එයාර්බස් අල්ලස් දැලට නාමල් පැටලෙයි !: එස්.එෆ්.ඕ. වාර්තා සහ සිංගප්පූරු මුදල් මාවත හෙළිවේ !

විදේශ ගිණුම් හරහා සිදුවූ මුදල් හුවමාරුව සහ චෝදනා නීතිඥයින් තරයේ ප්‍රතික්ෂේප කරයි


ශ්‍රීලන්කන් ගුවන් සමාගම වෙනුවෙන් 2013 වසරේදී එයාර්බස් ගුවන් යානා 10ක් මිලදී ගැනීමේ ක්‍රියාවලියට අදාළව යුරෝපයේ ‘එයාර්බස්’ (Airbus) සමාගම සෘජුවම සම්බන්ධ කරගනිමින් කටයුතු කළ බව කියන සිද්ධියක් මුල්කරගනිමින් පාර්ලිමේන්තු මන්ත්‍රී නාමල් රාජපක්ෂ වෙත එල්ල වී ඇති චෝදනා සම්බන්ධයෙන් මේ වන විට පුළුල් විමර්ශනයක් අධිකරණය හමුවේ දිගහැරෙමින් පවතී. එවකට ජනාධිපති මහින්ද රාජපක්ෂ ගේ පුත්‍රයකු වන නාමල් රාජපක්ෂ, අදාළ සමාගමේ නියෝජිතයන් සමග ඍජුව අදහස් හුවමාරු කරගත් බවට තහවුරු කෙරෙන ලේඛනමය සාක්ෂි යුරෝපා එයාර්බස් සමාගම විසින්ම මෙරට විමර්ශන නිලධාරීන්ට භාරදී ඇතැයි රජයේ අභිචෝදකයෝ කොළඹ ප්‍රධාන මහේස්ත්‍රාත් අධිකරණයට දැනුම් දුන්හ.

මේ සම්බන්ධයෙන් වූ විශේෂ අනාවරණයක් 'සන්ඩේ ටයිම්ස්' පුවත්පතේ අද පලවී ඇත.

කැබිනට් පත්‍රිකාව සහ හම්බන්තොට පුහුණු මධ්‍යස්ථානය

පොලිස් විමර්ශන වාර්තාවලට අනුව, 2013 මාර්තු 23 දිනැති ඊමේල් පණිවිඩයක් මගින් අනාවරණය වන්නේ "ජනාධිපතිවරයාගේ පුත්‍රයා" විසින් අදාළ ගුවන් යානා මිලදී ගැනීමේ යෝජනාව ජනාධිපතිවරයා මාර්ගයෙන් අමාත්‍ය මණ්ඩලයට ඉදිරිපත් කිරීමට එකඟතාව පළකර තිබූ බවයි. ඊට සමගාමීව, 2013 මාර්තු 27 වන දින එවකට සිවිල් ගුවන් සේවා අමාත්‍ය ප්‍රියංකර ජයරත්න විසින් අදාළ මිලදී ගැනීමට අනුමැතිය ඉල්ලා කැබිනට් පත්‍රිකාවක් යොමු කර තිබිණි. එහෙත්, අප්‍රේල් 13 වන දින එවකට මුදල් අමාත්‍යවරයා ලෙස කටයුතු කළ ජනාධිපතිවරයා කැබිනට් මණ්ඩලයට දැනුම් දී ඇත්තේ සමාගම් පනත යටතේ ලියාපදිංචි වී ඇති ස්වාධීන අධ්‍යක්ෂ මණ්ඩලයක් සහිත ශ්‍රීලන්කන් සමාගමේ මෙහෙයුම් සඳහා කැබිනට් අනුමැතිය අවශ්‍ය නොවන බවයි.

එමෙන්ම මෙරටට පැමිණි එයාර්බස් නියෝජිත පිරිස් හමුවී සාකච්ඡා කළ නාමල් රාජපක්ෂ මන්ත්‍රීවරයා, මෙවැනි මහා පරිමාණ ගුවන් යානා ඇණවුමකදී හිමිවන ගුවන් නියමු පුහුණු මධ්‍යස්ථානය තම ඡන්ද බලප්‍රදේශය වූ හම්බන්තොට ස්ථාපිත කරන ලෙස ඉල්ලා සිටි බවද ඊමේල් සාක්ෂි මගින් අනාවරණය වී ඇතැයි පැමිණිල්ල අධිකරණය හමුවේ කියා සිටියේය.

සිංගප්පූරු ගිණුම් ජාලය සහ රුපියල් කෝටි 10 කතාව

මෙම ගනුදෙනුවට අදාළව රුපියල් මිලියන 100ක (කෝටි 10ක) අල්ලස් මුදලක් ලබාගැනීමේ චෝදනාව මත අල්ලස් හෝ දූෂණ විමර්ශන කොමිසම (CIABOC) විසින් නාමල් රාජපක්ෂ සැප්තැම්බර් 4 වන දින අත්අඩංගුවට ගෙන රක්ෂිත බන්ධනාගාරගත කරනු ලැබීය.

මේ අතර, ව්‍යාපාරික නිමල් පෙරේරා විසින් අධිකරණයට දිවුරුම් ප්‍රකාශයක් ලබා දෙමින් පවසා ඇත්තේ තමන්ට එයාර්බස් හෝ ශ්‍රීලන්කන් ගුවන් සමාගම සමග කිසිදු සබඳතාවක් නොමැති බවයි. එහෙත්, නාමල් රාජපක්ෂ විදේශීය උපදේශන සේවාවකින් ලැබෙන මුදලක් තැන්පත් කිරීමට විදේශ බැංකු ගිණුමක් ඉල්ලා සිටි බැවින්, තමන්ට අයත් සිංගප්පූරුවේ ‘සේබර් විෂන්’ (Sabre Vision) ගිණුම් අංකය ලබාදුන් බව ඔහු සඳහන් කරයි. බෲනායි රාජ්‍යයේ ලියාපදිංචි ‘බිස් සොලියුෂන්ස්’ (Biz Solutions) නමැති සමාගමකින් 2014 අගභාගයේදී ඩොලර් 800,000ක මුදලක් එම ගිණුමට බැරවූ බවත්, පසුව එම මුදල් මෙරටදී මුදලින් ආපසු ලබාගෙන රුපියල් මිලියන 100ක් නාමල් රාජපක්ෂ ට භාරදුන් බවත් ඔහු දිවුරුම් ප්‍රකාශය මගින් පවසා තිබේ.

කෙසේ වෙතත්, නාමල් රාජපක්ෂ මෙම චෝදනාව තරයේ ප්‍රතික්ෂේප කරන අතර, තමන් කිසිදු මුදලක් අතින් ලබානොගත් බවත්, එවැනි මුදල් ගනුදෙනුවක් සනාථ කිරීමට කිසිදු භෞතික හෝ විද්‍යාත්මක සාක්ෂියක් නොමැති බවත් ඔහුගේ නීතිඥ මණ්ඩලය අධිකරණය හමුවේ තර්ක කළේය. සාක්ෂිකරුගේ විශ්වාසනීයත්වය පිළිබඳවද ඔවුහු දැඩි ලෙස ප්‍රශ්න කර සිටිති.

ජාත්‍යන්තර එස්.එෆ්.ඕ. පරීක්ෂණ සහ දේශීය නඩු පැවරීම්

‘බිස් සොලියුෂන්ස්’ ආයතනය ශ්‍රීලන්කන් ගුවන් සමාගමේ හිටපු ප්‍රධාන විධායක නිලධාරී කපිල චන්ද්‍රසේනගේ බිරිඳ වන ප්‍රියංකා නියෝමාලි විජේනායක ගේ නමින් පවත්වාගෙන ගිය සමාගමක් බව විමර්ශනවලදී හෙළිව ඇත. මෙම ගිණුමට එයාර්බස් සමාගම විසින් යුරෝ මිලියන 1.45කට අධික මුදලක් අල්ලස් ලෙස ලබාදී ඇති බවට බ්‍රිතාන්‍ය බරපතළ වංචා විමර්ශන කාර්යාලය (UK Serious Fraud Office - SFO) සිදුකළ විමර්ශන මගින් අනාවරණය වී තිබිණි. එයාර්බස් සමාගම 2020 දී බ්‍රිතාන්‍ය, ප්‍රංශ සහ ඇමෙරිකානු බලධාරීන් සමග නඩු පැවරීම අත්හිටුවීමේ එකඟතාවකට (DPA) එළඹෙමින් විමර්ශන සඳහා පූර්ණ සහාය දීමට බැඳී සිටියි.

අල්ලස් කොමිසමට අමතරව, අපරාධ පරීක්ෂණ දෙපාර්තමේන්තුව (CID) විසින් මුදල් විශුද්ධිකරණ පනත යටතේ කොළඹ කොටුව මහේස්ත්‍රාත් අධිකරණයේ පවරා ඇති නඩුවටද නාමල් රාජපක්ෂ සැකකරුවකු ලෙස නම් කිරීමට නීතිපති දෙපාර්තමේන්තුව උපදෙස් දී තිබේ. නව දූෂණ විරෝධී පනත යටතේ CIDය සහ CIABOC ආයතනය ඒකාබද්ධව තොරතුරු හුවමාරු කරගනිමින් මෙම විමර්ශන ඉදිරියට ගෙන යන අතර, ඉදිරි අධිකරණ සැසිවාරයේදී මෙම සාක්ෂි සම්පිණ්ඩනය තීරණාත්මක හැරවුම් ලක්ෂ්‍යයක් වනු ඇත.


වැඩිදුර කියවීම සඳහා මුලාශ්‍ර :

Sunday Times: Airbus evidence links Namal Rajapaksa to $100mn bribe probe

The Leader | තවත් එයාර් බස් අබිරහසක් - ඩොලර් මිලියන 48ක් කොහෙද ගියේ? | Sandeshaya by Saroj විශේෂ අනාවරණයක් 

The Leader: එයාර් බස් ගනුදෙනුවේ මුල් නඩුවටත් නාමල්ගේ නම එක්වෙයි

The Leader: Sri Lankan Airline සම්පූර්ණ වංචාව මෙන්න

The Leader: කෝටි ගණන් මුදල් ගලාගිය අදිසි මාවත් සහ ‘මැද සිටි මිනිසාගේ’ භූමිකාව