'සිනමාවේ පාට් සැබෑ ජීවිතයට බෑ' - මහේස්ත්‍රාත්වරියගෙන් ජනප්‍රිය නළුවාට දැඩි අවවාද
සිනමා විචාරකයෙකුට සාපරාධී බියගැන්වීම් සිදුකොට පහරදීමේ චෝදනාව සම්බන්ධයෙන් වරද පිළිගත් ජනප්‍රිය රංගන ශිල්පී හේමාල් රණසිංහ, සමථ මණ්ඩලයේදී ඇති කරගත් එකඟතා කොන්දේසි හතරක් මත මුදාහැරීමට ගල්කිස්ස මහේස්ත්‍රාත් කාංචනා නෙරංජලා සිල්වා අද (සැප්තැම්බර් 10) නියෝග කළාය.
සමථයට අදාළ නඩු වාර්තාව අධිකරණය හමුවේ සලකා බැලූ අවස්ථාවේදී මහේස්ත්‍රාත්වරිය විත්තිකාර රංගන ශිල්පියාට දැඩිව අවවාද කරමින් පෙන්වා දුන්නේ මෙවැනි පහරදීම් සිනමාපට හෝ ටෙලිනාට්‍යවල රංගනයන්ට පමණක් සීමා විය යුතු බවත්, සැබෑ ජීවිතයේදී එවැනි හැසිරීම්වලට නීතියෙන් කිසිදු ඉඩක් නොමැති බවත්ය.
ආරවුලට මුල් වූ සිදුවීම
මෙම සිදුවීමට අදාළ ආරවුල හටගත්තේ පසුගිය ජනවාරි 08 වන දින හැව්ලොක් සිටි සිනමා සංකීර්ණයේදී පැවති 'Faad' සිනමාපටයේ මංගල දැක්මෙන් අනතුරුවය. එහිදී සිනමා විචාරකයෙකු මෙන්ම නිර්මාණ අධ්‍යක්ෂවරයෙකු වන ලක්මිණ රණසිංහට මරණීය තර්ජනය කරමින් සාපරාධී බියගැන්වීමක් සිදුකොට පහර දුන්නේ යැයි හේමාල් රණසිංහට එරෙහිව චෝදනා එල්ල විය.
පසුව පෙබරවාරි 03 වැනිදා වැල්ලවත්ත පොලිසිය මඟින් අත්අඩංගුවට ගත් ඔහුව අධිකරණයට ඉදිරිපත් කිරීමෙන් අනතුරුව ඇප මත මුදාහැරිණි. මුල් අවස්ථාවේදී චෝදනා ප්‍රතික්ෂේප කළ ද, පසුගිය මැයි 14 දින අධිකරණ නියෝගය පරිදි දෙපාර්ශ්වය සමථ මණ්ඩලයට යොමු කෙරුණු අතර එහිදී හේමාල් රණසිංහ අදාළ පහරදීම තමන් අතින් සිදුවූ බවට පූර්ණ වශයෙන් වරද පිළිගත්තේය.
සමථ මණ්ඩලයේ කොන්දේසි හතර
| හේමාල් රණසිංහ විසින් තමන් කළ පහරදීම සම්බන්ධයෙන් වරද පිළිගෙන අගතියට පත් ලක්මිණ රණසිංහගෙන් විවෘතව සමාව ගැනීම.
| අගතියට පත් පාර්ශ්වය වන ලක්මිණ රණසිංහ විසින් එම සමාව භාරගෙන ඔහුට සමාව දීම.
| අගතියට පත් පාර්ශ්වයට මාධ්‍ය මඟින් හෝ සමාජ මාධ්‍ය ජාලා ඔස්සේ කිසිදු ආකාරයක නින්දා අපහාසයක් හෝ අගතියක් සිදු නොකිරීමට එකඟ වීම.
| සිදුවූ වරද වෙනුවෙන් වන්දි වශයෙන් හේමාල් රණසිංහ විසින් ලක්මිණ රණසිංහ වෙත රුපියල් ලක්ෂ පහක (රු. 500,000) මුදලක් ගෙවීමට එකඟ වීම.
වන්දි මුදල අපේක්ෂා රෝහලට
එසේම, කිසිදු පාර්ශ්වයකින් නින්දා අපහාස නොකිරීමට සමථ මණ්ඩලයේදී එකඟ වී තිබියදීත්, හේමාල් රණසිංහගේ සමීපතමයින් සහ ඇතැම් කලා ක්ෂේත්‍රයේ පාර්ශ්ව සමාජ මාධ්‍ය හරහා තවමත් ලක්මිණ රණසිංහට අපහාසාත්මක ප්‍රකාශ පළකරමින් සිටින බව නීතිඥවරයා අධිකරණයට පෙන්වා දුන්නේය. යමෙකුගේ ජනප්‍රියත්වය කෙතරම් ඉහළ වුවද වෘත්තීය විනය සහ භාෂණයේ නිදහසට ගරු කිරීම අත්‍යවශ්‍ය කරුණක් බව එහිදී අවධාරණය කෙරිණි.
දෙපාර්ශ්වයේ එකඟතාව සැලකිල්ලට ගත් මහේස්ත්‍රාත්වරිය, අගතියට පත් පාර්ශ්වයට කිසිදු අයුරකින් තවදුරටත් අපහාසයක් සිදු නොවිය යුතු බවට දැඩිව නියෝග කරමින් නඩුව අවසන් කර හේමාල් රණසිංහ මුදාහැරීමට නියෝග කළාය.
