ඉන්දුනීසියාවේ ඉ-සිගරට් භාවිතයට ආගමික තහනමක්

ලොව විශාලතම මුස්ලිම් ජනගහනය වෙසෙන ඉන්දුනීසියාවේ ඉහළම ඉස්ලාමීය ආගමික අධිකාරිය වන ඉන්දුනීසියානු උලමා කවුන්සිලය (MUI), විද්‍යුත් දුම්වැටි හෙවත් 'වේප්' (Vape) භාවිතය ඉස්ලාමීය දහමට අනුව මුළුමනින්ම තහනම් හෙවත් 'හරාම්' (Haram) බවට ප්‍රකාශයට පත් කර තිබේ.

ඉකුත් සිකුරාදා රැස්වූ උලමා කවුන්සිලයේ පූර්ණ සැසියේදී සම්මත කෙරුණු '2026 අංක 131 දරන ෆත්වා' නියෝගය හරහා මෙම තීරණය නිල වශයෙන් නිවේදනය කෙරිණි.

සෞඛ්‍ය අනතුර සහ මත්ද්‍රව්‍ය අවදානම

තීරණය පැහැදිලි කරමින් උලමා කවුන්සිලයේ ෆත්වා කටයුතු ප්‍රධානී මහාචාර්ය අස්රෝරුන් නිආම් ෂෝලේ පෙන්වා දෙන්නේ, වේප් භාවිතය මානව සෞඛ්‍යයට මෙන්ම පරිසර පද්ධතියටද දැඩි හානි පමුණුවන සාධකයක් බවයි.

මෙම ආගමික නියෝගය හුදෙක් පෞද්ගලික භාවිතයට පමණක් සීමා නොවන්නකි. විද්‍යුත් දුම්වැටි නිෂ්පාදනය, බෙදාහැරීම සහ අලෙවිය මෙන්ම, මෙම උපකරණ ආශ්‍රිතව මනෝවර්තක ඖෂධ (Psychotropic drugs / substances) හා වෙනත් මත්ද්‍රව්‍ය ශරීරගත කිරීමද නීතිවිරෝධී බවට එහි පැහැදිලිව සඳහන් වේ.

නීතිමය රාමුවට එල්ල වන පීඩනය

මෙම තීන්දුවත් සමග එරට රජය වෙත කරුණු 12කින් සමන්විත ප්‍රතිපත්තිමය නිර්දේශ මාලාවක් ඉදිරිපත් කර ඇත. වේප් භාවිතය හා අලෙවිය තහනම් කෙරෙන නීති කඩිනමින් සම්පාදනය කිරීම සහ නීති කඩකරන්නන්ට දඬුවම් නියම කිරීම ඒ අතර ප්‍රධාන වේ.

ඉන්දුනීසියානු ව්‍යවස්ථාව අනුව උලමා කවුන්සිලයේ 'ෆත්වා' ප්‍රකාශයක් සෘජුවම අධිකරණ නීතියක් බවට පත් නොවේ. එහෙත් මිලියන 240කට අධික එරට මුස්ලිම් ජනතාවගේ දෛනික ජීවිතය මෙන්ම රජයේ ප්‍රතිපත්තිමය තීන්දු කෙරෙහි මෙම ආගමික නියෝගය ප්‍රබල බලපෑමක් එල්ල කරන බව දේශපාලන විචාරකයෝ පෙන්වා දෙති.

දුම්කොළ කර්මාන්තය හමුවේ මතුවන අර්බුදය

ලොව ඉහළම දුම්කොළ පරිභෝජනයක් පවතින රාජ්‍යයක් ලෙස සැලකෙන ඉන්දුනීසියාව තුළ, සාම්ප්‍රදායික දුම්වැටි වෙනුවට තරුණ පරපුර වේගයෙන් විද්‍යුත් දුම්වැටි වෙත නැඹුරු වෙමින් පැවති පසුබිමක මෙම නියෝගය නිකුත් වීම විශේෂත්වයකි.

එරට ඩොලර් බිලියන ගණනක වේප් ව්‍යාපාරික ජාලය සහ රජයේ බදු ආදායම කෙරෙහි මෙම තීරණය ඉදිරියේදී සෘජු ආර්ථික කම්පනයක් එල්ල කරනු ඇතැයි ආර්ථික විශේෂඥයෝ අපේක්ෂා කරති.

විශ්වාසනීය මූලාශ්‍රය:

The Star: Indonesia's top Muslim clerical body declares e-cigarette use haram