සැප්තැම්බර් 14 ට පෙර ඇතුළු වන සංචාරකයන්ට පවතින සහනය නොවෙනස්ව
ශ්‍රී ලාංකික විදේශ ගමන් බලපත්‍ර හිමියන්ට මෙතෙක් තායිලන්තයට ඇතුළුවීම සඳහා හිමිව තිබූ වීසා රහිත පහසුකම (Visa Exemption) එළැඹෙන සැප්තැම්බර් 15 වැනිදා සිට අත්හිටුවීමට තායිලන්ත බලධාරීන් පියවර ගෙන තිබේ.
එරට සංක්‍රමණික සහ කෙටි කාලීන සංචාරක නීති පද්ධතියේ සිදු කෙරුණු පුළුල් ප්‍රතිසංස්කරණ ක්‍රියාවලියක ප්‍රතිඵලයක් ලෙස මෙම සංශෝධනය ක්‍රියාත්මක වන අතර, ඒ අනුව සැප්තැම්බර් 15 වැනිදා හෝ ඊට පසුව තායිලන්තයට ගමන් ගන්නා සියලුම ශ්‍රී ලාංකිකයන් ගමන ආරම්භ කිරීමට පෙර නිසි වීසා බලපත්‍රයක් ලබාගෙන තිබීම අනිවාර්ය වේ.
ගෝලීය වීසා ප්‍රතිපත්තියේ පුළුල් වෙනසක්
තායිලන්ත රජය කොවිඩ් වසංගතයෙන් පසු සංචාරක කර්මාන්තය නඟාසිටුවීම අරමුණු කරගනිමින් 2024 වසරේ ජූලි මාසයේදී විශේෂ කෙටි කාලීන වීසා සහනයක් හඳුන්වා දුන්නේය. ඒ යටතේ ශ්‍රී ලංකාව ඇතුළු රටවල් 93 ක සංචාරකයන්ට දින 60 ක කාලයක් දක්වා වීසා නොමැතිව තායිලන්තයේ රැඳී සිටීමට අවසර හිමි විය.
මීට අමතරව, වීසා නිදහස් ලැයිස්තුවේ තවදුරටත් රැඳී සිටින රටවල් 60 සඳහා ද මීට පෙර ලබා දී තිබූ දින 60 ක කාල සීමාව දින 30 ක් දක්වා අඩු කිරීමට පියවර ගෙන තිබේ.
සංචාරකයන් සැළකිලිමත් විය යුතු කරුණු
කෙසේවෙතත්, සැප්තැම්බර් 14 වැනිදා හෝ ඊට පෙර තායිලන්තයට ඇතුළු වන ශ්‍රී ලාංකිකයන්ට දැනට පවතින නීති යටතේ හිමිවන දින 60 ක කාල සීමාව එලෙසින්ම වලංගු වන බව තායි විදේශ කටයුතු අමාත්‍යාංශය පැහැදිලි කර ඇත. සංචාර සැලසුම් කර ඇති පාර්ශ්වයන් මෙම නව සංශෝධන පිළිබඳව කල්වේලා ඇතිව අවධානය යොමු කිරීම වැදගත් බව පෙන්වා දෙනු ලැබේ.
මුලාශ්‍රය :
