NDB රු. බිලියන 13.6ක අක්‍රමිකතාව: අදාළ EY විගණකවරුන්ට බැංකු තහනමක්

වසර තුනක් පුරා අනාවරණය නොවී පැවති රුපියල් බිලියන 13.6ක දැවැන්ත මූල්‍ය අක්‍රමිකතාවක් සම්බන්ධයෙන් ජාතික සංවර්ධන බැංකුවට (NDB) සහ එහි විගණන කටයුතු මෙහෙයවූ Ernst & Young හි (EY) හවුල්කාර විගණකවරුන් වෙත දැඩි නියාමන පියවර ගෙන තිබේ.

පාර්ලිමේන්තු මන්ත්‍රී ආචාර්ය හර්ෂ ද සිල්වාගේ ප්‍රධානත්වයෙන් රැස්වූ රජයේ මුදල් පිළිබඳ කාරක සභාව (CoPF) හමුවේ සාක්ෂි දෙමින් මහ බැංකු අධිපති ආචාර්ය නන්දලාල් වීරසිංහ ඇතුළු නිලධාරීන් මේ බව තහවුරු කළේය.

වසර තුනක හිඩැස සහ මහ බැංකු තීරණය

NDB බැංකුවේ 2025 මූල්‍ය වාර්තා සහතික කිරීමෙන් පසුව පමණක් මෙම මූල්‍ය හිඩැස හෙළිදරව් වී ඇති බව කාරක සභාවේදී ප්‍රකාශ විය. බැංකුවේ එදිනෙදා ගනුදෙනු තුලනය කරන තාවකාලික ගිණුම්වල (suspense accounts) තිබූ මෙම පරතරය වසර තුනක් තිස්සේ විගණකවරුන්ට හසු නොවී පැවතීම බලධාරීන්ගේ දැඩි අවධානයට ලක්ව ඇත.

මේ හේතුවෙන් NDB බැංකුවේ අදාළ විගණනය භාරව කටයුතු කළ Ernst & Young හි හවුල්කාර විගණකවරුන්ට (Audit Partners) මෙරට කිසිදු වාණිජ බැංකුවක විගණන කටයුතු සිදු කිරීම ශ්‍රී ලංකා මහ බැංකුව විසින් වහාම ක්‍රියාත්මක වන පරිදි අත්හිටුවා තිබේ.

තැන්පත්කරුවන්ගේ ආරක්ෂාව සහ පැනවූ කොන්දේසි

මහජන තැන්පතුවලට හෝ බැංකුවේ පැවැත්මට මෙයින් හානියක් නොවන බවට මහ බැංකුව සහතික වී ඇති අතර, අප්‍රේල් මාසයේ සිටම NDB බැංකුව වෙත දැඩි මෙහෙයුම් කොන්දේසි පනවා ඇත.

කොටස් හිමියන්ට ලාභාංශ බෙදාහැරීම සහ ඉහළ කළමනාකාරීත්වයේ අභිමත දීමනා ගෙවීම සීමා කිරීමට පියවර ගෙන තිබේ. ඊට අමතරව බැංකු අධ්‍යක්ෂ මණ්ඩලයේ විගණන කමිටුව වහාම විසුරුවා හැර අලුතින් ප්‍රතිසංවිධානය කිරීමට ද මහ බැංකුව නියෝග කළේය.

නීතිපති විමර්ශන සහ Deloitte වාර්තාවේ ප්‍රශ්න

EY හවුල්කාරීත්වයේ විගණන ප්‍රමිතීන් පිළිබඳව මහ බැංකුව සකස් කළ විමර්ශන වාර්තාව ඔක්තෝබර් 15 වනදා සිට නීතිපතිවරයා වෙත යොමු කර ඇති අතර, ඉදිරි නීතිමය ක්‍රියාමාර්ග ඒ අනුව තීරණය වනු ඇත.

මේ අතර සිද්ධියේ සුලමුල සෙවීමට Deloitte ආයතනය මගින් සිදුකරන ලද ස්වාධීන විමර්ශන වාර්තාවේ (Forensic Audit) විෂය පථය සහ එහි විනිවිදභාවය පිළිබඳව කාරක සභා සභාපති ආචාර්ය හර්ෂ ද සිල්වා ප්‍රශ්න කළේය. මූල්‍ය පද්ධතිය කෙරෙහි මහජන විශ්වාසය තහවුරු වීමට නම් මෙවැනි කරුණු සම්පූර්ණයෙන්ම විවෘත විය යුතු බව ඔහු පෙන්වා දුන්නේය.