*අධිකරණ ක්‍රියාමාර්ග: CIDයෙන් ප්‍රකාශ 2,200ක්; සැකකරුවන් 81 දක්වා ඉහළට.
මීගමුව බන්ධනාගාරයේ ඇති වූ ප්‍රචණ්ඩ ගැටුමේදී ජීවිතක්ෂයට පත් වූ උම්නිතාත් සරත්චන්ද්‍රන් නමැති ඉන්දීය ජාතික රැඳවියාගේ මෘත දේහය, අධිකරණ නියෝග ප්‍රකාරව පසුගිය සැප්තැම්බර් 02 වන දින විශේෂ ආරක්ෂාවක් යටතේ මිහිදන් කළ බව අපරාධ පරීක්ෂණ දෙපාර්තමේන්තුව (CID) මීගමුව ප්‍රධාන මහෙස්ත්‍රාත් අධිකරණයට දැනුම් දුන්නේය.
ඉන්දීය මහ කොමසාරිස් කාර්යාල නිලධාරීන්ගේ මැදිහත්වීම හා සම්බන්ධීකරණය මත රජයේ වියදමින් මෙම අවසන් කටයුතු මීගමුව මහ නගර සභාවට අයත් මඤ්ඤොක්කා හේන පොදු සුසාන භූමියේදී සිදු කළ බව විමර්ශන නිලධාරීහු ප්‍රකාශ කළහ.
නඩු භාණ්ඩ සහ රස පරීක්ෂක වාර්තා
මීගමුව ප්‍රධාන මහෙස්ත්‍රාත් ශිලනි පෙරේරා ඉදිරියේ මෙම නඩුකරය ඊයේ (08) කැඳවූ අවස්ථාවේදී, මියගිය ඉන්දීය ජාතිකයා මියයන අවස්ථාවේ ඇඳ සිටි ඇඳුම් සහ පාවහන් යුගල රස පරීක්ෂක වාර්තාවක් කැඳවීම සඳහා අධිකරණයට භාර දීමට පියවර ගත් බව CID නිලධාරීන් සඳහන් කළේය.
සිද්ධියට අදාළව මේ වන විට පුද්ගල ප්‍රකාශ 2,200කට ආසන්න සංඛ්‍යාවක් සටහන් කරගෙන ඇති නමුත්, පොලිස් භාරයට ගෙන රස පරීක්ෂකවරයා වෙත යොමු කර ඇති ආයුධ හා නඩු භාණ්ඩ සම්බන්ධ වාර්තා මෙතෙක් ලැබී නොමැති බවද විමර්ශන අංශ අධිකරණයට දැන්වීය.
හඳුනාගැනීමේ පෙරට්ටුව සහ සැකකරුවන් 81ක්
මෙම සිදුවීමට අදාළව නම් කර ඇති තවත් සැකකරුවන් 11 දෙනෙකු ආවරණය කරන ලද මුහුණු සහිතව සැප්තැම්බර් 10 වැනි දින හඳුනාගැනීමේ පෙරට්ටුවකට ඉදිරිපත් කිරීමට බන්ධනාගාර අධිකාරිවරයාට නියෝගයක් නිකුත් කෙරිණි. ඒ අනුව සිද්ධිය සම්බන්ධයෙන් නම් කර ඇති සමස්ත සැකකරුවන් සංඛ්‍යාව 81ක් දක්වා ඉහළ ගොස් ඇත.
ඊයේ දින අධිකරණයට ඉදිරිපත් කෙරුණු සැකකරුවන් පස්දෙනා, සාක්ෂිකරුවන් ලෙස පෙනී සිටි බන්ධනාගාර නිලධාරීන් විසින් ප්‍රධාන මහෙස්ත්‍රාත්වරිය ඉදිරියේදී හඳුනාගනු ලැබීය.
අධිකරණය හමුවේ නැගුණු නීතිමය තර්ක
ජන අරගලයේ පුරවැසියෝ සංවිධානය වෙනුවෙන් පෙනී සිටි ජනාධිපති නීතිඥ මෛත්‍රී ගුණරත්න කරුණු දක්වමින්, මෙම සිදුවීමේදී පාර්ශ්ව දෙකෙහිම සිදුවූ ජීවිත හානි පිළිබඳව අපක්ෂපාතී පරීක්ෂණයක් සිදු විය යුතු බව අවධාරණය කළේය.
ජූලි 05 වන දින ඇති වූ ආරවුල පාලනය කර තිබියදී පසුදින බාහිරින් පැමිණි අතිරේක කණ්ඩායම් මැදිහත් වීමෙන් තත්ත්වය දරුණු අතට හැරුණු බව පෙන්වා දුන් නීතිඥවරයා, මියගිය රැඳවියන්ගේ පවුල්වල අයිතිවාසිකම් සහ සාක්ෂිකරුවන්ගේ ආරක්ෂාව තහවුරු වන පරිසරයක් නිර්මාණය කිරීමේ වැදගත්කම අධිකරණය හමුවේ තැබීය.
ජූලි 05, 06, යන දිනවල මීගමුව බන්ධනාගාරේ ඇති වූ මෙම ගැටුමෙන් බන්ධනාගාර නිලධාරින් 20 දෙනෙකු සහ රැඳවියන් 22 කු ජීවිතක්ෂයට පත් වූ අතර සීයකට අධික පිරිසක් තුවාල ලැබීය.
අපරාධ පරීක්ෂණ දෙපාර්තමේන්තුවේ වාණිජ අපරාධ විමර්ශන අංශ (01) හි නිලධාරීන් විසින් මෙම වැඩිදුර වාර්තාව ඉදිරිපත් කරන ලද අතර, නඩුවේ වැඩිදුර විභාගය සැප්තැම්බර් 10 වන දිනට නියමිතය.
