ආණ්ඩුවේ විමර්ශන ප්‍රතිපත්තිය ගැන විමල්ගෙන් ප්‍රශ්න; 2029 ගැන අර්ච්චුනාගෙන් අනාවැකියක්
හිටපු ජනාධිපති මහින්ද රාජපක්ෂ ගේ ප්‍රධානත්වයෙන් ශ්‍රී ලංකා පොදුජන පෙරමුණ සංවිධානය කළ ‘ජන සටන’ ජන රැලිය පසුගිය 12 වැනිදා අනුරාධපුර නගර සභා ක්‍රීඩාංගණයේදී පැවැත්වුණා. වත්මන් පාලනයේ ආර්ථික හා සමාජීය වැඩපිළිවෙළ මෙන්ම දේශපාලන ක්‍රියාකාරීත්වය විවේචනයට ලක්කිරීම සහ ඉදිරි දේශපාලන ගමන්මග ප්‍රකාශයට පත්කිරීම වෙනුවෙන් මෙම රැලිය කැඳවා තිබුණා.
පොදුජන පෙරමුණේ ජාතික සංවිධායක පාර්ලිමේන්තු මන්ත්‍රී නාමල් රාජපක්ෂ නීතිමය ක්‍රියාමාර්ගයක් හේතුවෙන් රක්ෂිත බන්ධනාගාරගතව පසුවන පසුබිමක මෙම රැලිය සංවිධානය වීම විශේෂ දේශපාලන අවධානයකට ලක්ව තිබෙනවා. මෙම වේදිකාවට ශ්‍රී ලංකා පොදුජන පෙරමුණේ නියෝජිතයන්ට අමතරව හිටපු අමාත්‍යවරුන් වන විමල් වීරවංශ, උදය ගම්මන්පිල, ටිරාන් අලස් සහ යාපනය දිස්ත්‍රික් පාර්ලිමේන්තු මන්ත්‍රී වෛද්‍ය රාමනාදන් අර්ච්චුනා ද එක්ව සිටීම දේශපාලන කරළියේ නව සන්ධානගතවීමක් පිළිබඳ සාකච්ඡාවට මගපාදන්නක්.
විමර්ශනවල අපක්ෂපාතීත්වය ගැන විමල්ගෙන් චෝදනා
ජන රැලිය අමතමින් ජාතික නිදහස් පෙරමුණේ නායක විමල් වීරවංශ සඳහන් කළේ, වත්මන් පාලනය දූෂණ මර්දනය සම්බන්ධයෙන් අනුගමනය කරන ක්‍රමවේදය තෝරාගත් පාර්ශ්ව ඉලක්ක කරගනිමින් ක්‍රියාත්මක වන්නක් බවයි. හිටපු යුද හමුදාපතිවරුන් ඇතුළු පාර්ශ්ව විමර්ශනවලට ලක්වෙද්දී ආණ්ඩුවට සමීප හෝ පාලනයට සම්බන්ධ ඇතැම් පුද්ගලයන් පිළිබඳ නිසි සොයාබැලීමක් සිදු නොවන බවට ඔහු චෝදනා කර සිටියා.
අමාත්‍ය කේ.ඩී. ලාල්කාන්ත ඉලක්ක කරමින් අදහස් දැක්වූ විමල් වීරවංශ, එක් එක් පුද්ගලයන් සම්බන්ධයෙන් විමර්ශන ක්‍රියාත්මක වීමේදී ද්විත්ව ප්‍රතිපත්තියක් ක්‍රියාත්මක නොවිය යුතු බව පෙන්වා දුන්නා. එමෙන්ම රජය විසින් අනුගමනය කරන ඇතැම් දේශපාලන තීන්දු පිටුපස විදේශගත බලපෑම් පවතින බවට ද ඔහු සිය කතාවේදී අදහස් පළකළා.
උතුර සහ දකුණ යා කිරීම ගැන අර්ච්චුනාගේ ස්ථාවරය
රැලිය ඇමතූ යාපනය දිස්ත්‍රික් පාර්ලිමේන්තු මන්ත්‍රී වෛද්‍ය රාමනාදන් අර්ච්චුනා අවධාරණය කළේ, උතුරේ සහ දකුණේ ජනතාව අතර දේශපාලනික සහ සහජීවන පාලමක් ගොඩනැගීමට තමන් ඉදිරිපත් වන බවයි. රටේ අනාගත නායකත්වය සහ ඉදිරි මැතිවරණ සම්බන්ධයෙන් සිය අනාවැකිය පළකළ මන්ත්‍රීවරයා, 2029 ජනාධිපතිවරණයේදී නාමල් රාජපක්ෂ රටේ ප්‍රධාන නායකත්වයට පත්වීම වැළැක්විය නොහැකි බව සඳහන් කළා.
වත්මන් රජය යටතේ තමන්ට විවිධ නීතිමය අභියෝගයන්ට මුහුණදීමට සිදුව ඇති බව පැවසූ මන්ත්‍රීවරයා, පවතින පාලන ක්‍රමවේදය වෙනුවට විකල්ප දේශපාලන ක්‍රියාවලියකට ශක්තිය ලබාදීමට තමන් සූදානම් බව ප්‍රකාශ කර සිටියා.
නව විපක්ෂ සන්ධානයක පෙරනිමිති
දේශපාලන විචාරකයන් පෙන්වා දෙන්නේ, මෑත කාලයේදී විවිධ මත දැරූ විපක්ෂයේ පාර්ශ්ව කිහිපයක් මෙලෙස පොදුජන පෙරමුණේ ප්‍රධාන වේදිකාවකට එක්වීම තුළින් ආණ්ඩුවට එරෙහි පුළුල් පෙරමුණක් ගොඩනැගීමේ මූලික අඩිතාලම වැටී ඇති බවයි.
විශේෂයෙන්ම ජාතිකවාදී ප්‍රවාහයේ නායකයන් මෙන්ම උතුර නියෝජනය කරන මන්ත්‍රීවරුන් එකම වේදිකාවක අදහස් දැක්වීම, ඉදිරි දේශපාලන සමතුලිතතාවය සහ මැතිවරණ සැලසුම් කෙරෙහි සැලකිය යුතු බලපෑමක් එල්ල කළ හැකි සාධකයක් ලෙස නිරීක්ෂණය කෙරෙනවා.
