සමාජ මාධ්‍ය ඇල්ගොරිතම පාලනයට ඕස්ට්‍රේලියාවෙන් නව නීති

තිරය පිටුපස සිරවූ යොවුන් ජීවිත

වයස අවුරුදු දහතුනේදී සමාජ මාධ්‍ය භාවිතය ඇරඹූ වර්ෂා යජ්මාන්, නොදැනුවත්වම වැටුණේ කෑම ප්‍රතික්ෂේප කිරීමේ මානසික රෝගයක අගාධයකටයි. ඇය නොසෙවූ බර අඩු කිරීමේ සහ කැලරි සීමා කිරීමේ භයානක වීඩියෝ ඇල්ගොරිතමය මඟින් දිගින් දිගටම ඇගේ තිරය මත පතිත විය.

විසිහතර හැවිරිදි වියේ පසුවන ඇය අදටත් එම රෝගී තත්ත්වයෙන් සුවය ලබමින් සිටියි. සුරක්ෂිතතා සැකසුම් උපරිමයෙන් සක්‍රිය කර තිබියදී පවා ඇගේ ගිණුමට තවමත් මෙවැනි අනවශ්‍ය නිර්දේශ ලැබීම මෙහි ඇති බරපතළම යථාර්ථයයි.

වර්ෂා යජ්මාන්

මෙල්බර්න් නුවර විසූ ෆ්ලින් මාටින් මානසික පීඩනයෙන් පසුවෙද්දී අන්තවාදී අදහස් සහිත පිරිමි ආධිපත්‍යවාදී වීඩියෝ මාලාවකට නතු විය. එම මායාවෙන් මිදීමට ඔහුට මානසික රෝහලක නේවාසිකව ප්‍රතිකාර ගැනීමට පවා සිදුවිය.

තාක්ෂණික දැවැන්තයින්ට වැට බඳින පනත

යොවුන් පරපුර මෙම ඩිජිටල් උගුලෙන් මුදාගැනීම අරමුණු කරගනිමින්, ඕස්ට්‍රේලියානු අගමැති ඇන්තනි ඇල්බනීස්ගේ රජය ‘ඩිජිටල් සුරැකුම් වගකීම’ (Digital Duty of Care) නමින් නව පනතක් ගෙනැවිත් තිබේ.

මෙමඟින් සමාජ මාධ්‍ය වේදිකාවල නිර්දේශිත ඇල්ගොරිතම අක්‍රිය කිරීමට (Off Switch) පරිශීලකයින්ට සෘජු බලය හිමිවේ. එමගින් පාඨකයාට තමන් කැමැත්තෙන් තෝරාගත් ගිණුම්වල සටහන් පමණක් නැරඹීමේ පූර්ණ නිදහස ලැබේ.

නීතිය කඩකරන තාක්ෂණික සමාගම්වලට ඕස්ට්‍රේලියානු ඩොලර් මිලියන 100ක් දක්වා දැවැන්ත දඩ පැනවීමට ද මෙමඟින් ප්‍රතිපාදන සලසා ඇත. රජයේ අරමුණ සමාජ මාධ්‍ය පාලනය නොව, පුරවැසියා අතට තීරණ ගැනීමේ පාලනය ලබාදීම බව එරට සන්නිවේදන අමාත්‍ය ඇනිකා වෙල්ස් පෙන්වා දෙයි.

ජාත්‍යන්තර අභියෝග සහ ක්‍රියාත්මක කිරීමේ බාධා

මෙම පියවර අදහස් ප්‍රකාශ කිරීමේ නිදහසට බාධාවක් විය හැකි බවට විවේචකයින් සහ ඇතැම් දේශපාලන පාර්ශ්ව සැක මතු කරයි. අනෙක් අතට, පෙර ක්‍රියාත්මක කළ ළමා සමාජ මාධ්‍ය තහනම නිසි පරිදි ක්‍රියාත්මක කරගැනීමට තවමත් අරගලයක යෙදෙන පරිසරයක, මෙම නීතිය ප්‍රායෝගිකව ක්‍රියාත්මක කිරීම ලෙහෙසි පහසු නොවනු ඇතැයි විශේෂඥයෝ මත පළ කරති.

යුරෝපා සංගමය මීට පෙර මෙවැනි ක්‍රමවේද හඳුන්වා දුන්නද, තාක්ෂණික සමාගම් එම පහසුකම් භාවිතා කිරීමට අපහසු වන අයුරින් සකස් කර තිබූ බව හෙළි විය. කෙසේ වෙතත්, නව ඕස්ට්‍රේලියානු නීතිය යටතේ පරිශීලකයාට බාධාවකින් තොරව මෙම තේරීම ලබාදීම අනිවාර්ය කර තිබේ.

වැඩිදුර තොරතුරු සඳහා මූලාශ්‍ර:

BBC News: Toxic algorithms wouldn't let them go - now Australia wants an off switch

Parliament of Australia: Online Safety and Digital Duty of Care Legislative Framework