කොටුවේ සිට ගාලුමුවදොර දක්වා පාගමනක්
'ජනවරමේ පුරවැසියෝ' සංවිධානයේ මැදිහත්වීමෙන් පැවැති මෙම සාමකාමී පාගමන කොළඹ කොටුව දුම්රිය ස්ථානය අසලින් ආරම්භ විය. මහා සංඝරත්නය මෙන්ම සිවිල් ක්‍රියාකාරීන් විශාල පිරිසක් ඊට එක්ව සිටි අතර, පෙළපාලිය ගාලුමුවදොර හරහා ජනාධිපති ලේකම් කාර්යාලය දක්වා ගමන් කළේය.
"හොරුන්ට, දූෂිතයින්ට සහ මත්ද්‍රව්‍ය ජාවාරම්කරුවන්ට එරෙහිව ක්‍රියාත්මක වන නීතිමය පියවර ආපස්සට නොගනු" යන්න විරෝධතාකරුවන්ගේ ප්‍රධාන තේමාව විය. පිරිස පාලනය කරමින් සාමකාමී වාතාවරණයක් පවත්වා ගැනීමට ආරක්ෂක අංශ පියවර ගත් අතර, මාර්ග තදබදය අවම වන පරිදි පෙළපාලිය මෙහෙයවනු දක්නට ලැබිණි.
ජනාධිපතිවරයා වෙත සන්දේශයක්
ජනාධිපති ලේකම් කාර්යාලය අභියසට ළඟාවූ පාගමනේ නියෝජිතයන්, ජනාධිපති අනුර කුමාර දිසානායක මහතා වෙත ලිඛිත සන්දේශයක් බාරදීමට ඉල්ලීමක් ඉදිරිපත් කළේය. ඊට ප්‍රතිචාර දක්වමින් මහා සංඝරත්නය නියෝජනය කරමින් වැඩම කළ නියෝජිත හිමිවරුන් පිරිසකට පමණක් ලේකම් කාර්යාල පරිශ්‍රයට ඇතුළු වීමට අවස්ථාව හිමිවිය.
එහිදී ජනාධිපති කාර්යාලයේ අතිරේක ලේකම්වරයෙකු වෙත අදාළ සංදේශය නිල වශයෙන් බාරදීමට එම නියෝජිත පිරිස පියවර ගත්හ.
නීතියේ ආධිපත්‍යය සුරැකීමේ පුරවැසි බලපෑම
පසුගිය ජනවරම තුළින් ජනතාව අපේක්ෂා කළේ සැමට සමාන නීතියක් සහ පිරිසිදු රාජ්‍ය පාලනයක් බව උද්ඝෝෂණයට එක්වූ ක්‍රියාකාරීහු පෙන්වා දුන්හ. අධිකරණමය තීන්දු හෝ නීතිමය ක්‍රියාවලීන් මුල්කරගනිමින් ඇතැම් පාර්ශ්ව සමාජය නොමඟ යැවීමට කටයුතු කරන බවට ඔවුහු චෝදනා කළහ.
සාංඝික විනය මෙන්ම රටේ රාජ්‍ය නීතියට ගරු කරමින් කටයුතු කිරීමේ වැදගත්කම අවධාරණය කළ සහභාගී වූ ස්වාමීන් වහන්සේලා, විමර්ශන ක්‍රියාවලිය කඩිනම් කර වැරදිකරුවන්ට නිසි නීතිමය දඬුවම් ලබාදීමේ වගකීමෙන් රජය කිසිසේත් පසුබට නොවිය යුතු බව ප්‍රකාශ කළහ.
සජීවී වීඩියෝ වාර්තාව පහතින් නරඹන්න