*නීතිඥ සහයක් නොමැතිව පෙනී සිටි සැකකරුවන් 08 දෙනාගෙනුත් පිටු සිය ගණනක ලේඛන අධිකරණයට
2019 වසරේ සිදුවූ පාස්කු ඉරිදා ත්‍රස්ත ප්‍රහාර මාලාව සම්බන්ධයෙන් චෝදනා 23,270ක් යටතේ පවරා ඇති ඓතිහාසික නඩුවේ තීන්දුව ලබන සැප්තැම්බර් මස 22 වන දින ප්‍රකාශයට පත් කිරීමට කොළඹ විශේෂ ත්‍රිපුද්ගල මහාධිකරණය ඊයේ (08) දින නියම කළේය. ඒ, නඩුවේ විත්තිකරුවන් 24 දෙනා විසින් සිය ලිඛිත දේශන අධිකරණය හමුවේ ගොනු කිරීමෙන් අනතුරුවයි.
මෙම නඩුව නවරත්න මාරසිංහ, රාමනාදන් කන්නන් සහ සුජීව නිශ්ශංක යන ත්‍රිපුද්ගල මහාධිකරණ විනිසුරු මඩුල්ල ඉදිරියේ කැඳවනු ලැබූ අතර, නවුෆර් මවුලවී ඇතුළු රක්ෂිත බන්ධනාගාරගතව පසුවන සියලුම විත්තිකරුවන් දැඩි ආරක්ෂක රැකවල් මැද අධිකරණය වෙත ඉදිරිපත් කර තිබිණි.
විත්තිකරුවන් 8 දෙනෙකුගෙන් ස්වාධීන ලිඛිත දේශන
මෙම නඩු විභාගයේ විශේෂත්වයක් වූයේ, නීතිඥ සහයක් නොමැතිව තමන් වෙනුවෙන්ම පෙනී සිටි විත්තිකරුවන් අට දෙනෙකු සිය ලිඛිත දේශන සෘජුවම අධිකරණය වෙත භාරදීමයි. රක්ෂිත බන්ධනාගාරයේ රඳවා සිටියදී ඔවුන් විසින් මෙම කරුණු දැක්වීම් සකස් කර තිබූ අතර, ඉන් විත්තිකරුවන් හත් දෙනෙකු පරිගණක ආශ්‍රයෙන් ඉංග්‍රීසි භාෂාවෙන් යතුරුලියනය කරන ලද පිටු 376කින් සමන්විත ලිඛිත දේශන ගොනු අධිකරණයට භාර දුන්නේය.
එකොළොස්වන විත්තිකරු පමණක් සිංහල භාෂාවෙන් පිළියෙල කළ පිටු 28කින් යුත් යතුරුලියනය කළ ලිඛිත දේශනයක් ඉදිරිපත් කළේය. හයවන විත්තිකරු ලිඛිත විරෝධතා ගොනු කිරීමෙන් වැළකී සිටි අතර, සෙසු විත්තිකරුවන් නියෝජනය කළ නීතිඥවරුන්ට සහ පැමිණිල්ල මෙහෙයවන අතිරේක සොලිසිටර් ජනරාල්වරයාට සිය ලිඛිත දේශන නියමිත දින මධ්‍යාහ්න 12.00ට පෙර මහාධිකරණ ලේඛකාධිකාරීවරයා වෙත භාරදෙන ලෙස විනිසුරු මඩුල්ල නියෝග කළේය.
නඩු ඉතිහාසය සහ චෝදනා පත්‍රය
මොහොමඩ් සහරාන් ප්‍රමුඛ කණ්ඩායම විසින් 2019 අප්‍රේල් 21 වන දින දිවයිනේ ස්ථාන කිහිපයකට එල්ල කරන ලද මරාගෙන මැරෙන බෝම්බ ප්‍රහාර මාලාව සැලසුම් කිරීම, ආධාර අනුබල දීම සහ කුමන්ත්‍රණය කිරීම ඇතුළු චෝදනා 23,270ක් යටතේ නීතිපතිවරයා විසින් මුලින් විත්තිකරුවන් 25 දෙනෙකුට එරෙහිව නඩු පවරන ලදී.
කෙසේ වෙතත්, නඩු විභාගය ආරම්භ වීමට පෙර 17 වන විත්තිකරු බන්ධනාගාරගතව සිටියදී මියයාම හේතුවෙන් සෙසු විත්තිකරුවන් 24 දෙනාට එරෙහිව නඩු විභාගය දීර්ඝ ලෙස පවත්වාගෙන යනු ලැබිණි.
ඉදිරි අධිකරණ නියෝග
නඩුවේ අවසන් තීන්දුව සැප්තැම්බර් 22 වන දින ප්‍රකාශයට පත් කිරීමට නියමිත බැවින්, එදින පෙරවරු 9.00ට පෙර විත්තිකරුවන් සියලු දෙනා අධිකරණය හමුවට ඉදිරිපත් කරන ලෙස කොළඹ රිමාන්ඩ් සහ වැලිකඩ බන්ධනාගාර අධිකාරීවරුන්ට විනිසුරු මඩුල්ල නියම කළේය.
මීට අමතරව, 13 වන විත්තිකරුගේ සෞඛ්‍ය තත්ත්වය සැලකිල්ලට ගනිමින් ඔහු සැප්තැම්බර් 15 වන දින වැලිසර රෝහලේ සායනයටත්, සැප්තැම්බර් 18 වන දින ආයුර්වේද රෝහල් සායනයටත් යොමු කිරීමට පියවර ගන්නා ලෙස බන්ධනාගාර අධිකාරීවරයාට වැඩිදුරටත් නියෝග කෙරිණි.
ශ්‍රී ලංකා නීති ඉතිහාසයේ වැඩිම චෝදනා සංඛ්‍යාවක් සහිත සුවිශේෂී නඩු විභාගයක් වන මෙම නඩුවේ තීන්දුව, වසර පහකට අධික කාලයක් පුරා යුක්තිය අපේක්ෂාවෙන් සිටින දෙස් විදෙස් ප්‍රජාවගේ මෙන්ම නීති ක්ෂේත්‍රයේ ද දැඩි අවධානයට ලක්ව ඇති තීරණාත්මක සංධිස්ථානයක් වනු ඇත.
