*ක්ෂමාදාන ප්‍රයත්නය හමුවේ සමාජ මාධ්‍ය හරහා ප්‍රකෝපකාරී අදහස් පළ නොකරන ලෙස සුමන්තිරන්ගෙන් විශේෂ ඉල්ලීමක්.
සවුදි අරාබියේදී මරණ දඬුවම නියම වී සිටින 26 හැවිරිදි ශ්‍රී ලාංකික තරුණයකු වන ශිවරාසා අනෝජන් මුදාගැනීම සහ ඔහුට රාජකීය ක්ෂමාදානය ලබාගැනීම වෙනුවෙන් රජය මෙන්ම මෙරට සියලුම ප්‍රජාවන් නියෝජනය කරන නායකයන් මේ වන විට පුළුල් රාජ්‍යතාන්ත්‍රික සහ මානුෂීය ප්‍රයත්නයක නිරතව සිටිති.
නැගෙනහිර පළාතේ කල්මුණේ, නාර්පිට්ටිමුනෙයි ප්‍රදේශයේ පදිංචිකරුවකු වන අනෝජන්ට එරෙහිව සමාජ මාධ්‍ය සටහනක් පදනම් කරගනිමින් මුලින් වසර පහක සිරදඬුවමක් නියම වූ අතර, පසුව සවුදි නීතිපති අංශ විසින් සිදුකරන ලද නීතිමය ක්‍රියාමාර්ග හමුවේ එම දඬුවම මරණ දඬුවම දක්වා ඉහළ නංවා ඇති බවට තොරතුරු වාර්තා විය. මෙම තත්ත්වය හමුවේ මෙරට විදේශ කටයුතු අමාත්‍යාංශය, තානාපති කාර්යාලය සහ රජයේ ඉහළ පෙළේ නියෝජිතයන් මේ වන විටත් සවුදි බලධාරීන් සමඟ සෘජු සංවාදයක නිරතව සිටී.
ජනාධිපතිවරයා සමඟ හදිසි සාකච්ඡාවකට ITAK සූදානම්
මේ අතර, අනෝජන් වෙනුවෙන් ක්ෂමාදානය සහ නිදහස තහවුරු කරගැනීම සඳහා පවතින රාජ්‍යතාන්ත්‍රික මාවත් තවදුරටත් පුළුල් කිරීමේ අරමුණින් ජනාධිපති අනුර කුමාර දිසානායක සමඟ හදිසි සාකච්ඡාවක් ලබාදෙන ලෙස ඉලංගෙයි තමිළ් අරසු කච්චි (ITAK) පක්ෂය ලිඛිත ඉල්ලීමක් කර තිබේ.
පක්ෂ සභාපති සී.වී.කේ. සිවඥානම් සහ ප්‍රධාන ලේකම් එම්.ඒ. සුමන්තිරන් ගේ අත්සනින් යුතුව යොමු කර ඇති එම ලිපිය මඟින් පෙන්වා දෙන්නේ, රජය දැනට ක්‍රියාත්මක කර ඇති කොන්සියුලර් හා රාජ්‍යතාන්ත්‍රික ක්‍රියාමාර්ගවලට අමතරව තවත් ප්‍රායෝගික පියවර කිහිපයක් පිළිබඳව ජනාධිපතිවරයා දැනුවත් කිරීමට අපේක්ෂා කරන බවයි. විශේෂයෙන්ම සවුදි රාජ්‍යය සමඟ සමීප සබඳතා පවත්වන මිත්‍ර රටවල රාජ්‍යතාන්ත්‍රික සහාය ලබාගැනීම සහ විදෙස්ගත ශ්‍රී ලාංකික ප්‍රජාවන් හරහා ජාත්‍යන්තර මානුෂීය මැදිහත්වීම් සම්බන්ධීකරණය කිරීම පිළිබඳ යෝජනා රැසක් එහි අන්තර්ගතය.
එසේම, විදේශ කටයුතු අමාත්‍යවරයා විසින් පාර්ලිමේන්තුවේදී නිවේදනය කරන ලද සවුදි අරාබිය බලා පිටත්වීමට නියමිත විශේෂ නියෝජිත කණ්ඩායම සඳහා ITAK පක්ෂය නියෝජනය කරමින් අම්පාර දිස්ත්‍රික් පාර්ලිමේන්තු මන්ත්‍රී කවින්ද්‍රන් කෝඩීස්වරන් නම් කර ඇති බවද පාර්ලිමේන්තු මන්ත්‍රී ශානක්කියන් රාසමානික්කම් තහවුරු කරයි.
මුස්ලිම් නායකයන්ගේ කාර්යභාරය සහ සුමන්තිරන්ගේ විනයානුකූල ඉල්ලීම
මෙම මානුෂීය මෙහෙයුමේදී මෙරට මුස්ලිම් දේශපාලන නායකයන් මෙන්ම ආගමික නායකයන්ද පෙරමුණ ගෙන සවුදි බලධාරීන් සහ සවුදි රජු වෙත කරුණු ඉදිරිපත් කිරීමට ස්වේච්ඡාවෙන්ම කටයුතු කරමින් සිටීම කැපී පෙනෙන තත්ත්වයකි.
කෙසේ වෙතත්, මෙම ක්‍රියාවලිය සිදුවෙමින් පවතින අතරතුර ඇතැම් පාර්ශ්ව සමාජ මාධ්‍ය ඔස්සේ ප්‍රකෝපකාරී අදහස් පළකරමින් මෙම සහජීවනය බිඳදැමීමට උත්සාහ කරන බවට ජනාධිපති නීතිඥ එම්.ඒ. සුමන්තිරන් පෙන්වා දෙයි. සිය සමාජ මාධ්‍ය ගිණුම ඔස්සේ විශේෂ සටහනක් තබමින් ඔහු අවධාරණය කරන්නේ, අනෝජන් වෙනුවෙන් ක්ෂමාදානය ඉල්ලා සිටීම හැරෙන්නට කිසිදු ආවේගශීලී හෝ වාර්ගික අදහස් හුවමාරු කරගැනීමෙන් වැළකී සිටීම තරුණයාගේ ජීවිතය බේරාගැනීමට අත්‍යවශ්‍ය වන බවයි.
රාජ්‍යතාන්ත්‍රික හා සංවේදී මට්ටමින් විසඳාගත යුතු මෙවැනි ගැටලුවකදී ප්‍රසිද්ධ ප්‍රකාශ මඟින් අනවශ්‍ය අර්බුද නිර්මාණය නොකර, සියලු පාර්ශ්ව එක්ව මානුෂීය පදනමකින් සහ ආගමික යැදුම් පෙරදැරිව කටයුතු කිරීමේ වැදගත්කම නායකයන්ගේ පොදු ස්ථාවරය වී තිබේ.
