මරණ පරීක්ෂණ සහ රස පරීක්ෂක වාර්තා කඩිනම් කරන්නැයි නියෝග; නඩුව ඔක්තෝබර් 14ට
ශ්‍රී ලන්කන් ගුවන් සමාගමේ හිටපු ප්‍රධාන විධායක නිලධාරී කපිල චන්ද්‍රසේන ගේ සැකකටයුතු මරණයට අදාළව, ඔහු භාවිත කළ 'ඇපල්' (Apple) වර්ගයේ ජංගම දුරකථනයේ දත්ත ලබාගැනීම සඳහා නිකුත් කෙරුණු අධිකරණ නියෝගය ඇමරිකාවේ පිහිටි ඇපල් මව් සමාගම වෙත විද්‍යුත් තැපෑලෙන් (E-mail) යොමු කළ බව විමර්ශන අංශ අද (09) කොළඹ කොටුව මහේස්ත්‍රාත් අධිකරණය හමුවේ අනාවරණය කළේය.
කොළඹ කොටුව මහේස්ත්‍රාත් පසන් අමරසේන හමුවේ මෙම මරණයට අදාළ මහේස්ත්‍රාත් පරීක්ෂණය කැඳවූ අවස්ථාවේදී විමර්ශන නිලධාරීන් වැඩිදුර වාර්තාවක් මගින් මේ බව දැනුම් දුන්නේය.
අගුළු වැටුණු අයිෆෝනය සහ ඇපල් සමාගමේ සහාය
අධිකරණයට කරුණු දක්වමින් විමර්ශකයින් සඳහන් කළේ, අදාළ දුරකථන දත්ත විමර්ශනයට අදාළව මීට පෙර අධිකරණයෙන් ලබාගත් නියෝගය ඉකුත් අගෝස්තු මස 18 වැනිදා ඇමරිකාවේ ඇපල් සමාගම වෙත යොමු කළ බවයි.
එයාර් බස් මිලදී ගැනීමේ ගනුදෙනුවට අදාළ නඩුවක සැකකරුවකු වූ කපිල චන්ද්‍රසේන පසුගිය මැයි මාසයේදී කොල්ලුපිටිය, පේද්‍රිස් මාවතේ පිහිටි ප්‍රවීණ ක්‍රිකට් ක්‍රීඩක අරවින්ද ද සිල්වා ගේ නිවසේ කාමරයක ගෙල වැලලාගෙන සැකකටයුතු ලෙස මියගොස් සිටියදී හමුවිය. සිද්ධියෙන් අනතුරුව විමර්ශකයින් අතට පත් වූ ඔහුගේ අයිෆෝන් (iPhone 16 Pro Max) වර්ගයේ ජංගම දුරකථනය මුහුණු හඳුනාගැනීමේ ආරක්ෂිත පද්ධතියක් (Face ID) සහිතව අගුළු වැටී තිබීම හේතුවෙන් ඊට ප්‍රවේශ වීමට නොහැකි වී තිබුණි.
ඒ අනුව, එක්සත් ජනපද ෆෙඩරල් විමර්ශන කාර්යාංශය (FBI) හරහා මෙන්ම අධිකරණ නියෝගයක් මගින් ඇපල් සමාගමේ මූලස්ථානයෙන් තාක්ෂණික සහාය ලබාගැනීමට මෙලෙස පියවර ගෙන තිබේ.
ප්‍රමාද වන වාර්තා සහ අධිකරණයේ සිහි කැඳවීම
මෙම නඩු කටයුත්ත මීට පෙර කැඳවූ අවස්ථාවේදී විමර්ශනවල පවතින මන්දගාමී ස්වභාවය පිළිබඳව මහේස්ත්‍රාත්වරයා සිය අප්‍රසාදය පළ කර තිබුණි. අද දින විමර්ශන ප්‍රගතිය දැක්වීමේදී, මියගිය අයගේ පශ්චාත් මරණ පරීක්ෂණ වාර්තාව මෙන්ම රස පරීක්ෂක වාර්තාව ද මෙතෙක් විමර්ශන අංශ වෙත ලැබී නොමැති බව අධිකරණය හමුවේ ප්‍රකාශ විය.
එම තත්ත්වය සැලකිල්ලට ගත් මහේස්ත්‍රාත්වරයා, අදාළ වාර්තා කඩිනමින් අධිකරණයට යොමු කරන ලෙස හදිසි මරණ පරීක්ෂකවරයාට සහ රජයේ රස පරීක්ෂකවරයාට වහාම සිහි කැඳවීම් නිකුත් කිරීමට නියෝග කළේය. අනතුරුව සිද්ධියට අදාළ මහේස්ත්‍රාත් පරීක්ෂණය ලබන ඔක්තෝබර් මස 14 වැනිදා දක්වා කල් තැබිණි.
