මේ රටට යමක් කළ හැකි යැයි ක්‍රියාවෙන් සනාථ කොට ඇති වැඩබලන පොලිස්පති දේශබන්දු තෙන්නකෝන් පොලිස්පති ධූරයට පත් කළ හැකි නම් සුදුසු යැයි උඩුවේ ධම්මාලෝක හිමියෝ පැවසූහ.
කාදිනල් හිමියන් දේශබන්දු තෙන්නකෝන්ගේ පත් වීමට එරෙහිව නගන චෝදනා සම්බන්ධයෙන් තමන් වහන්සේ කනගාටුවට පත්වන බව ද උන්වහන්සේ කීහ.
කිරුළපන ඇලන් මැතිනියාරාම විහාරස්ථානයේ ඉකුත් දා (පෙබ. 24) පැවති මාධ්‍ය හමුවකදී උන්වහන්සේ බව සඳහන් කළහ.
යුක්තිය මෙහෙයුම නතර කිරීමට, වැඩබලන පොලිස්පති දේශබන්දු තෙන්නකෝන් හා මහජන ආරක්ෂක අමාත්‍ය ටිරාන් අලස් ඉවත් කිරීමට යම් බලවේගයක් ක්‍රියාත්මක වන්නේ නම් මහා සංඝරත්නය එයට එරෙහිව දිවි පරදුවට තබා කටයුතු කරන බව ද උන්වහන්සේ අවධාරණය කළහ.
'යුක්තිය' මෙහෙයුම නතර කිරීම සඳහා එල්ලවන බව කියන බලපෑම් සම්බන්ධයෙන් මහා සංඝරත්නයේ මතය පැවසීම සඳහා මේ මාධ්‍ය හමුව කැඳවා තිබූ අතර අමරපුර මහා නිකායේ වැඩබලන මහ නායක නිකපොත චන්ද්‍රජෝති හිමි ප්‍රධාන ගම්පහ, ත්‍රිකුණාමල, අම්පාර, මොනරාගල, කළුතර, ගාල්ල ආදී ප්‍රදේශවලින් වැඩම කරවූ ස්වාමීන් වහන්සේ එක්ව සිටියහ.
'' යම්කිසි කෙනෙක් යුක්තිය මෙහෙයුමට විරුද්ධ වෙනවා නම් ඒ අය රට පැත්තේ හිටගන්න අය නෙවේ. එය මත්ද්‍රව්‍ය උවදුර විතරක් නොවේ සමාජයේ වෙනත් විනය විරෝධී වැඩ සියල්ලට එරෙහි වන වැඩපිළිවෙළක්. එයට එරෙහි වීම යනු ප්‍රකෘතියේ සිට විකෘතිය වෙත යෑමක්. යුක්තියට එරෙහිවන සාතිශය බහුතරය අයුක්තිය පැත්තේ හිටගෙන සිටින බව අමතක නොකළ යුතුයි.” යයි මෙම මාධ්‍ය හමුවේදී අදහස් දැක්වූ කැලණිය විශ්වවිද්‍යාලයේ ජේ‍යෂ්ඨ මහාචාර්ය ඉඳුරාගාරේ ධම්මරතන හිමියෝ කීහ.
මාතර වෙහෙරහේන පූර්වාරාම විහාරස්ථානයේ විහාරාධිපති කෑගල්ලේ රතනසාර, මහාචාර්ය ඉත්තදෙමලියේ ඉන්ද්‍රසාර, කොළඹ ලුම්බිණි විද්‍යාලයේ සහකාර විදුහල්පති දිවිතුරේ සමන්ත නාහිමිවන්ද මෙම මාධ්‍ය හමුවේදී අදහස් දැක්විය.
මාස 03ක සේවා කාලය බදාදා රෑ 12 ට ඉවරයි!
වැඩ බලන පොලිස්පති දේශබන්දු තෙන්නකෝන් පොලිස්පති ධුරයට පත්කිරීම තීරණය කර ඇති ජනාධිපතිවරයා, ඒ සම්බන්ධයෙන් තම ස්ථාවරය අද (26) කැබිනට් මණ්ඩලයේ දී ප්‍රකාශ කිරීමට නියමිතව ඇතැයි රජයට සම්බන්ධ ආරංචි මාර්ග හෙළි කරයි.
ජනාධිපතිවරයා සිය මතය කැබිනට් මණ්ඩලය වෙත ඉදිරිපත් කිරීමෙන් අනතුරුව එය ව්‍යවස්ථා දායක සභාව වෙත යොමු කෙරෙනු ඇති බවත් එම ආරංචි මාර්ග කියයි.
වැඩබලන පොලිස්පති දේශබන්දු තෙන්නකෝන්ට ලබා දුන් මාස 03 ධූර කාලය බදාදා (28) රාත්‍රී 12 ට නිමාවීමට නියමිතය.
ව්‍යවස්ථා සභාවට නීතිපති කැඳවයි
මේ අතර ආණ්ඩුක්‍රම ව්‍යවස්ථා සභාව හමුවට නීතිපතිවරයා කැඳවීමට ව්‍යවස්ථා සභාව පසුගිය සඳුදා තීන්දු කළේය. මෙලෙස නීතිපතිවරයා ව්‍යවස්ථා සභාවට කැඳවන්නේ අතිවිශේෂ නීති උපදෙසක් ලබාගැනීම පිණිසය.
ජනාධිපතිවරයා විසින් ව්‍යවස්ථා සභාවට කිසියම් පත්වීමක් සඳහා නමක් නිර්දේශ කළ පසු එම නම ව්‍යවස්ථා සභාව විසින් ප්‍රතික්ෂේප කළ විට එවන් අවස්ථාවක අගතියට පත් පාර්ශ්වය නඩු පැවරුවහොත් නීතිපතිවරයාට ව්‍යවස්ථා සභාව වෙනුවෙන් පෙනී සිටිය හැකිද යන්න ගැන තීරණයක් ගැනීම නීතිපති කැඳවීමේ අරමුණ බව වාර්තා වෙයි.
මෙහි පවත්නා නීතිමය අර්බුදය වන්නේ එවන් නඩු කටයුත්තකදී අදාළ නම නිර්දේශ කළ ජනාධිපතිවරයා වෙනුවෙන් මෙන්ම නම ප්‍රතික්ෂේප කළ ව්‍යවස්ථාව සභාව වෙනුවෙන්ද නීතිපතිට පෙනී සිටිය හැකිද යන්නයි.
මේ සම්බන්ධයෙන් නීති උපදෙස් ලබාගෙන ව්‍යවස්ථා සභාව වෙනුවෙන් නීතිපතිට පෙනී නොසිටින අවස්ථාවල ඒ සඳහා පෞද්ගලික නීතිඥ සහාය ලබාගැනීමට අදාළව මෙම උපදෙස පතන බව ව්‍යවස්ථා සභා ආරංචි මාර්ග කියයි.
