පාතාලයට හා දූෂණයට එරෙහි නීතිය ක්‍රියාත්මක වීමේදී තරාතිරම අදාළ නෑ
රට තුළ ක්‍රියාත්මක වන්නේ ජනතාව විසින් නිර්මාණය කළ ආණ්ඩුවක් බැවින් ඊට කිසිදු දේශපාලන තර්ජනයක් එල්ල වී නොමැති බවත්, ආණ්ඩුවේ එකම ඉලක්කය වන්නේ ජනතාවද ඒකාබද්ධ කරගනිමින් රට ආර්ථික හා සමාජීය වශයෙන් ගොඩනැගීම බවත් ජනාධිපති අනුර කුමාර දිසානායක ප්‍රකාශ කළේය.
ජනාධිපතිවරයා එම කාරණය අවධාරණය කර සිටියේ, අද (13) පස්වරුවේ කහටගස්දිගිලිය නගරයේ පැවති දැවැන්ත ජන හමුව අමතමිනි. ලෝකයේ කිසිදු දියුණු රටක් ආණ්ඩුවේ මැදිහත්වීමෙන් පමණක් ගොඩනැගී නොමැති බව පෙන්වා දුන් ජනාධිපතිවරයා , ඒ සඳහා ආණ්ඩුව මෙහෙයවීමට සමගාමීව පුළුල් මහජන ව්‍යාපාරයක් රට තුළ නිර්මාණය විය යුතු බව අවධාරණය කළේය.
දේශපාලන සංස්කෘතියේ වෙනස සහ ජනතා අපේක්ෂා
පසුගිය කාලය පුරා පැවති පවුල් කේන්ද්‍රීය සහ ප්‍රභූ දේශපාලන රටාව බිඳවැටී අද වන විට මහජන නියෝජිතයන් සම්බන්ධයෙන් නව පරිච්ඡේදයක් ආරම්භ වී ඇති බව මෙහිදී ප්‍රකාශ විය. මන්ත්‍රීවරුන්ගේ විශ්‍රාම වැටුප් අහෝසි කිරීම, අමාත්‍යවරුන් වෙනුවෙන් නඩත්තු වූ වරප්‍රසාද සීමා කිරීම සහ පොලීසිය හා හමුදාව දේශපාලනඥයන්ගේ ආරක්ෂාව වෙනුවට පොදු ජන ආරක්ෂාව සඳහා යෙදවීම හරහා දේශපාලනඥයා සහ මහජනතාව අතර පැවති පරතරය ඉවත් කර ඇති බව ජනාධිපතිවරයා පෙන්වා දුන්නේය.
"එදා දේශපාලකයන්ට නිලධාරීන් මෙන්ම ජනතාව බියෙන් පසුවුණා. අද දේශපාලකයා ප්‍රශ්න කළ හැකි විවෘත පරිසරයක් නිර්මාණය වී තිබෙනවා. පැරණි ගතානුගතික මාර්ගයෙන් බැහැරව අලුත් දේශපාලන මාවතකට පිවිසීමට රට තීන්දු කළේ ඒ නිසයි" යනුවෙන් ද ජනාධිපතිවරයා පැවසීය.
දූෂණ විරෝධී යාන්ත්‍රණය සහ නීතියේ ආධිපත්‍යය
මහජන මුදල් අවභාවිතය සහ දූෂණ චෝදනා සම්බන්ධයෙන් අදහස් දැක්වූ ජනාධිපතිවරයා, වංචනිකයන් නීතිය හමුවට පැමිණවීමේදී කිසිදු සීමාවක් නොමැති බව අවධාරණය කළේය. අපරාධ පරීක්ෂණ දෙපාර්තමේන්තුව (CID), අල්ලස් හෝ දූෂණ විමර්ශන කොමිෂන් සභාව (CIABOC), නීතිපති දෙපාර්තමේන්තුව සහ අධිකරණ පද්ධතිය කිසිදු දේශපාලන ඇඟිලි ගැසීමකින් තොරව ස්වාධීනව ක්‍රියාත්මක වන පරිදි ශක්තිමත් කර ඇති බව හෙතෙම සඳහන් කළේය.
තමන් ජනාධිපතිවරයා ලෙස දූෂණ විමර්ශන හමුවේ නීතියේ දෑස් බැඳි ප්‍රතිපත්තියක සිටින බවත්, සැකකරුවන්ගේ තරාතිරම හෝ පවුල් සබඳතා අදාළ නොවන බවත් සඳහන් කළ ජනාධිපතිවරයා, සාක්ෂි සහ ගොනු මත පදනම්ව නීතිය ක්‍රියාත්මක කිරීම අධිකරණයට භාර කාර්යයක් බව කියා සිටියේය.
පාතාලය, මත්ද්‍රව්‍ය සහ මූල්‍ය අපරාධ මර්දනය
මත්ද්‍රව්‍ය ජාවාරම් සහ සංවිධානාත්මක අපරාධ මැඩපැවැත්වීම සඳහා ජාත්‍යන්තර සහයෝගීතාවයෙන් යුතුව පුළුල් මෙහෙයුම් ක්‍රියාත්මක වන බව මෙහිදී අනාවරණය විය. විදේශයන්හි සැඟව සිටි අපරාධකරුවන් රැසක් මෙරටට ගෙන්වා නීතිය හමුවට පමුණුවා ඇති බවත්, මෙරටින් නීතිවිරෝධී ලෙස විදේශගත කෙරුණු විශාල මූල්‍ය වත්කම් (රුපියල් කෝටි 30,000කට ආසන්න වටිනාකමකින් යුත් ඩොලර්) සම්බන්ධයෙන් විමර්ශන ප්‍රගතියක් අත්කරගෙන ඇති බවත් සඳහන් විය. මෙවැනි දැඩි නීතිමය ක්‍රියාමාර්ග හමුවේ පීඩාවට පත්ව සිටින කණ්ඩායම් ආණ්ඩුව කෙරෙහි විරෝධය පළකිරීම ස්වාභාවික තත්ත්වයක් බවද හෙතෙම පෙන්වා දුන්නේය.
ගොවි ජනතාව සහ සංවර්ධන ව්‍යාපෘති
රජයේ මූල්‍ය ස්ථාවරත්වය තහවුරු වෙමින් පවතින පසුබිමක උතුරු මැද පළාත ඇතුළු කෘෂිකාර්මික ප්‍රජාව වෙනුවෙන් ක්‍රියාත්මක කෙරෙන සංවර්ධන වැඩසටහන් කිහිපයක් ද මෙහිදී සිහිපත් කෙරිණි. රුපියල් කෝටි 5,000කට අධික කැබිතිගොල්ලෑව ජල ව්‍යාපෘතිය, රුපියල් කෝටි 4,700ක පමණ වියදමින් ඇරඹෙන පහළ මල්වතු ඔය ජලාශ ව්‍යාපෘතිය මෙන්ම වී මිලදී ගැනීම වෙනුවෙන් රුපියල් මිලියන 18,500ක් වෙන් කිරීම ඇතුළු පියවර ඊට ඇතුළත් වේ.
එමෙන්ම දිගුකාලීන ගැටලුවක් වන මිනිස්-අලි ගැටුම පාලනය කිරීම වෙනුවෙන් වනජීවී දෙපාර්තමේන්තුවට නව සහයකයින් සහ නිලධාරීන් බඳවා ගැනීම, සිවිල් ආරක්ෂක බලකා නිලධාරීන් අනුයුක්ත කිරීම සහ ප්‍රාදේශීය මට්ටමින් ජනතා කමිටු පිහිටුවා අලිවැට නඩත්තු කිරීමේ වැඩපිළිවෙළ දියත් කර ඇති බව ජනාධිපතිවරයා වැඩිදුරටත් කියා සිටියේය.
