පෙත්සම් 15ක විභාගය නිමයි: දූෂණ විරෝධී පනතේ නිගමනය ජනපතිට සහ කථානායකට
රජය විසින් පාර්ලිමේන්තුවට ඉදිරිපත් කර ඇති දූෂණ විරෝධී සංශෝධන පනත් කෙටුම්පතේ ව්‍යවස්ථානුකූලභාවය අභියෝගයට ලක් කරමින් ගොනු කර තිබූ විශේෂ පෙත්සම් විභාගය ශ්‍රේෂ්ඨාධිකරණය හමුවේ අවසන් විය. අදාළ පනත් කෙටුම්පත සම්බන්ධයෙන් අධිකරණය එළඹෙන රහසිගත නිගමනය කථානායකවරයා සහ ජනාධිපතිවරයා වෙත කඩිනමින් යොමු කරන බව විනිසුරු මඩුල්ල නිවේදනය කළේය.
ශිරාන් ගුණරත්න, මහින්ද සමයවර්ධන සහ සම්පත් විජේරත්න යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල හමුවේ දින දෙකක් පුරා මෙම පෙත්සම් සලකා බැලීම සිදු කෙරිණි.
ලිඛිත දේශන සඳුදාට පෙර
වාචික දේශන ඉදිරිපත් කිරීම අවසන් කළ ශ්‍රේෂ්ඨාධිකරණය, කිසියම් පාර්ශ්වයකට ලිඛිත දේශන ඉදිරිපත් කිරීමට අවශ්‍ය නම් ඒවා එළඹෙන සඳුදා පස්වරු 12.00 ට පෙර අධිකරණය හමුවේ ගොනු කරන ලෙස පාර්ශ්වකරුවන්ට නියෝග කළේය. ආණ්ඩුක්‍රම ව්‍යවස්ථාවේ 121 වන වගන්තිය ප්‍රකාරව, පනත් කෙටුම්පතක් සම්බන්ධයෙන් ශ්‍රේෂ්ඨාධිකරණය ලබාදෙන නිගමනය පාර්ලිමේන්තුවේ කථානායකවරයා විසින් සභාගත කරන තෙක් රහසිගත ලේඛනයක් ලෙස පවතී.
පෙත්සම්කරුවන් මතු කළ කරුණු
හිටපු අමාත්‍ය මහාචාර්ය ජී. එල්. පීරිස්, ට්‍රාන්ස්පේරන්සි ඉන්ටර්නැෂනල් ශ්‍රී ලංකා සංවිධානය (TISL), මීඩියා ලෝ ෆෝරම් ඇතුළු පාර්ශ්ව 15 ක් විසින් මෙම පෙත්සම් ගොනු කර තිබිණි.
සංශෝධිත කෙටුම්පතෙහි අන්තර්ගත ඇතැම් වගන්ති මඟින් අධිකරණ බලය කප්පාදු වන බවත්, ආණ්ඩුක්‍රම ව්‍යවස්ථාවෙන් සහතික කර ඇති මූලික මිනිස් අයිතිවාසිකම් සීමා වන බවත් පෙත්සම්කරුවන් වෙනුවෙන් පෙනී සිටි නීතිඥවරු තර්ක කළහ. විශේෂයෙන් විමර්ශන ක්‍රියාවලිය, තොරතුරු හෙළිදරව් කිරීම සහ නීතිමය ක්‍රියාමාර්ග ගැනීමේදී ස්ථාපිත සමතුලිතතාවය ගිලිහී යාමේ අවදානමක් පවතින බව පෙන්වා දුන් ඔවුහු, මෙම කෙටුම්පත සම්මත කිරීමට නම් පාර්ලිමේන්තුවේ විශේෂ බහුතරයකට අමතරව ජනමත විචාරණයක අනුමැතියද අවශ්‍ය බවට තීන්දු කරන ලෙස අධිකරණයෙන් ඉල්ලා සිටියහ.
නීතිපති දෙපාර්තමේන්තුවේ ස්ථාවරය
රජය වෙනුවෙන් පෙනී සිටි නීතිපති දෙපාර්තමේන්තුවේ නිලධාරීන් කරුණු දක්වමින් කියා සිටියේ, අදාළ සංශෝධන මඟින් අපේක්ෂා කරන්නේ දූෂණය වැළැක්වීමේ නීතිමය රාමුව වඩාත් විධිමත් කිරීම සහ ජාත්‍යන්තර ප්‍රමිතීන්ට අනුකූලව වගවීම තහවුරු කිරීම බවයි. කිසිදු වගන්තියකින් මූලික අයිතිවාසිකම් උල්ලංඝනය වීමක් සිදු නොවන බවත්, පනත් කෙටුම්පත සම්මත කිරීම සඳහා ආණ්ඩුක්‍රම ව්‍යවස්ථාවට අනුකූල සාමාන්‍ය ව්‍යවස්ථාදායක ක්‍රියාපටිපාටිය ප්‍රමාණවත් බවත් නීතිපති පාර්ශ්වය පෙන්වා දුන්නේය.
ශ්‍රේෂ්ඨාධිකරණයේ නිල තීන්දුව කථානායකවරයාට ලැබීමෙන් අනතුරුව, පාර්ලිමේන්තු සම්ප්‍රදායට අනුව එය ඉදිරි පාර්ලිමේන්තු සභාවාරයේදී සභාගත කිරීමට නියමිතය.
සබැඳි පුවත් :
දූෂණ විරෝධී සංශෝධන පනත් කෙටුම්පත ශ්‍රේෂ්ඨාධිකරණය හමුවේ අභියෝගයට
