සුවය ලැබූ පසු පරීක්ෂණ CIDයට: සලේගේ රැඳවුම් නියෝග ගැන තීරණය ඉදිරියට
හිටපු රාජ්‍ය බුද්ධි ප්‍රධානී මේජර් ජෙනරාල් සුරේෂ් සලේ තවදුරටත් රෝහල්ගතව ප්‍රතිකාර ලැබිය යුතුද යන්න තක්සේරු කිරීමට විශේෂ වෛද්‍ය කණ්ඩායමක් පත් කර ඇති බවත්, විමර්ශන සඳහා කාලය ප්‍රමාණවත් නොවුවහොත් ඔහුගේ රැඳවුම් කාලය දීර්ඝ කිරීමට පියවර ගන්නා බවත් සෞඛ්‍ය හා ජනමාධ්‍ය අමාත්‍ය, කැබිනට් මාධ්‍ය ප්‍රකාශක වෛද්‍ය නලින්ද ජයතිස්ස පවසයි.
කැබිනට් තීරණ දැනුම්දීමේ මාධ්‍ය හමුවේදී අදහස් දක්වමින් අමාත්‍යවරයා සඳහන් කළේ, සැකකරුවෙකු රෝහල්ගතව ප්‍රතිකාර ලබන කාලසීමාව තුළ අපරාධ පරීක්ෂණ දෙපාර්තමේන්තුවට නියමිත පරිදි ප්‍රශ්න කිරීම් හෝ විමර්ශන කටයුතු සිදු කිරීමට ප්‍රායෝගික හැකියාවක් නොමැති බවයි.
සෞඛ්‍ය තත්ත්වය සහ වෛද්‍ය වාර්තා
සුරේෂ් සලේගේ වර්තමාන සෞඛ්‍ය තත්ත්වය සම්බන්ධයෙන් අදහස් දැක්වූ අමාත්‍යවරයා, මේ වනවිට ඔහුගේ සෞඛ්‍යයේ කිසිදු අයහපත් හෝ අවදානම් ස්වරූපයක් නිරීක්ෂණය නොවන බව පෙන්වා දුන්නේය.
"ඔහු සඳහන් කළ රෝගී තත්ත්වයන් මෙන්ම පරීක්ෂණවලදී හඳුනාගත් අනෙකුත් සෞඛ්‍ය තත්ත්වයන් කෙරෙහිද අවධානය යොමු කර අවශ්‍ය සියලුම ප්‍රතිකාර ලබාදී තිබෙනවා. රෝහල් ප්‍රතිකාර හැමදාම ලබාදීමට අවශ්‍ය වන්නේ නැහැ. වෛද්‍ය වාර්තා මඟින් ඔහුගේ සෞඛ්‍ය තත්ත්වය යහපත් බව තහවුරු වී රෝහලෙන් මුදාහළ වහාම, නියමිත විමර්ශන කටයුතු අපරාධ පරීක්ෂණ දෙපාර්තමේන්තුව තුළදීම ක්‍රියාත්මක වෙනවා," යැයි අමාත්‍යවරයා පැහැදිලි කළේය.
රැඳවුම් කාලසීමාව දීර්ඝ කිරීමේ හැකියාව
"ඔහු සඳහන් කළ රෝගී තත්ත්වයන් මෙන්ම පරීක්ෂණවලදී හඳුනාගත් අනෙකුත් සෞඛ්‍ය තත්ත්වයන් කෙරෙහිද අවධානය යොමු කර අවශ්‍ය සියලුම ප්‍රතිකාර ලබාදී තිබෙනවා. රෝහල් ප්‍රතිකාර හැමදාම ලබාදීමට අවශ්‍ය වන්නේ නැහැ. වෛද්‍ය වාර්තා මඟින් ඔහුගේ සෞඛ්‍ය තත්ත්වය යහපත් බව තහවුරු වී රෝහලෙන් මුදාහළ වහාම, නියමිත විමර්ශන කටයුතු අපරාධ පරීක්ෂණ දෙපාර්තමේන්තුව තුළදීම ක්‍රියාත්මක වෙනවා," යැයි අමාත්‍යවරයා පැහැදිලි කළේය.
රැඳවුම් කාලසීමාව දීර්ඝ කිරීමේ හැකියාව
ත්‍රස්තවාදය වැළැක්වීමේ තාවකාලික විධිවිධාන පනත යටතේ රඳවාගෙන සිටින සැකකරුවෙකුගෙන් ප්‍රකාශ සටහන් කරගැනීමට සහ සාක්ෂි විමර්ශනයට රෝහල්ගතව සිටීම බාධාවක් වී ඇත්නම්, ඒ පිළිබඳව නීතිමය රාමුව තුළ පියවර ගන්නා බව කැබිනට් ප්‍රකාශකවරයා සඳහන් කළේය.
විශේෂයෙන්ම, රෝහල්ගතව ගතකළ කාලය හේතුවෙන් අපරාධ පරීක්ෂණ දෙපාර්තමේන්තුවට පරීක්ෂණ කටයුතු සම්පූර්ණ කිරීමට ලබාදී ඇති කාලය මදි වුවහොත්, රැඳවුම් නියෝග තවදුරටත් දීර්ඝ කරගැනීමට නීතිමය ප්‍රතිපාදන පවතින බවද ඔහු අවධාරණය කළේය.
අධිකරණ නියෝගය සහ ඉදිරි ක්‍රියාමාර්ග
මේ අතර, සුරේෂ් සලේ තවදුරටත් කොළඹ ජාතික රෝහලේ රඳවාගෙන නේවාසිකව ප්‍රතිකාර ලබාදිය යුතු මට්ටමක පසුවන්නේද යන්න පිළිබඳව නිශ්චිත වාර්තාවක් ඉදිරිපත් කරන ලෙස අධිකරණය විසින්ද ජාතික රෝහලේ අධ්‍යක්ෂවරයා වෙත මීට පෙර නියෝග කර තිබුණි.
පාස්කු ඉරිදා ත්‍රස්ත ප්‍රහාරය සම්බන්ධ විමර්ශනවලට අදාළව සහ බුද්ධි අංශ ක්‍රියාකාරකම් සම්බන්ධ විමර්ශන කිහිපයක ප්‍රශ්න කිරීම් සඳහා හිටපු බුද්ධි ප්‍රධානියා අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන රැඳවුම් නියෝග මත තබාගැනීමට කටයුතු කෙරිණි. රෝහල් බලධාරීන්ගේ වෛද්‍ය නිගමනය සහ අධිකරණයට ඉදිරිපත් කෙරෙන වෛද්‍ය වාර්තාව මත පදනම්ව ඉදිරි විමර්ශන කටයුතු මෙහෙයවීමට පරීක්ෂණ කණ්ඩායම් සූදානමින් සිටී.
