ප්‍රවීණ ගායන හා රංගන ශිල්පී ප්‍රියංකර පෙරේරා සමුගනී

*මිල්ටන් පිය උරුමයෙන් ගී ලොව ජයගත් ප්‍රියංකර පෙරේරා 64 වියේදී දිවි සැරිය නිම කරයි

ශ්‍රී ලාංකේය සංගීත සහ සිනමා ක්ෂේත්‍රයේ දශක හතරකට අධික කාලයක් සක්‍රියව රැඳී සිටි ප්‍රවීණ ගායන හා රංගන ශිල්පී ප්‍රියංකර පෙරේරා මහතා අභාවප්‍රාප්ත විය. කොළඹ ජාතික රෝහලේ ප්‍රතිකාර ලබමින් සිටියදී ඊයේ (01) රාත්‍රියේ ඒ මහතා මෙලොවින් සමුගන්නා විට 64 වන වියේ පසුවිය.

කලක් රෝගාතුරව පසුවූ ඒ මහතාගේ අභාවය පවුලේ ඥාතීන් විසින් තහවුරු කර තිබේ. දේහය අද (02) කොළඹ පෞද්ගලික මල් ශාලාවක තැන්පත් කෙරෙන අතර, අවසන් කටයුතු පිළිබඳ විස්තර ඉදිරියේදී දැනුම් දෙන බව ඔහුගේ බිරිඳ වන ප්‍රවීණ රංගන ශිල්පිනී දිල්හානි ඒකනායක මහත්මිය සඳහන් කළාය.

පිය උරුමයෙන් ආ ගීතවත් ගමන

ප්‍රවීණ ගායක මිල්ටන් පෙරේරා මහතාගේ වැඩිමහල් පුත්‍රයා වන ප්‍රියංකර පෙරේරා, සිය පියාගේ අනන්‍ය ගායන විලාසය හා සුමධුර ස්වරය උරුම කරගනිමින් මෙරට සංගීත ක්ෂේත්‍රයට පිවිසියේය. ඔහු ගායන ශිල්පී චලක චමුපතිගේ වැඩිමහල් සහෝදරයාද වෙයි. තරුණ ගායකයෙකු වන්න දිල්මින් පෙරේරා. ප්‍රියංකරගේ පුත්‍රයා ය.

විශේෂයෙන් 80 සහ 90 දශකවල කැසට් සංස්කෘතිය තුළ අතිශය ජනප්‍රියත්වයට පත් ඒ මහතා, පිය උරුමයෙන් ලද ගීත මෙන්ම තමන්ටම අනන්‍ය වූ ගීත රැසක්ද ශ්‍රාවක හදවත් තුළ තැන්පත් කළේය. “රන් පොකුණෙන්”, “සුපුන් සඳක්”, “සඳුන් ගසේ සමන් වැලක්”, “සිකුරුලියා”, “අගාධ සාගරයේ”, “සිහින දෙව්දුවේ”, “පිස්සු විකාරේ” සහ “පෙර ආත්මයක එක රාත්‍රියක” වැනි ගීත ඒ අතරින් කැපී පෙනෙයි.

රිදී තිරය සහ පුංචි තිරය හැඩකළ රංගනය

ගායන වෘත්තියට පමණක් සීමා නොවූ ප්‍රියංකර පෙරේරා මහතා, චිත්‍රපට හා ටෙලිනාට්‍ය නළුවෙකු ලෙසද ප්‍රේක්ෂක ආදරය නොමඳව දිනාගත්තේය. ‘සුරඟන’, ‘සීතල ගිනි කඳු’, ‘මධුරි’ සහ ‘නින්ජා ශ්‍රී ලංකා’ ඇතුළු සිනමාපට කිහිපයකට ඔහු සිය රංගන දායකත්වය එක් කළේය.

ඊට අමතරව ‘ගමන’, ‘අරවින්ද හා ඉන්දු’ වැනි සම්භාව්‍ය ගණයේ ටෙලිනාට්‍යවල ඔහු නිරූපණය කළ චරිත පුංචි තිරයේ ප්‍රේක්ෂකයින් අතර දැඩි කතාබහට ලක්විය. ගායනය සහ රංගනය යන ද්විත්ව ක්ෂේත්‍රයන්හිම ස්වකීය ප්‍රතිභාව සටහන් කළ ප්‍රියංකර පෙරේරාගේ සමුගැනීම, මෙරට ප්‍රාසාංගික කලා ක්ෂේත්‍රයට සිදුවූ බලවත් පාඩුවකි.