එක්සත් රාජධානියේ සහ මෙරට තානාපති සංසදයේ යෝජනාවකට අනුව OPA හිදී නිල පත් කිරීම සිදු කෙරේ.
පාරිභෝගිකයන් මුහුණ දෙන විවිධ ආරවුල් සහ ගැටලු කඩිනමින් නිරාකරණය කර ගැනීම සඳහා ජ්‍යෙෂ්ඨ නීතිඥ ආචාර්ය සුනිල් අබේරත්න පාරිභෝගික ඔම්බුඩ්ස්මන්වරයෙකු ලෙස පත් කර තිබේ.
මෙම පත් කිරීම සිදු කර ඇත්තේ එක්සත් රාජධානියේ සහ මෙරට තානාපති සංසදයේ යෝජනාවක් අනුවය. පාරිභෝගික කටයුතු අධිකාරියේ හිටපු සභාපති, ජනාධිපති නීතිඥ සරත් විජේසිංහ ගේ මඟ පෙන්වීම යටතේ මෙම නව ඔම්බුඩ්ස්මන්වරයා පත් කර ගැනීම පසුගියදා (04 වනදා) විද්‍යත් වෘත්තිකයන්ගේ සංගම් ශාලාවේදී (OPA) නිල වශයෙන් සිදු කෙරිණි.
පාරිභෝගිකයන්ට මුහුණ දීමට සිදු වන පැමිණිලි විසඳා ගැනීම සඳහා සිවිල් අධිකරණ වෙත යාමට සිදු වීමෙන් විශාල කාලයක් ගත වීම ඇතුළු ගැටලු කිහිපයක් පවතින බවත්, මෙම ඔම්බුඩ්ස්මන්වරයා වෙත යොමු කෙරෙන පැමිණිලි සම්බන්ධයෙන් දෙපාර්ශවයම කැඳවා සාකච්ඡා මාර්ගයෙන් සමථයකට පත් කිරීමට මෙයින් අවස්ථාව සැලසෙන බවත් නව ඔම්බුඩ්ස්මන් ආචාර්ය සුනිල් අබේරත්න මෙහිදී අදහස් දක්වමින් ප්‍රකාශ කළේය.
මෙම අවස්ථාවට හිටපු අභියාචනාධිකරණ විනිසුරු රුවන් ප්‍රනාන්දු, ඔම්බුඩ්ස්මන් කාර්යාලයේ මහ ලේකම් ධමින්ද කේ.ජී.ගුණතිලක, නීතිඥ සුගන්ධිකා කේ හංගිලිපොලගේ, OPA හි හිටපු සභාපති නිශ්ශංක පෙරේරා සහ OPA ලේකම් රවී රූපසිංහ ඇතුළු නීතිඥ සහ වානිජ මණ්ඩලවල ප්‍රධානීහු පිරිසක් සහභාගී වී සිටියහ.
(සටහන | ජේ.මුණසිංහ)
