'2029 දී බලය ලබාගැනීම අපේ අරමුණයි': බල තැරැව්කාර දේශපාලනය ප්‍රතික්ෂේප කරන බව දිලිත් ජයවීර කියයි

*ව්‍යවස්ථා සංශෝධන සහ නූතන ආර්ථික දැක්ම ගැන පාර්ලිමේන්තු මන්ත්‍රී දිලිත් ජයවීරගේ ස්ථාවරය

ප්‍රධාන දේශපාලන පක්ෂ අතර බල තැරැව්කරුවකු (power broker) ලෙස කටයුතු කිරීම වෙනුවට, රටේ පාලන බලය ලබා ගැනීම සර්වජන බලයේ මූලික ඉලක්කය බව පාර්ලිමේන්තු මන්ත්‍රී දිලිත් ජයවීර කරයි. ‘ඩේලි මිරර්’ පුවත්පත සමඟ පැවති විශේෂ සාකච්ඡාවකදී ඔහු පෙන්වා දෙන්නේ, ජනතාවගේ දේශපාලන විශ්වාසය දිනාගැනීම සඳහා කෙටිකාලීන මාධ්‍ය ප්‍රචාරණවලට එහා ගිය ප්‍රායෝගික වැඩපිළිවෙළක් සහ ශක්තිමත් දෙවන පෙළ නායකත්වයක් අත්‍යවශ්‍ය බවයි.

සමාජවාදය සහ ව්‍යවසායක රාජ්‍යය අතර ගැටුමක් නෑ

කොමියුනිස්ට් පක්ෂය වැනි වාමාංශික කණ්ඩායම් සමඟ එක්ව සන්ධානගත වීම පිළිබඳව අදහස් දක්වමින් මන්ත්‍රීවරයා, වර්තමාන ගෝලීය සන්දර්භය තුළ සමාජවාදය සහ ‘ව්‍යවසායක රාජ්‍යය’ (entrepreneurial state) පිළිබඳ සංකල්ප එකිනෙකට පටහැනි නොවන බව පවසයි. චීනය සහ වියට්නාමය වැනි රාජ්‍යයන් පවා ජාතික ධනය උත්පාදනය කිරීමේ ප්‍රධාන උපායමාර්ගය ලෙස ව්‍යවසායකත්වය වැළඳගෙන ඇති ආකාරය ඔහු නිදසුන් ලෙස පෙන්වා දෙයි. මෙරට ආර්ථික ප්‍රතිලාභ ජනතාව වෙත ළඟා කරවීම සඳහා රාජ්‍ය යාන්ත්‍රණය තුළට ව්‍යවසායක චින්තනය ආදේශ කළ යුතු බව ඔහුගේ ස්ථාවරයයි.

දෙවන පෙළ නායකත්වය සහ නව මුහුණු සියයක්

සර්වජන බලය තුළ දිලිත් ජයවීර හැර වෙනත් නායකයන් නොපෙනෙන්නේ මන්දැයි මාධ්‍යවේදිනිය එම සාකච්ජාවේදී කළ විමසීමේදී ඊට පිළිතුරු දෙමින් ඔහු පවසන්නේ පක්ෂය තුළ වෙනත් නායකයන් සහ වෘත්තිකයන් සිටියද, මාධ්‍ය විසින් තමන්ගේ රූපරාමු සහ හඬපට වැඩිපුර ප්‍රචාරය කිරීමට පෙළඹෙන නිසා තමන්ට එවැනි වැඩි ප්‍රසිද්ධියක් ලැබී ඇති බවයි.

සර්වජන බලය තුළ තමන්ට ලැබෙන ඉහළ දෘශ්‍යතාව මාධ්‍ය ආවරණයේ ස්වභාවය නිසා සිදුවන්නක් බව එසේ පිළිගත් දිලිත් ජයවීර, පක්ෂය තුළ විධිමත් දෙවන පෙළක් ගොඩනැගීම දැනටමත් ක්‍රියාත්මක වන බව අවධාරණය කර සිටියි. "නව මුහුණු සියයක්" වැඩසටහන හරහා වෘත්තීයවේදීන් සහ තරුණ ප්‍රජාව ඉදිරියට ගෙන ඒම ප්‍රධාන අරමුණ වී ඇති අතර, සාම්ප්‍රදායිකව ජනතාව රැස්වීම්වලට ප්‍රවාහනය කරන දේශපාලන සංස්කෘතියෙන් බැහැරව බිම්මට්ටමේ ජාලයක් නිර්මාණය වෙමින් පවතින බවද ඔහු කියා සිටියි.

වත්මන් පාලනය සහ ආර්ථික අනුවර්තනය

ජාතික ජන බලවේගය (NPP) නූතන ගෝලීය ආර්ථික අභියෝගයන්ට සාපේක්ෂව අනුවර්තනය වීමේ දුර්වලතාවක් පෙන්නුම් කරන බව පෙන්වා දුන් මන්ත්‍රීවරයා, ඔවුන් සාම්ප්‍රදායික ආර්ථික විශ්වාසයන් මත පදනම්ව කටයුතු කරන බව ප්‍රකාශ කරයි. රට වෙනුවෙන් ධනය උත්පාදනය කිරීමේ ප්‍රගතිශීලී වැඩපිළිවෙළකට සහය දැක්වීමට සූදානම් වුවද, පවතින දේශපාලන දර්ශනය නූතන තරගකාරීත්වයට ගැළපෙන්නේද යන්න විමසා බැලිය යුතු බව ඔහු සඳහන් කරයි.

22 වැනි ව්‍යවස්ථා සංශෝධනය සහ අධිකරණ ස්වාධීනත්වය

රජය විසින් ඉදිරිපත් කිරීමට සූදානම් වන 22 වැනි ආණ්ඩුක්‍රම ව්‍යවස්ථා සංශෝධනය පිළිබඳව ශ්‍රී ලංකා නීතිඥ සංගමය (BASL) ඇතුළු නීති ක්ෂේත්‍රයේ පාර්ශ්ව මතු කර ඇති විරෝධය කෙරෙහි අවධානය යොමු කළ දිලිත් ජයවීර, පුද්ගල කේන්ද්‍රීය අවශ්‍යතා වෙනුවෙන් ආණ්ඩුක්‍රම ව්‍යවස්ථාව වෙනස් කිරීම ප්‍රජාතන්ත්‍රවාදී මූලධර්මවලට හානිකර බව පැවසීය. අධිකරණ පද්ධතිය පාලනය කිරීමට අතීතයේ සිට විවිධ ආණ්ඩු ගත් උත්සාහයන් දිගුකාලීනව අසාර්ථක වූ බවද ඔහු සිහිපත් කර සිටියි.

කාන්තා සහභාගීත්වය සහ 2029 ඉලක්කය

සර්වජන බලය විසින් ඉදිරිපත් කළ උපායමාර්ගික සැලැස්ම සාම්ප්‍රදායික මැතිවරණ පොරොන්දු හෝ සහනාධාර පත්‍රිකාවකට එහා ගිය ප්‍රතිපත්තිමය ලේඛනයක් බවත්, ජනගහනයෙන් අඩකට වැඩි කාන්තා ප්‍රජාව ආර්ථික ක්‍රියාවලියට සහ තීරණ ගැනීමේ මට්ටමට සක්‍රීයව දායක කර නොගෙන රටකට ඉදිරියට යා නොහැකි බවත් ඔහු පෙන්වා දෙයි.

සිය පක්ෂයේ ඉදිරි ගමන්මඟ පිළිබඳව අදහස් දක්වමින් පාර්ලිමේන්තු මන්ත්‍රී දිලිත් ජයවීර, ජනතාව තම ප්‍රතිපත්ති කෙරෙහි විශ්වාසය තැබුවහොත් 2029 වසර වන විට රට පාලනය කිරීමේ හැකියාව සර්වජන බලය සතුවන බව කියා සිටියි.


නිල සමාජ මාධ්‍ය ප්‍රකාශය (මුල් මූලාශ්‍රය):

Dilith Jayaweera Facebook Official Post

Daily Mirror Feature: “Sri Lanka has a black economy, three-four times the size of actual economy” – Dilith Jayaweera