'විපක්ෂ බලවේග පෙරමුණකට එන ලකුණු මැද' අනුරාධපුර වේදිකාවට මහින්ද එයි
ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ අත්අඩංගුවට ගෙන රක්ෂිත බන්ධනාගාරගත කර සිටින පසුබිමක, හිටපු ජනාධිපති මහින්ද රාජපක්ෂ ගේ ප්‍රධානත්වයෙන් සැප්තැම්බර් 12 දා පැවැත්වීමට නියමිත අනුරාධපුර රැලිය වෙනුවෙන් එක්සත් ජාතික පක්ෂය සිය පූර්ණ සහයෝගය සහ උණුසුම් සුබ පැතුම් පළකර තිබේ.
එක්සත් ජාතික පක්ෂයේ සභාපති වජිර අබේවර්ධන විසින් ශ්‍රී ලංකා පොදුජන පෙරමුණේ මහලේකම්, නීතීඥ සාගර කාරියවසම් වෙත ලිඛිතව නිල පණිවිඩයක් යොමු කරමින් මේ බව දැනුම් දී ඇත.
දේශපාලන අරමුණක් සහිත ක්‍රියාමාර්ගයක් බවට චෝදනා
ශ්‍රී ලංකා පොදුජන පෙරමුණ සිය ඉදිරි දේශපාලන ක්‍රියාන්විතය වෙනුවෙන් සංවිධානය කරන ලද අනුරාධපුර මහජන රැලිය සැලසුම් කර තිබුණේ පාර්ලිමේන්තු මන්ත්‍රී නාමල් රාජපක්ෂ ගේ මූලිකත්වයෙන් බව පෙන්වා දෙන එජාප සභාපතිවරයා, මෙම අත්අඩංගුවට ගැනීම අනුරාධපුර රැලිය කඩාකප්පල් කිරීමේ අරමුණින් ගනු ලැබූ පියවරක් බව සිය ලිපිය මඟින් චෝදනා කරයි.
එම ක්‍රියාමාර්ගයෙන් අධෛර්යමත් නොවී, පස්වන විධායක ජනාධිපති මහින්ද රාජපක්ෂ ගේ ප්‍රධානත්වයෙන් අනුරාධපුරයේ පැවැත්වෙන ජන රැළිය සාර්ථක කරගැනීමට එක්සත් ජාතික පක්ෂයේ උණුසුම් සුබ පැතුම් එක්කරන බව ද වජිර අබේවර්ධන සඳහන් කර තිබේ.
නාමල් රාජපක්ෂ ගේ අත්අඩංගුවට ගැනීම දේශපාලන පළිගැනීමක් මෙන්ම සැලසුම් සහගතව සිදුකළ එකක් බවට එක්සත් ජාතික පක්ෂය පසුගියදා (සැප්තැම්බර් 04) නිවේදනයක් නිකුත් කරමින් චෝදනා කර තිබිණ.
නාමල් රාජපක්ෂ මන්ත්‍රීවරයා රිමාන්ඩ් භාරයට පත්කර සුළු මොහොතකින් නිකුත්කර තිබු එම නිවේදනය මගින් ද අවධාරණය කර තිබුනේ, සැප්තැම්බර් 12 වැනි දින අනුරාධපුරයේ පැවැත්වීමට නියමිත රැලිය කඩාකප්පල් කිරීමේ අරමුණින් මෙම පියවර ගෙන ඇති බවයි. ජාතික ජන බලවේගයේ නායකයින්ට මෙන්ම පොහොට්ටුවේ නායකයින්ට ද රට පුරා රැස්වීම් පැවැත්වීමේ ප්‍රජාතන්ත්‍රවාදී අයිතියක් ඇති බවත්, මර්දනය තුළින් ජනතා ආකර්ෂණය නැවැත්විය නොහැකි බවත් එජාප මාධ්‍ය අංශය නිකුත් කළ එම නිවේදනයේ වැඩිදුරටත් සඳහන් විය.
නීතිමය පියවර සහ පොහොට්ටුවේ ස්ථාවරය
ශ්‍රීලන්කන් ගුවන් සමාගමට අදාළව මීට පෙර මතුවූ එයාර්බස් ගනුදෙනුව සම්බන්ධයෙන් සිදුකෙරෙන විමර්ශනවලට අදාළව අල්ලස් හෝ දූෂණ චෝදනා විමර්ශන කොමිෂන් සභාව (CIABOC) මඟින් නාමල් රාජපක්ෂ පසුගිය සැප්තැම්බර් 04 වන දින අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාරගත කෙරිණි.
මෙම අත්අඩංගුවට ගැනීම සම්බන්ධයෙන් අදහස් දැක්වූ ශ්‍රී ලංකා පොදුජන පෙරමුණේ මහලේකම් සාගර කාරියවසම් මීට පෙර ප්‍රකාශ කර තිබුණේ, එල්ල වී ඇති සියලු චෝදනා පදනම් විරහිත බවත්, සැලසුම් කළ පරිදි අනුරාධපුර රැලිය සැප්තැම්බර් 12 වන දින කිසිදු වෙනසක් නොමැතිව පවත්වන බවත්ය.
විපක්ෂයේ නව දේශපාලන පෙළගැස්ම
ජාතික මට්ටමේ දේශපාලන ක්‍රියාවලිය තුළ ආණ්ඩු පක්ෂය දිවයින පුරා සම්මන්ත්‍රණ මාලාවක් ආරම්භ කර ඇති මොහොතක, විපක්ෂයේ ප්‍රධාන දේශපාලන බලවේග අතර මෙවන් සහයෝගීතාවක් ගොඩනැගීම දේශපාලන නිරීක්ෂකයින්ගේ දැඩි අවධානයට ලක්ව තිබේ. විශේෂයෙන්ම පවතින ආණ්ඩුවේ ප්‍රතිපත්ති සහ ක්‍රියාමාර්ග හමුවේ විපක්ෂ කණ්ඩායම් එක් වේදිකාවකට සමීප වීමේ නැඹුරුවක් මෙමඟින් පෙන්නුම් කරන බව විචාරකයෝ පෙන්වා දෙති.
