අගවිනිසුරු ප්‍රමුඛ පංච පුද්ගල මඩුල්ලක් ඉදිරියේ පෙත්සම් 50කට අධික සංඛ්‍යාවක් සලකා බැලේ
විනිසුරුවරුන්ගේ විශ්‍රාම වයස් සීමාව සංශෝධනය කිරීම අරමුණු කරගනිමින් රජය විසින් ඉදිරිපත් කර ඇති ආණ්ඩුක්‍රම ව්‍යවස්ථාවේ 22 වන සංශෝධන පනත් කෙටුම්පත අභියෝගයට ලක් කරමින් ගොනු කර ඇති සියලුම පෙත්සම් විභාග කිරීම සඳහා අගවිනිසුරු ප්‍රීති පද්මන් සූරසේන විසින් පංච පුද්ගල ශ්‍රේෂ්ඨාධිකරණ විනිසුරු මඩුල්ලක් නම් කර තිබේ.
මෙම විශේෂ විනිසුරු මඩුල්ලේ සභාපතිවරයා ලෙස අගවිනිසුරු ප්‍රීති පද්මන් සූරසේන කටයුතු කරන අතර, විනිසුරු මඩුල්ලේ සෙසු සාමාජිකයින් ලෙස අචල වෙංගප්පුලි, අර්ජුන ඔබේසේකර, සම්පත් බී. අභයකෝන් සහ ගිහාන් කුලතුංග යන ශ්‍රේෂ්ඨාධිකරණ විනිසුරුවරුන් නම් කර ඇත.
පෙත්සම් සහ අතරමැදි පෙත්සම් 50කට අධික සංඛ්‍යාවක්
අදාළ පනත් කෙටුම්පතේ වගන්ති කිහිපයක් ආණ්ඩුක්‍රම ව්‍යවස්ථාවට පටහැනි බවට ප්‍රකාශ කරන ලෙස ඉල්ලා මේ වන විට ශ්‍රේෂ්ඨාධිකරණය හමුවේ පෙත්සම් 50කට අධික සංඛ්‍යාවක් ගොනු කර තිබේ. ඊට අමතරව, මෙම නඩු කටයුතුවලට මැදිහත් වී කරුණු දැක්වීම සඳහා අතරමැදි පෙත්සම් කිහිපයක් ද ඉදිරිපත්ව ඇත.
අදාළ සියලු තත්ත්වයන් සැලකිල්ලට ගනිමින්, පනත් කෙටුම්පත අභියෝගයට ලක් කරමින් දැනට ගොනු කර ඇති සහ ඉදිරියේදී ගොනු කිරීමට නියමිත සියලු පෙත්සම් විභාග කර අවසන් කිරීම සඳහා හෙට, එනම් 2026 සැප්තැම්බර් 01 වන දින අධිකරණය හමුවේ ලැයිස්තුගත කරන ලෙස අගවිනිසුරුවරයා විසින් ශ්‍රේෂ්ඨාධිකරණ රෙජිස්ට්‍රාර්වරයා වෙත නියෝග කර ඇත. ඒ අනුව පෙත්සම්කාර පාර්ශ්වයන්ට සහ නීතිපතිවරයා වෙත මේ පිළිබඳව දැනුම් දීමට පියවර ගෙන තිබේ.
අධිකරණයේ ස්වාධීනත්වය හා ඓතිහාසික පසුබිම
ව්‍යවස්ථා සංශෝධන සහ විනිසුරුවරුන්ගේ ධුර කාලය පිළිබඳ සංවාදය කරළියට පැමිණ ඇති මෙම අවස්ථාවේදී, ශ්‍රී ලංකා නීතිඥ සංගමයේ හිටපු සභාපති, ජනාධිපති නීතිඥ සාලිය පීරිස් ශ්‍රී ලංකාවේ 40 වන අගවිනිසුරු ධුරය හෙබවූ දිවංගත ජී. පී. එස්. ද සිල්වා මහතාගේ අභාවය සිහිපත් කරමින් සිය ෆේස්බුක් පිටුවේ විශේෂ සටහනක් තබා තිබේ.
1991 සිට 1999 දක්වා කාලය තුළ අගවිනිසුරු ධුරය දැරූ ජී. පී. එස්. ද සිල්වා ගේ නායකත්වය යටතේ ශ්‍රේෂ්ඨාධිකරණය මූලික අයිතිවාසිකම් අධිකරණ බලය නොබියව ක්‍රියාවට නැංවූ ආකාරය පෙන්වා දෙන සාලිය පීරිස්, විධායකයේ සහ ව්‍යවස්ථාදායකයේ බල සීමාවන් නිර්ණය කරමින් ප්‍රකාශයට පත් කළ විකාශන අධිකාරී පනත් කෙටුම්පත (Broadcasting Authority Bill) පිළිබඳ ඓතිහාසික නඩු තීන්දුව ද සිහිපත් කරයි.
ජනතාවගේ ස්වෛරී අයිතිවාසිකම් සුරැකීමේදී සහ විධායක බලයේ සීමාවන් ඉක්මවා යාම් පාලනය කිරීමේදී ශ්‍රේෂ්ඨාධිකරණය ඉටු කර ඇති ඓතිහාසික භූමිකාවත්, අධිකරණයේ ස්වාධීනත්වය ආරක්ෂා කිරීමේ වැදගත්කමත් පෙන්වා දෙන නීති ක්ෂේත්‍රයේ විද්වතුන්, 22 වන සංශෝධනය සම්බන්ධයෙන් වන ශ්‍රේෂ්ඨාධිකරණ තීන්දුව මෙරට ව්‍යවස්ථා ඉතිහාසයේ තවත් තීරණාත්මක සන්ධිස්ථානයක් වනු ඇති බව පෙන්වා දෙයි.
