2026/27 ප්‍රසම්පාදන සැලැස්මේ පළමු නෞකාව සැප්තැම්බර් 12 වන විට නොරොච්චෝලට
මෙරට ප්‍රධානතම තාප විදුලි බලාගාරය වන නොරොච්චෝල ලක්විජය බලාගාරයේ අඛණ්ඩ ක්‍රියාකාරිත්වය වෙනුවෙන් ගල්අඟුරු රැගත් 'IVS TRADER' නෞකාව අද (04) දිනයේ පුත්තලම වරාය පරිශ්‍රයට ළඟා වී තිබේ.
මෙම වසරේ දෙවන කාර්තුවට අදාළව දිවයිනට ළඟා වූ මෙම නෞකාව මඟින් මෙට්‍රික් ටොන් 60,000ක ගල්අඟුරු තොගයක් රැගෙන විත් ඇති අතර, අදාළ ආයතන මඟින් සිදුකරනු ලබන ප්‍රමිති හා තත්ත්ව පරීක්ෂාවන් කඩිනමින් අවසන් කර අද පස්වරුවේ සිටම ගොඩබෑමේ කටයුතු ආරම්භ කිරීමට පියවර ගෙන ඇත.
බලශක්ති, වරාය හා සිවිල් ගුවන් සේවා අමාත්‍ය අනුර කරුණාතිලක අද උදෑසන නොරොච්චෝල ලක්විජය බලාගාරයේ විශේෂ නිරීක්ෂණ චාරිකාවක නිරත වෙමින් පවතින ගල්අඟුරු තත්ත්වය සහ ඉදිරි සැපයුම් ජාලය පිළිබඳව සොයා බැලීමක ද නිරත විය.
ප්‍රතික්ෂේප වූ තොගය වෙනුවට ආ විකල්ප සැපයුම
නිරීක්ෂණ චාරිකාවෙන් අනතුරුව මාධ්‍ය වෙත අදහස් දැක්වූ අමාත්‍යවරයා සඳහන් කළේ, පසුගිය කාලයේ හදිසි මිලදී ගැනීම් ක්‍රියාවලියේදී නියමිත ප්‍රමිතියෙන් තොරවීම හේතුවෙන් ප්‍රතික්ෂේප වූ නෞකාව වෙනුවට විකල්ප පියවරක් ලෙස මෙම 'IVS TRADER' නෞකාව මෙරටට ගෙන්වා ගත් බවයි.
පසුගිය කාලසීමාවේ ආනයනය කරන ලද ගල්අඟුරු තොගවලින් සැලකිය යුතු ප්‍රමාණයක් තවමත් බලාගාර පරිශ්‍රයේ සංචිතව පවතින අතර, අද දින ලැබුණු මෙට්‍රික් ටොන් 60,000ක තොගයත් සමඟ ඉදිරි දිනවලදී විදුලි ජනනයට අවශ්‍ය වන ගල්අඟුරු ධාරිතාව උපරිම මට්ටමක පවතිනු ඇති බව බලශක්ති අමාත්‍යාංශය පෙන්වා දෙයි.
ඒ අනුව ගල්අඟුරු හිඟයක් මත පදනම්ව කිසිදු අයුරකින් විදුලි කප්පාදුවක් සිදු නොවන බවත්, පාරිභෝගික ජනතාවට අඛණ්ඩව විදුලිය සැපයීමට රජය පූර්ණ සහතිකය ලබා දෙන බවත් අමාත්‍යවරයා මෙහිදී අවධාරණය කළේය.
2026 - 27 දිගුකාලීන ප්‍රසම්පාදන සැලැස්ම
මෙරට බලශක්ති සුරක්ෂිතතාව තහවුරු කිරීම සඳහා වන ඉදිරි ප්‍රසම්පාදන ක්‍රමවේදයන් පිළිබඳව කරුණු පැහැදිලි කළ අමාත්‍යවරයා,
"2026 - 27 කාලසීමාව සඳහා වන නිල ප්‍රසම්පාදන ක්‍රියාවලිය මේ වන විටත් සම්පූර්ණයෙන්ම අවසන් කර තිබෙනවා. එහි පළමු නෞකාව සැප්තැම්බර් 12 වන විට නොරොච්චෝලේ බලාගාරයට ළඟා වනු ඇතැයි අපි අපේක්ෂා කරනවා. එම නෞකාව පැමිණීමත් සමග ඉදිරියට අඛණ්ඩව සහ විධිමත්ව ගල්අඟුරු තොග ලබාගැනීමේ දීර්ඝකාලීන වැඩපිළිවෙළක් ක්‍රියාත්මකයි" යනුවෙන් පැවසීය.
විදුලිබල ක්ෂේත්‍රයේ විශ්ලේෂකයන් පෙන්වා දෙන්නේ, වියළි කාලගුණික තත්ත්වයන් හමුවේ ජල විදුලි උත්පාදනය යම් පමණකින් පහත වැටුණද, ජාතික විදුලිබල පද්ධතියේ මූලික බර දරන නොරොච්චෝල බලාගාරයට අවශ්‍ය ඉන්ධන හා ගල්අඟුරු නිසි කලට කළමනාකරණය කරගැනීම හරහා ඉදිරි මාස කිහිපය තුළ විදුලි අර්බුදයකින් තොරව පද්ධතිය පවත්වාගෙන යාමට හැකියාව ලැබෙන බවයි.
