අම්පයර් මුළා කළ ‘ක්ලිකී පොන්ටිං’ ට දෙවසරක ක්‍රීඩා තහනමක්!

තරග විනිසුරුවරයා මුළා කිරීම පිණිස ඇඟිලිවලින් ‘ක්ලික්’ හඬ නිකුත් කරමින් ආධුනික ක්‍රිකට් ලෝකයට අනවශ්‍ය අවධානයක් ගෙන ආ එංගලන්ත ක්‍රිකට් සමාජයීය ක්‍රීඩකයෙකුට දෙවසරක ක්‍රීඩා තහනමක් පනවා තිබෙනවා.

මේ තහනමට ලක්ව සිටින්නේ ‘ක්ලිකී පොන්ටිං’ යන විකට නාමයෙන් හැඳින්වෙන බ්‍රයන් ඩිවායින් (Brian Devine) නමැති ක්‍රීඩකයා.

සෝල්ට්බර්න් ක්‍රිකට් සමාජයේ දෙවැනි පෙළ කණ්ඩායම හා නෝටන් ක්‍රිකට් සමාජය අතර පැවති උතුරු යෝක්ෂ හා දකුණු ඩරම් ක්‍රිකට් ලීගයේ දෙවැනි කොටසේ තරගයක වීඩියෝ පටයක් සමාජ මාධ්‍යයේ වේගයෙන් පැතිර යාමෙන් පසුව 38 හැවිරිදි ඩිවායින් අපකීර්තියට ලක්වුණා.

නෝටන් කණ්ඩායමේ පිතිකරු නෝමන් ෂබිර්ගේ පිත්ත පසුකර පන්දුව යන විට ස්ලිප් ස්ථානයේ පන්දු රකිමින් සිටි ඩිවායින් ඔහුගේ ඇඟිලි ‘ක්ලික්’ කරන අයුරු එම වීඩියෝවෙන් දිස්වනවා. කඩුලු රකින්නා පන්දුව අල්ලා ගත් අතර පන්දු රකින්නන් එය දැවී යාමක් දැයි විනිසුරුගෙන් විමසුවා. ෂබිර් කඩුලු රකින්නා අතට උඩ පන්දුවක් දෙමින් දැවී ගිය බවට විනිසුරු තීරණය කරද්දී පිතිකරුවාගෙන් පෙනෙන්නට තිබුණේ එම තීරණයට විරුද්ධ වීමක්.

ඩිවායින්ගේ ප්‍රයෝගයෙන් බලාපොරොත්තු වුණේ පන්දුව පිත්තේ අග වැදෙන විට නිකුත් වන ශබ්දය ප්‍රතිනිර්මාණය කිරීමයි. හිටපු ඔස්ට්‍රේලියානු නායක රිකී පොන්ටිං (Ricky Ponting) ට යොමුවෙමින් ඩිවායින් ට ‘ක්ලිකී පොන්ටිං’ (Clicky Ponting) යන විකට නාමය පටබැඳුනේ මේ ක්‍රියාවෙන් පසුවයි.

North Yorkshire and South Durham ක්‍රිකට් ලීගය මේ සිද්ධිය පිළිබඳව පරීක්ෂණයක් ආරම්භ කර ඇති අතර සෝල්ට්බර්න් කණ්ඩායම ඩිවායින් ට 2026 තරග වාරයේ ඉතිරි තරගවලට ක්‍රීඩා කිරීමේ තාවකාලික තහනමක් පනවා තිබෙනවා.

මේ අනුව, ඩිවායින් ට එංගලන්ත හා වේල්ස් ක්‍රිකට් මණ්ඩලය යටතේ වන සියලු ක්‍රිකට් ක්‍රීඩාව  2028 වසරේ සැප්තැම්බර් 29 දක්වා තහනම් කර තිබෙනවා. ක්‍රිකට් ක්‍රීඩා කිරීම, පුහුණු කිරීම, විනිශ්චය කිරීම, ලකුණු සටහන් කිරීම හා කණිෂ්ඨ කණ්ඩායම් කළමනාකරණය කිරීම මේ තහනමට අයත් වනවා.

සෝල්ට්බර්න් (Saltburn) ක්‍රිකට් සමාජයට ද දඬුවම් ගණනාවක් පමුණුවා තිබෙනවා. ඔවුන්ගේ දෙවැනි පෙළ කණ්ඩායම ලීගයේ දෙවැනි කොට‌සේ සිට තෙවැනි කොටස දක්වා පහත් කර තිබෙන අතර ඔවුන් 2027 තරග වාරය ආරම්භ කරනු ඇත්තේ ලකුණු 60ක අඩු කිරීමක් සමගයි. මීට අමතරව එම සමාජයට පවුම් 300ක දඩයක් ද නියම කර තිබෙනවා.

මේ සිද්ධිය බොහෝ දෙනාගේ අවධානයට ලක්වෙමින් දේශීය ලීගයෙන් ඔබ්බට ගියේ එම රැවටීමේ වීඩියෝ පටය සමාජ මාධ්‍යයේ වේගයෙන් සංසරණය වෙමින් හා ක්‍රිකට් ප්‍රජාවගේ ප්‍රතිචාරයන් ඇද ගනිමින්. දේශීය ක්‍රීඩා සමාජ තරගයක සිදුවූ අසාමාන්‍ය දැවී යාමක් ලෙසින් ඇරඹුනු දෙයක් අවසානයේදී ජාත්‍යන්තර මාතෘකාවක් බවට පත්වුණා.