රැකියා, අධ්‍යාපනය සහ සමාජ අභියෝග ගැන තරුණයින්ගෙන් මන්ත්‍රීවරුන්ට සෘජු ප්‍රතිපත්ති යෝජනා
තීරණ ගැනීමේ සහ ප්‍රතිපත්ති සම්පාදනයේ සාම්ප්‍රදායික ක්‍රමවේදවලින් ඔබ්බට යමින්, තරුණ ප්‍රජාවගේ සෘජු අදහස් රාජ්‍ය ප්‍රතිපත්තිවලට එක්කිරීමේ අරමුණින් ක්‍රියාත්මක කෙරුණු ‘හඬ ප්‍රතිපත්ති වෙත’ (Voice to Policy Dialogue) වැඩසටහන් මාලාවේ පළමු අදියර මහනුවරදී සාර්ථකව අවසන් විය.
ශ්‍රී ලංකා පාර්ලිමේන්තුවේ විවෘත පාර්ලිමේන්තු වැඩසටහන පිළිබඳ පාර්ලිමේන්තු සංසදය (Parliamentary Caucus for Open Parliament Initiative) මඟින් ‘Coalition for Inclusive Impact’ (CII) ආයතනයේ දායකත්වයෙන් සංවිධානය කළ මෙම හමුව සඳහා මධ්‍යම පළාත නියෝජනය කරමින් තරුණ තරුණියන් 40 දෙනෙකු සහ පාර්ලිමේන්තු මන්ත්‍රීවරුන් 8 දෙනෙකු එක්ව සිටියහ.
ඡන්දයෙන් ඔබ්බට ගිය පුරවැසි දායකත්වයක්
මෙම වැඩසටහනේ ප්‍රධාන අරමුණ වූයේ තරුණ ජනතාවගේ ගැටලු මැතිවරණ වේදිකාවලට පමණක් සීමා නොවී, රජයේ සැබෑ ප්‍රතිපත්ති සහ නීති සම්පාදන ක්‍රියාවලිය වෙත සෘජුව යොමු කිරීමයි.
මේ පිළිබඳව අදහස් දක්වමින් විවෘත පාර්ලිමේන්තු සංසදයේ සම සභාපති, පාර්ලිමේන්තු මන්ත්‍රී ශානක්කියන් රාසමානික්කම් පෙන්වා දුන්නේ, තරුණයින්ට ප්‍රතිපත්ති හැඩගැස්වීමේදී සෘජුව සම්බන්ධ වීමට වැඩි ඉඩකඩක් පාර්ලිමේන්තුව හරහා නිර්මාණය විය යුතු බවයි. ඡන්ද කාලයට පමණක් සීමා නොවී, රටේ දිශානතිය තීරණය වන ප්‍රතිපත්ති සම්පාදන මේසය වටා තරුණ හඬ අනිවාර්යයෙන්ම නියෝජනය විය යුතු බව හෙතෙම අවධාරණය කළේය.
මහනුවර කේන්ද්‍ර කරගත් ප්‍රමුඛතා සහ සමාජ අභියෝග
මහනුවර පැවති සංවාදයේදී සහභාගි වූ තරුණ නියෝජිතයින් විසින් වර්තමාන අධ්‍යාපන රටාව සහ රැකියා වෙළෙඳපොළ අතර පවතින පරතරය පිළිබඳව ප්‍රබල ලෙස කරුණු ඉදිරිපත් කරන ලදී. විශේෂයෙන් වෘත්තීය පුහුණුව තවදුරටත් පුළුල් කිරීම, අධ්‍යාපන පද්ධතිය සහ පෞද්ගලික අංශය අතර සබඳතා ශක්තිමත් කිරීම මෙන්ම ගුණාත්මක රැකියා අවස්ථා සඳහා ප්‍රවේශය පුළුල් කිරීමේ අවශ්‍යතාව මෙහිදී මතු විය.
ඊට අමතරව, දේශපාලන තීන්දු ගැනීමේ ක්‍රියාවලියේදී තරුණ කාන්තාවන්ගේ නියෝජනය ඉහළ නැංවීම, ව්‍යවසායකත්වය ප්‍රවර්ධනය කිරීම සහ මහනුවර නගරය සංචාරක, ඩිජිටල් සබඳතා සහ යටිතල පහසුකම් මඟින් ආර්ථික කේන්ද්‍රස්ථානයක් ලෙස දියුණු කිරීම පිළිබඳව ද ප්‍රායෝගික යෝජනා රැසක් ඉදිරිපත් විය. තරුණ ප්‍රජාව මුහුණ දෙන මත්ද්‍රව්‍ය උවදුර හුදෙක් නීතිය ක්‍රියාත්මක කිරීමෙන් පමණක් නොව, විරැකියාව සහ නිසි මානසික/සමාජීය උපකාරක සේවාවන් නොමැතිකම වැනි මූලික හේතු හඳුනාගෙන විසඳිය යුතු බව ද මෙහිදී සාකච්ඡාවට ලක්විය.
ජාතික තලයේ පොදු අභියෝග
ගම්පහ, මඩකලපුව සහ මහනුවර යන දිස්ත්‍රික්ක ආවරණය කරමින් ක්‍රියාත්මක වූ මෙම පළමු අදියරේදී අනාවරණය වී ඇත්තේ, ප්‍රදේශයෙන් ප්‍රදේශයට විශේෂිත ගැටලු පැවතුණ ද අධ්‍යාපනය, රැකියා අවස්ථා, ප්‍රවාහනය සහ සමාජ සුබසාධනය වැනි මූලික ක්ෂේත්‍රයන්හිදී මුළු දිවයිනේම තරුණ පරපුර මුහුණ දෙන්නේ එක හා සමාන පොදු අභියෝගයන්ට බවයි.
තරුණයින් විසින් ප්‍රජා මට්ටමින් ගැටලු හඳුනාගෙන, ඊට විසඳුම් සකස් කර, මහජන නියෝජිතයන් හමුවේ සෘජුව තැබීමට මෙවැනි ක්‍රමවේදයක් භාවිත කිරීම පුරවැසි ප්‍රජාතන්ත්‍රවාදය ශක්තිමත් කෙරෙන සාධනීය පියවරක් ලෙස සැලකේ.
මෙම සාකච්ඡාවන්ට එක්වූ පාර්ලිමේන්තු මන්ත්‍රීවරුන් මෙන්ම පාර්ලිමේන්තුවේ සහකාර මහලේකම්වරයා ද තරුණ අදහස් විමසා බැලූ අතර, පළමු අදියර තුළින් ගොඩනැගුණු මෙම යෝජනා අදාළ පාර්ලිමේන්තු ආංශික අධීක්ෂණ කාරක සභා හා ව්‍යවස්ථාදායක ක්‍රියාවලිය ඔස්සේ ඉදිරියට ගෙන යාම මීළඟ වගකීම බව පාර්ලිමේන්තු සංසදය වැඩිදුරටත් සඳහන් කරයි.
