වරාය නගරයෙන් ඇරඹෙන නව ගුවන් ගමන් පෙරළිය

* කොළඹ අහස ජයගන්නා මගී ඩ්‍රෝන පෙරහුරුව ඇරඹෙයි: වරාය නගරයෙන් මෙරට ගුවන් ගමන් ක්ෂේත්‍රයට ඓතිහාසික හැරවුමක්

* විදුලි බලයෙන් ක්‍රියාත්මක ස්වයංක්‍රීය eVTOL යානා පරීක්ෂණ චාරිකා සඳහා රාජ්‍ය අනුමැතිය

ශ්‍රී ලංකාවේ ප්‍රවාහන හා සංචාරක ක්ෂේත්‍රයේ නව පරිච්ඡේදයක් සනිටුහන් කරමින්, විදුලි බලයෙන් ක්‍රියාත්මක මගී ඩ්‍රෝන (eVTOL) පරීක්ෂණ මෙහෙයුම් අද (11) පෙරවරුවේ කොළඹ වරාය නගරයේදී (Port City Colombo) නිල වශයෙන් ආරම්භ විය. සාමාන්‍ය ධාවන පථයක අවශ්‍යතාවයකින් තොරව සිරස් අතට ගුවන්ගත වීමේ සහ ගොඩබැස්වීමේ හැකියාව සහිත මෙම තාක්ෂණය, මෙරට නාගරික හා සංචාරක ගුවන් සේවාවන්හි සුවිශේෂී හැරවුම් ලක්ෂ්‍යයක් ලෙස සැලකේ.

චීන තාක්ෂණයෙන් නිමැවුණු EH216 යානයේ විශේෂාංග

මෙම නියමු ව්‍යාපෘතිය සඳහා යොදාගැනෙන්නේ නියමු රහිත ගුවන් යානා තාක්ෂණයේ ප්‍රමුඛයෙකු වන චීනයේ 'EHang' සමාගම නිෂ්පාදනය කළ EHang EH216-S (eVTOL) මාදිලියේ මගී ඩ්‍රෝන යානයකි. සම්පූර්ණයෙන්ම හරිත බලශක්තියෙන් (විදුලි බැටරි මගින්) ක්‍රියාත්මක වන මෙම යානය එක්වර මගීන් දෙදෙනෙකුට ගමන් කළ හැකි පරිදි නිර්මාණය කර ඇත.

යානය සතු ප්‍රධාන තාක්ෂණික ලක්ෂණ:

* බල සැපයුම සහ එන්ජින් පද්ධතිය: තල බමන (Propellers) 16ක් සහ එකිනෙකට ස්වාධීන බැටරි ඇසුරුම් 12ක් මගින් අඛණ්ඩ බලයක් සැපයීම. එක් බැටරි පද්ධතියක් අක්‍රිය වුවද අනෙක් පද්ධති මගින් ආරක්ෂිතව ගොඩබැස්වීම තහවුරු කෙරේ.

* ස්වයංක්‍රීය නියාමනය: නියමුවෙකු නොමැතිව, මධ්‍යම පාලන මැදිරියක සිට චන්ද්‍රිකා සහ ඇල්ගොරිතම තාක්ෂණය ඔස්සේ පූර්ණ ස්වයංක්‍රීයව පියාසර කිරීම.

* ආරක්ෂණ පද්ධති (Fail-Safe Systems): සන්නිවේදන හෝ තාක්ෂණික බිඳවැටීමකදී ආසන්නතම ආරක්ෂිත ස්ථානයකට ස්වයංක්‍රීයව ගොඩබැසීමේ පූර්ව ක්‍රමවේද සහ හදිසි පැරෂුට් පද්ධතිවලින් සමන්විත වීම.

* ශබ්ද හා පරිසර හිතකාමී බව: සාමාන්‍ය හෙලිකොප්ටර් යානයකට වඩා අවම ශබ්දයකින් යුක්ත වීම සහ ශුන්‍ය කාබන් විමෝචනය.

මාස හයක නිරීක්ෂණ කාලසීමාවක් සහ සංචාරක ඉලක්ක

මෙම පරීක්ෂණ අදියර ක්ෂණික වාණිජ මෙහෙයුමක් නොවන අතර, ඉදිරි මාස හයක කාලය තුළ කොළඹ වරාය නගර පරිශ්‍රය තුළ පමණක් කාලගුණික සහ තාක්ෂණික දත්ත රැස්කරමින් විවිධ මට්ටම් යටතේ නිරීක්ෂණය කෙරේ.

එම නිරීක්ෂණ සාර්ථක වීමෙන් අනතුරුව, මෙරට ප්‍රමුඛ සංචාරක කලාප වන සීගිරිය, පිදුරංගල, නුවරඑළිය මෙන්ම දකුණු හා නැගෙනහිර වෙරළබඩ සංචාරක කලාප සහ කුඩා දූපත් ඉලක්ක කරගනිමින් පරිසර හිතකාමී සුඛෝපභෝගී ගුවන් සවාරි හඳුන්වා දීමට සැලසුම් කර ඇත. මීට අමතරව, අනාගතයේදී හදිසි ආපදා ප්‍රතිචාර, වෛද්‍ය සැපයුම් කඩිනමින් ප්‍රවාහනය කිරීම සහ අධිවේගී නාගරික ප්‍රවාහන විසඳුමක් ලෙසද මෙම තාක්ෂණය යොදාගැනීමේ ශක්‍යතාව පවතී.

නියාමනය සහ ආයෝජන අවස්ථා

මෙම නියමු ව්‍යාපෘතිය ශ්‍රී ලංකා සිවිල් ගුවන් සේවා අධිකාරිය (CAASL), ආරක්ෂක අමාත්‍යාංශය, ශ්‍රී ලංකා ගුවන් හමුදාව සහ විදුලි සංදේශ නියාමන කොමිෂන් සභාව (TRCSL) ඇතුළු වගකිවයුතු රාජ්‍ය ආයතනයන්හි දැඩි නියාමන හා ආරක්ෂණ මාර්ගෝපදේශ යටතේ ක්‍රියාත්මක වේ.

ශ්‍රී ලංකා ආයෝජන මණ්ඩලය (BOI), ශ්‍රී ලංකා සංචාරක ප්‍රවර්ධන කාර්යාංශය සහ කොළඹ වරාය නගර ආර්ථික කොමිසම එක්ව, මෙම ව්‍යාපෘතිය හරහා මෙරටට ආකර්ෂණය කරගත හැකි විදෙස් ආයෝජන සහ නාගරික ගුවන් සංචලන (Urban Air Mobility - UAM) යටිතල පහසුකම් සංවර්ධනය පිළිබඳ ඉදිරියේදී පුළුල් ඇගයීමක් සිදුකිරීමට නියමිතය.