එල්නිනෝ කාලගුණික බලපෑමට එරෙහි රජයේ ආපදා පෙරසූදානම UN නියෝජිතයන්ගේ ඇගයීමට
ශ්‍රී ලංකාව මුහුණ දෙන දේශගුණික විපර්යාස සහ ඉදිරි ආපදා අවදානම් තත්ත්වයන් කළමනාකරණය කරගැනීම සඳහා වන රජයේ වැඩපිළිවෙළට එක්සත් ජාතීන්ගේ සංවිධානයේ පූර්ණ තාක්ෂණික හා මෙහෙයුම් සහාය ලබාදීමට එකඟතාව පළවී තිබේ.
එක්සත් ජාතීන්ගේ සංවිධානයේ ශ්‍රී ලංකා නිත්‍ය නියෝජිත මාර්ක් ඇන්ඩෲ ෆ්‍රෙන්ච් (Marc-André Franche) ප්‍රමුඛ නියෝජිත පිරිසක් සහ ජනාධිපති කාර්ය මණ්ඩල ප්‍රධානී ප්‍රභාත් චන්ද්‍රකීර්ති අතර කොළඹ පිහිටි ජනාධිපති ලේකම් කාර්යාලයේදී අද (07) පෙරවරුවේ පැවති නිල හමුවකදී මෙම තීරණයට එළඹිණි.
'දිට්වා' කුණාටුවේ බලපෑම සහ ප්‍රතිසාධන ක්‍රියාවලිය
මෙම සාකච්ඡාවේ ප්‍රධාන අවධානයක් යොමුවූයේ මෑතකදී බලපෑ 'දිට්වා' සුළි කුණාටුව හේතුවෙන් නිවාස හා දේපළ අහිමි වූ ජනතාව කඩිනමින් නැවත පදිංචි කිරීමේ ක්‍රියාවලිය පිළිබඳවයි. ආපදාවට ලක්වූ පවුල් සඳහා සුරක්ෂිත නිවාස සැපයීම සහ ඔවුන්ගේ ජීවනෝපාය යථා තත්ත්වයට පත් කිරීම වෙනුවෙන් රජය දැනටමත් ගෙන ඇති ක්‍රියාමාර්ග පිළිබඳව ජනාධිපති කාර්ය මණ්ඩල ප්‍රධානියා මෙහිදී ජාත්‍යන්තර නියෝජිතයන් දැනුවත් කළේය.
එල්නිනෝ තත්ත්වය සහ පූර්ව ආපදා පෙරසූදානම
කලාපීය කාලගුණික විපර්යාස සමග මතුවෙමින් පවතින එල්නිනෝ (El Niño) තත්ත්වය හමුවේ ඉදිරියේදී ඇති විය හැකි වියළි කාලගුණය හෝ අනපේක්ෂිත ආපදා තත්ත්වයන්ට සාර්ථකව මුහුණදීම සඳහා රජය සකස් කර ඇති උපායමාර්ගික ආපදා කළමනාකරණ සැලැස්ම ද මෙහිදී විස්තර කෙරිණි. ආපදාවක් සිදු වූ පසු ප්‍රතිචාර දැක්වීමට වඩා, පූර්ව අනතුරු ඇඟවීම් සහ ආරක්ෂණ ක්‍රමවේද ඔස්සේ ජනජීවිත හා යටිතල පහසුකම් ආරක්ෂා කරගැනීම කෙරෙහි රජයේ විශේෂ ප්‍රමුඛතාව යොමුව ඇති බව ප්‍රභාත් චන්ද්‍රකීර්ති පෙන්වා දුන්නේය.
තිරසාර සංවර්ධනය වෙනුවෙන් එක්සත් ජාතීන්ගේ ප්‍රතිඥාව
රජයේ මෙම ඉදිරි දැක්ම සහ ක්ෂණික ප්‍රතිචාර දැක්වීමේ යාන්ත්‍රණය අගය කළ එක්සත් ජාතීන්ගේ නිත්‍ය නියෝජිත මාර්ක් ඇන්ඩෲ ෆ්‍රෙන්ච්, එම වැඩපිළිවෙළ සාර්ථකව ඉදිරියට ගෙන යාම සඳහා එක්සත් ජාතීන්ගේ සංවිධානයේ ශ්‍රී ලංකා මෙහෙයුම් ජාලය හරහා අවශ්‍ය සියලු සහයෝගය අඛණ්ඩව ලබාදෙන බවට සහතික විය.
මෙම අවස්ථාවට එක්සත් ජාතීන්ගේ සංවිධානයේ හවුල්කාරිත්ව සහ සංවර්ධන මූල්‍ය විශේෂඥ අසාම් බාකීර් මාකර් (Azam Bakeer Markar) සහ ශ්‍රී ලංකාවේ මානුෂීය සහ ඔරොත්තුදීමේ හැකියාව පිළිබඳ නිලධාරිනී වගීෂා පෙරේරා ඇතුළු නිලධාරීන් පිරිසක් එක්ව සිටියහ.
