රාජ්‍යත්වයට වඩා FA කුසලාන තරගාවලියට මුල්තැන දෙමින් 36 හැවිරිදි දැවැන්ත ක්‍රීඩකයා ගත් පෙරළිකාර තීරණය.
එංගලන්තයේ SE Dons පාපන්දු කණ්ඩායමේ නායක හා ගෝල්රකින්නා වන ජෝර්ජ් ඩෙස්මන්ඩ් කමුරාසි ඔහුට ලැබුණු උගන්ඩාවේ ටෝරො රාජධානියේ රාජකීය ඔටුන්න ප්‍රතික්ෂේප කර තිබෙනවා.
එංගලන්ත පාපන්දුවේ නව වැනි ස්තරයේ ක්‍රීඩා කරන 36 හැවිරිදි කමුරාසි ඔහුට ලැබුණු මේ දුර්ලභ අවස්ථාව බැහැර කරමින් උගන්ඩාවේ රාජකීය සිංහාසනයකට වඩා එංගලන්තයේ ගත කරන වර්තමාන ජීවිතය හා පාපන්දු ක්‍රීඩා කිරීම තෝරා ගෙන තිබෙනවා.
කමුරාසි උගන්ඩා ටෝරො රාජධානියේ හිටපු රාජයා වන IV වැනි ඔ්යෝ නයිම්බා කාබම්බා ඊගූරූ රූකීඩීගේ ඥාති සොහොයුරෙක්. ඔ්යෝ රජු 34 වැනි වියේ පසුවෙමින් සිටියදී පිළිකාවකින් අගෝස්තු 27 වැනිදා මිය යාමෙන් පසුව ඔහුගේ අනුප්‍රාප්තිකයා නම් කිරීමේ කාර්යය බාරව සිටින රාජකීය තේරීම් කමිටුවේ පළමු තේරීම වී තිබුණේ කමුරාසි.
කෙසේ වෙතත්, අනෙකුත් පෞද්ගලික කැපවීම් හේතුවෙන් කමුරාසි රජකම ප්‍රතික්ෂේප කළ බව කමිටුව ප්‍රකාශ කර තිබෙනවා. ඔහු එයින් ඉවත් වීමෙන් පසුව එරට ජනප්‍රිය රූපවාහිනී ප්‍රවෘත්ති නිවේදකයෙකු වන එඩ්වර්ඩ් රූකීඩී කීජානාන්ගොමා (Edward Rukidi Kijanangoma) ටෝරො රාජධානියේ නව රජු ලෙස පත් කර තිබෙන්නේ ඔ්යෝ රජ පවුලේ සමහර සාමාජිකයින්ගේ විරුද්ධත්වය මධ්‍යයේයි.
අඩි හයයි අඟල් හයක උස නිසා Big G නමින් හැඳින්වෙන කමුරාසි SE Dons කණ්ඩායමට අත්‍යවශ්‍ය ක්‍රීඩකයෙක්. ඔහුගේ ක්‍රීඩා සමාජය මේ ක්‍රීඩා වාරයේදී ප්‍රථම වතාවට FA කුසලාන තරගාවලියට සහභාගි වෙමින් සිටිනවා. ඔවුන් මෑතකදී Erith Town පිල ගෝල් 2-0කින් පරාජය කරමින් සුදුසුකම් ලැබීමේ දෙවැනි තරග වටයට පිවිසියා. ඔවුන්ගේ මීළඟ තරගය Chichester City කණ්ඩායමට එරෙහිව සැප්තැම්බර් 19 වැනිදාට යෙදී තිබෙනවා. කමුරාසි දැනට ඔහුගේ මුළු අවධානය යොමු කර තිබෙන්නේ ඒ තරගය හා ඔහුගේ කණ්ඩායම කෙරෙහි මිස උගන්ඩාවේ සිහසුනක් ගැන නෙවෙයි.
උගන්ඩාව පාලනය වන්නේ ඡන්දයෙන් තෝරා ගත් රජයක් හා ජනාධිපතිවරයෙක් යටතේ වන බැවින් ටෝරො රාජ්‍යයේ රජුට කෙළින්ම විධායක හෝ පරිපාලනමය බලයක් නැහැ. කෙසේ වෙතත්, ටෝරො රාජාණ්ඩුව ඇතුළු උගන්ඩාවේ සම්ප්‍රදායික රාජකීය පවුල් කිහිපයක් තවමත් අති විශාල සමාජමය හා සංස්කෘතික වැදගත්කමක් රඳවා තබා ගනිමින් සිටිනවා.
(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com
සබැඳි පුවත් :
එංගලන්ත පාපන්දුවේ ආධුනික ගෝල්රකින්නෙක් උගන්ඩාවේ සිංහාසනයට!
