*විශ්වාසනීයත්වය ප්‍රශ්න කරමින් ඇප ඉල්ලූ විත්තියේ තර්ක ප්‍රතික්ෂේප වෙයි; සැප්තැම්බර් 18 තෙක් රිමාන්ඩ්.
ශ්‍රීලන්කන් ගුවන් සේවය වෙනුවෙන් එයාර්බස් ගුවන් යානා මිලදී ගැනීමේ මතභේදාත්මක ගනුදෙනුවට අදාළව අල්ලස් හෝ දූෂණ චෝදනා විමර්ශන කොමිසම මගින් අත්අඩංගුවට ගත් ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ ලබන සැප්තැම්බර් 18 වැනිදා දක්වා රක්ෂිත බන්ධනාගාරගත කිරීමට කොළඹ ප්‍රධාන මහේස්ත්‍රාත් අසංග එස්. බෝදරගම නියෝග කළේය. සැප්තැම්බර් 04 වැනිදා පෙරවරුවේ අල්ලස් කොමිසම හමුවේ පෙනී සිට ප්‍රකාශයක් ලබා දීමෙන් අනතුරුව මන්ත්‍රීවරයාව මෙලෙස අත්අඩංගුවට ගෙන අධිකරණයට ඉදිරිපත් කෙරිණි.
ඩොලර් ලක්ෂ 8ක මූල්‍ය හුවමාරුව
අල්ලස් කොමිසම සහ අපරාධ පරීක්ෂණ දෙපාර්තමේන්තුව (CID) ඒකාබද්ධව සිදුකළ දීර්ඝ විමර්ශනයක ප්‍රගතිය අධිකරණයට වාර්තා කරමින් නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් ජනක බණ්ඩාර පෙන්වා දුන්නේ, එයාර්බස් සමාගම විසින් ලබාදුන් අල්ලස් මුදල් සංසරණය වූ ආකාරය පිළිබඳ තොරතුරු රැසක් අනාවරණය වී ඇති බවයි.
පැමිණිල්ල අධිකරණය හමුවේ තැබූ කරුණුවලට අනුව, ශ්‍රීලන්කන් ගුවන් සමාගමේ හිටපු ප්‍රධාන විධායක නිලධාරී කපිල චන්ද්‍රසේනගේ බිරිඳ වන ප්‍රියංකා නියෝමාලි විජේනායකට අයත් බෲනායි රාජ්‍යයේ ලියාපදිංචි මව් සමාගමක් සහිත සිංගප්පූරුවේ “බිස් සොලියුෂන්” (Biz Solution) සමාගම් ගිණුමට එයාර්බස් වෙතින් මුදල් බැරවී තිබේ. එම ගිණුම හරහා ඕස්ට්‍රේලියාවේ පදිංචි ප්‍රකට ව්‍යාපාරික නිමල් පෙරේරා සභාපතිත්වය දැරූ ආයතනයක සිංගප්පූරු ගිණුමකට ඇමෙරිකානු ඩොලර් 800,000ක මුදලක් හුවමාරු වී ඇත.
එම ඇමෙරිකානු ඩොලර් 800,000ක මුදල (එවකට පැවති විනිමය අනුපාත අනුව රුපියල් මිලියන 100කට ආසන්න වටිනාකම) ශ්‍රී ලංකා රුපියල් බවට පරිවර්තනය කර 2014-2015 කාලසීමාවේදී නාමල් රාජපක්ෂ වෙත භාරදුන් බවට නිමල් පෙරේරා විසින් අල්ලස් කොමිසමට දිවුරුම් ප්‍රකාශයක් මගින් තහවුරු කර ඇති බව නියෝජ්‍ය සොලිසිටර් ජනරාල්වරයා සඳහන් කළේය. තමන්ට එල්ලවූ ජීවිත තර්ජන හේතුවෙන් ඕස්ට්‍රේලියාවේ රැඳී සිටින බව ප්‍රකාශ කළ නිමල් පෙරේරාගෙන්, විමර්ශන නිලධාරීන් එරටට ගොස් ප්‍රකාශ සටහන් කරගෙන තිබේ.
ජාත්‍යන්තර සාක්ෂි සහ ඊමේල් හෙළිදරව්ව
මෙම නඩු කටයුත්තට අදාළ විමර්ශන ශ්‍රී ලංකාවට අමතරව ඕස්ට්‍රේලියාව, සිංගප්පූරුව, ප්‍රංශය සහ ඇමෙරිකා එක්සත් ජනපදය යන රටවල සහාය ඇතිව අවසන් අදියරට පැමිණ ඇති බව පැමිණිල්ල කියා සිටියේය. ප්‍රංශයේ එයාර්බස් සමාගම මෙම විමර්ශනයට පූර්ණ සහාය පළකර ඇති අතර, එහි ජ්‍යෙෂ්ඨ නිලධාරීන් තෙවරක් ශ්‍රී ලංකාවට පැමිණ ප්‍රකාශ හතරක් ලබාදී ඇත. ගනුදෙනුවට අදාළ අභ්‍යන්තර ලේඛන, බැංකු වාර්තා සහ ඊමේල් පණිවුඩ රැසක් විමර්ශකයන් වෙත ලබාදීමට එම සමාගම පියවර ගෙන තිබේ.
මීට අමතරව, ‘බිස් සොලියුෂන්’ ආයතනයෙන් තවත් රුපියල් මිලියන 25ක මුදලක් අවස්ථා හතරකදී ශ්‍රීලන්කන් හිටපු අධ්‍යක්ෂ මණ්ඩල සාමාජික ශමින්ද්‍ර රාජපක්ෂගේ ගිණුමකට බැරවී ඇති බවත්, ඔහු මේ වනවිට ඇමෙරිකාවේ රැඳී සිටින බවත් විමර්ශකයින් අධිකරණයට වාර්තා කළේය.
විත්තියේ තර්කය සහ සාක්ෂියේ විශ්වාසනීයත්වය
නාමල් රාජපක්ෂ වෙනුවෙන් පෙනී සිටි ජනාධිපති නීතිඥ සම්පත් මෙන්ඩිස් ඇප ඉල්ලීමක් ඉදිරිපත් කරමින් පෙන්වා දුන්නේ, මෙම අත්අඩංගුවට ගැනීම සම්පූර්ණයෙන්ම පදනම් වී ඇත්තේ නිමල් පෙරේරාගේ ප්‍රකාශය මත පමණක් බවයි. එයාර්බස් සමාගමේ නිලධාරීන් හෝ ප්‍රංශ විමර්ශකයන් නාමල් රාජපක්ෂට මුදල් ලබාදුන් බවට කිසිදු ප්‍රකාශයක් කර නොමැති බව ඔහු සඳහන් කළේය.
මීට පෙර ක්‍රිෂ් ගනුදෙනුව ආශ්‍රිත නඩු කටයුතුවලදී නිමල් පෙරේරා සිදුකළ පරස්පර ප්‍රකාශ සිහිපත් කළ විත්තියේ නීතිඥවරයා, 2019 වසරේදී CIDය පවා ප්‍රතික්ෂේප කළ පුද්ගලයෙකුගේ ප්‍රකාශයක් මත පමණක් තම සේවාදායකයා රක්ෂිත බන්ධනාගාරගත කිරීම අසාධාරණ බවත්, ඕනෑම දැඩි ඇප කොන්දේසියක් යටතේ ඔහුව මුදාහරින ලෙසත් ඉල්ලා සිටියේය.
මහේස්ත්‍රාත්වරයාගේ නියෝගය
දෙපාර්ශ්වයේ කරුණු දැක්වීම් සලකා බැලූ කොළඹ ප්‍රධාන මහේස්ත්‍රාත්වරයා ප්‍රකාශ කළේ, දූෂණ විරෝධී පනතේ 149 වැනි වගන්තිය යටතේ අල්ලස් කොමිසමේ අධ්‍යක්ෂ ජනරාල්වරයා නිකුත් කර ඇති සහතිකය අභියෝගයට ලක්ව නොමැති පසුබිමක සැකකරුට ඇප ලබාදිය හැක්කේ සුවිශේෂී කරුණු මත පමණක් බවයි.
සාක්ෂිකරුවෙකුගේ විශ්වාසනීයත්වය පිළිබඳ ගැටලුව නිරාකරණය කළ යුත්තේ පූර්ණ නඩු විභාගයකදී හරස් ප්‍රශ්න ඇසීම මගින් මිස ඇප සලකා බලන අවස්ථාවේදී නොවන බව පෙන්වා දුන් මහේස්ත්‍රාත්වරයා, ඇප ලබාදීමට තරම් ප්‍රමාණවත් සුවිශේෂී කරුණු ඉදිරිපත් වී නොමැති බැවින් සැකකරු සැප්තැම්බර් 18 වැනිදා තෙක් රක්ෂිත බන්ධනාගාරගත කිරීමට නියෝග කළේය. එදිනට එයාර්බස් සමාගමේ නිලධාරීන් ලබාදුන් ප්‍රකාශවල සාක්ෂි සම්පිණ්ඩනයක් ඉදිරිපත් කරන ලෙසද අල්ලස් කොමිසමට නියම කෙරිණි.
