සාරා ජැස්මින්ගේ ඉන්දීය පලායාම සහ කරුණාගේ පාස්පෝට් ගැටලුව අධිකරණය හමුවට
පාස්කු නඩුවේ විමර්ශන ප්‍රගතිය සහ අධිකරණ තීන්දුව
පාස්කු ඉරිදා ත්‍රස්ත ප්‍රහාරය පිළිබඳ විමර්ශනවලට අදාළව ත්‍රස්තවාදය වැළැක්වීමේ පනත යටතේ රැඳවුම් නියෝග මත පසුවන රාජ්‍ය බුද්ධි සේවයේ (SIS) හිටපු ප්‍රධානී සුරේෂ් සලේ ගේ සෞඛ්‍ය තත්ත්වය සම්බන්ධයෙන් පුළුල් වෛද්‍ය වාර්තාවක් ඉදිරිපත් කරන ලෙස කොටුව මහේස්ත්‍රාත් පසන් අමරසේන කොළඹ ජාතික රෝහලේ අධ්‍යක්ෂවරයාට ඊයේ (02) නියෝග කළේය.
මෙම නඩුව කැඳවූ අවස්ථාවේදී නීතිපති දෙපාර්තමේන්තුව නියෝජනය කරමින් අපරාධ පරීක්ෂණ දෙපාර්තමේන්තුව වෙනුවෙන් රජයේ නීතිඥ ඔස්වල්ඩ් පෙරේරා පෙනී සිටි අතර, සෙසු සැකකරුවන් දෙදෙනා සූම් (Zoom) තාක්ෂණය ඔස්සේ අධිකරණයට ඉදිරිපත් කෙරිණි. එහිදී ඉදිරිපත් වූ කරුණු සලකා බැලූ මහේස්ත්‍රාත්වරයා සෙසු සැකකරුවන් දෙදෙනා සැප්තැම්බර් 15 දක්වා තවදුරටත් රක්ෂිත බන්ධනාගාරගත කිරීමට නියෝග කළේය. එසේම අගතියට පත් පාර්ශ්වයක් ලෙස පුද්ගලයෙකු ඉදිරිපත් කළ ඉල්ලීමක් ද අපරාධමය කරුණක් අනාවරණය නොවීම හේතුවෙන් ප්‍රතික්ෂේප විය.
පාස්කු ඉරිදා ත්‍රස්ත ප්‍රහාරය සම්බන්ධයෙන් වන ඊයේ (02) පැවති නඩු විභාගයට අතිරේක සොලිසිටර් ජනරාල් දිලීප පීරිස් සහභාගී නොවූ අතර ඔහු වෙනුවට රජයේ නීතිඥ ඔස්වල්ඩ් පෙරේරා කැඳවා තිබීම විශේෂ කාරණයකි.
රෝහල්ගතවීම සහ ප්‍රකාශ සටහන් කරගැනීමේ ගැටලුව
නඩු විභාගය අතරතුර රජයේ නීතිඥවරයා අධිකරණය හමුවේ කරුණු දක්වමින් පෙන්වා දුන්නේ තෙවන සැකකාර සුරේෂ් සලේ ඇසුරු කළ පුද්ගලයන් සහ බුද්ධි නිලධාරීන් කිහිපදෙනෙකුගෙන් මේ වන විටත් ප්‍රකාශ සටහන් කරගෙන ඇති බවයි. කෙසේ වෙතත්, සැකකරු මාස තුනකට අධික කාලයක් කොළඹ ජාතික රෝහලේ නේවාසිකව ප්‍රතිකාර ලබමින් සිටීම හේතුවෙන් විමර්ශන කටයුතු අපේක්ෂිත වේගයෙන් ඉදිරියට ගෙනයාමට නොහැකි වී ඇතැයි පැමිණිල්ල සඳහන් කළේය. ඒ අනුව ඔහු තවදුරටත් නේවාසිකව ප්‍රතිකාර ලැබිය යුතු තත්ත්වයක පසුවන්නේ ද යන්න පිළිබඳව රෝහල් අධ්‍යක්ෂවරයාගේ වාර්තාවක් කැඳවන ලෙස ඉල්ලා සිටියේය.
ඊට ප්‍රතිචාර දක්වමින් සැකකාර සුරේෂ් සලේ වෙනුවෙන් පෙනී සිටි ජනාධිපති නීතිඥ ශවින්ද්‍ර ප්‍රනාන්දු සඳහන් කළේ, වෛද්‍ය වාර්තාවක් කැඳවීමට විත්තියේ කිසිදු විරෝධයක් නොමැති බවයි. තම සේවාදායකයාගෙන් ප්‍රකාශයක් ලබාගැනීමට තරම් සෞඛ්‍ය මට්ටමක් පවතින බවට වෛද්‍යවරුන් දැනුම් දී තිබියදීත්, අපරාධ පරීක්ෂණ දෙපාර්තමේන්තුව ඔහුගෙන් ප්‍රකාශ සටහන් කරගැනීමට පියවර ගෙන නොමැති බව ජනාධිපති නීතිඥවරයා අවධාරණය කළේය. එමෙන්ම පෙර නඩු වාරයේදී පත් කරන ලද විශේෂඥ වෛද්‍ය මණ්ඩලයේ නිරීක්ෂණ වාර්තාව ද මෙතෙක් අධිකරණයට ලැබී නොමැති බව මෙහිදී අනාවරණය විය.
නව බී වාර්තාව සහ බුද්ධි අංශ ක්‍රියාන්විත
අපරාධ පරීක්ෂණ දෙපාර්තමේන්තුව විසින් අධිකරණයට ඉදිරිපත් කරන ලද නවතම බී (B) වාර්තාව හරහා විමර්ශනයේ පැතිකඩ කිහිපයක් පිළිබඳව කරුණු ඉදිරිපත් කර ඇත.
ව්‍යාජ ගමන් බලපත්‍ර චෝදනාව:
විනයාගමූර්ති මුරලිදරන් හෙවත් කරුණා අම්මාන් ලබාදුන් ප්‍රකාශයක් උපුටා දක්වමින්, සුරේෂ් සලේ විසින් ඔහුට ව්‍යාජ ගුවන් ගමන් බලපත්‍රයක් සකස් කර දුන් බවට කරුණු දක්වා තිබේ. කෙසේ වෙතත්, අදාළ සිදුවීම යුද සමයේ හිටපු හමුදාපතිවරයෙකුගේ මැදිහත්වීමෙන් යුතුව එල්.ටී.ටී.ඊ. සංවිධානයට එරෙහිව දියත් කළ රාජ්‍ය බුද්ධි මෙහෙයුමක කොටසක් ලෙස ප්‍රකටව පැවති කරුණක් වන බැවින්, එය වත්මන් පාස්කු විමර්ශන වාර්තාවලට ඈඳාගැනීමේ තාර්කිකත්වය පිළිබඳව විත්තියේ නීතිඥවරුන් ප්‍රශ්න කර ඇත.
තොරතුරුකරුවන්ට මුදල් ගෙවීම්:
එල්.ටී.ටී.ඊ. සාමාජිකයන් කිහිපදෙනෙකුට රජයේ මුදලින් වැටුප් ගෙවීමක් සම්බන්ධයෙන් ද විමර්ශන වාර්තාවේ සඳහන් කර තිබේ. ජාත්‍යන්තර හා දේශීය බුද්ධි සම්ප්‍රදායන්ට අනුව ප්‍රතිවාදී පාර්ශ්වවලින් රහසිගත තොරතුරු ලබාගැනීම සඳහා තොරතුරුකරුවන්ට මූල්‍ය ප්‍රතිපාදන වෙන්කිරීම සාමාන්‍ය බුද්ධි ක්‍රියාපටිපාටියක් වන බවත්, එය හුදු මුදල් අවභාවිතයක් ලෙස අධිකරණය හමුවේ අර්ථකථනය කිරීම රාජ්‍ය බුද්ධි මෙහෙයුම්වල ආරක්ෂාවට බලපෑම් එල්ල කරන්නක් බවත් ආරක්ෂක විශ්ලේෂකයන්ගේ අදහස වී තිබේ.
ඉන්දීය බුද්ධි සබඳතා සහ සාරා ජැස්මින්ගේ පලායාම !
අධිකරණයට ඉදිරිපත් කළ කරුණු අතරින් වඩාත් අවධානයට ලක්වූ තවත් කරුණක් වන්නේ කලාපීය බුද්ධි තොරතුරු හුවමාරුව පිළිබඳ අනාවරණයයි. තමිල්නාඩු 'කිව් බ්‍රාන්ච්' (Q Branch) හි නියෝජ්‍ය පොලිස්පති ඊශ්වර මූර්ති සහ ශ්‍රී ලංකා බුද්ධි නිලධාරීන් අතර ඍජු සබඳතා පැවති බවත්, සහරාන් හෂීම්ගේ අන්තවාදී කණ්ඩායමේ ක්‍රියාකාරකම් පිළිබඳව ඔහු විසින් කල්තියා තොරතුරු සපයා තිබූ බවත් විමර්ශන සටහන්වල ඇතුළත් වේ.
මීට අමතරව, පාස්කු ප්‍රහාර මාලාවෙන් අනතුරුව සයින්දමරුදු පිපිරීමෙන් දිවි ගලවාගත් බවට සැකකෙරෙන මහේන්ද්‍රන් පුලස්තිනී නොහොත් 'සාරා ජැස්මින්' නමැත්තිය නීතිවිරෝධී මුහුදු මාර්ග ඔස්සේ ඉන්දියාවට පලායාම සම්බන්ධයෙන් වන තොරතුරු ද මෙම බී වාර්තාවට ඇතුළත් කර ඇත. ඇය බෝට්ටු මගින් එරටට රැගෙන ඒම පිළිබඳ කරුණු ඉන්දීය බුද්ධි නිලධාරී ඊශ්වර මූර්ති විසින්ම අනාවරණය කර ඇති බව එම ලේඛන මගින් පෙන්වා දෙයි.
පාස්කු ඉරිදා ප්‍රහාරයට අදාළව දේශීය බුද්ධි මෙහෙයුම්, විදේශීය බුද්ධි තොරතුරු හුවමාරුව සහ සැකකරුවන්ගේ සෞඛ්‍ය තත්ත්වයන් පිළිබඳව ඉදිරිපත් වූ මෙම කරුණු හමුවේ ඉදිරි නඩු දිනයන්හිදී ලබාදෙන වෛද්‍ය වාර්තා සහ විමර්ශන ප්‍රගතිය කෙරෙහි අධිකරණ ක්ෂේත්‍රයේ දැඩි අවධානයක් යොමුව පවතී.
