල්ලස් කොමිසම චෝදනා කරයි.
රවී කරුණානායක පළමු සැකකාරිය සමඟ එක්ව සාක්ෂිවලට බලපෑම් කිරීමට කටයුතු කරන බැවින් ඔහු රක්ෂිත බන්ධනාගාරගත කරන ලෙස අල්ලස් කොමිසම අධිකරණයෙන් ඉල්ලා සිටියේය.
මෙම සිද්ධිය සම්බන්ධයෙන් 1994 අංක 20 දරන පනතින් සංශෝධිත අල්ලස් පනතේ 70 වැනි වගන්තිය යටතේ දූෂණය නමැති වරද සම්බන්ධයෙන් චෝදනා ගොනු කර තිබේ.
ඇප ඉල්ලා නීතිඥවරයා කරුණු දක්වයි
සැකකරු වෙනුවෙන් පෙනී සිටි ජනාධිපති නීතිඥ අශෝක වීරසූරිය අධිකරණයට කරුණු දක්වමින් තම සේවාදායකයා අධිකරණය මඟහැරීමට හේතුවක් නොමැති බව සඳහන් කළේය.
පළමු සැකකාරියට ඇප ලබාදී ඇති බැවින් රවී කරුණානායකට ද ඇප ලබාදෙන ලෙස ඔහු අධිකරණයෙන් ඉල්ලා සිටියේය. දෙපාර්ශ්වය ඉදිරිපත් කළ කරුණු සලකා බැලූ කොළඹ අතිරේක මහේස්ත්‍රාත්වරයා රවී කරුණානායක ඇප මත මුදා හැරීමට නියෝග කළේය.
