ඖෂධ මිල පාලනයට ඉන්දීය ශ්‍රේෂ්ඨාධිකරණයෙන් දැඩි පියවරක්

ජීවිතාරක්ෂක ඖෂධ සහ වෛද්‍ය උපකරණ සාමාන්‍ය ජනතාවට දැරිය හැකි මට්ටමක පවත්වා ගැනීම රජයේ ප්‍රමුඛ වගකීමක් බව ඉන්දීය ශ්‍රේෂ්ඨාධිකරණය ප්‍රකාශ කරයි. ආර්ථික වර්ධනය හෝ ඖෂධ සමාගම්වල ආයෝජන රැකගැනීමේ මුවාවෙන් පුරවැසියන්ගේ ජීවත්වීමේ අයිතිය යටපත් කළ නොහැකි බව අධිකරණයේ ස්ථාවරය වී තිබේ.

නීතිඥ කිෂාන් චන්ද් ජයින් සහ ළමා ශල්‍ය වෛද්‍ය සංජේ කුල්ශ්‍රේෂ්ඨ විසින් 2013 ඖෂධ මිල පාලන නියෝගය (DPCO) යටතේ දැඩි නියාමනයක් ඉල්ලා ගොනුකළ පෙත්සම් සලකා බලමින්, විනිසුරු වික්‍රම් නාත් සහ විනිසුරු සංදීප් මෙහ්තා යන ද්විපුද්ගල විනිසුරු මඩුල්ල හමුවේ මෙම නඩු විභාගය පැවැත්විණි.

නියාමන අධිකාරියේ නිහඬතාව සහ පිළිකා ඖෂධ මිල

පිළිකා නාශක ඖෂධ වර්ග 137ක උපරිම සිල්ලර මිලෙහි වෙළෙඳ ලාභ ආන්තිකය (trade margin) 30%ක් දක්වා සීමා කිරීමට ජාතික ඖෂධ මිල නියාමන අධිකාරිය (NPPA) පියවර ගෙන තිබේ. මෙම සංශෝධිත මිල ගණන් නොවැම්බර් 09 වැනිදා සිට බලාත්මක වීමට නියමිතය.

අධිකරණය මැදිහත් වනතුරු එවැනි පියවරක් ගැනීමට වසර ගණනාවක් ප්‍රමාද වූයේ මන්දැයි විනිසුරු මඩුල්ල ප්‍රශ්න කළේය. ඖෂධ පාලිත ලැයිස්තුවට ඇතුළත් කිරීමේදී පවතින විනිවිදභාවය නොමැතිකම විවේචනය කළ අධිකරණය, නියාමන අධිකාරිය සම්පූර්ණයෙන්ම අක්‍රිය මට්ටමක පවතින බවට නිරීක්ෂණය කළේය. නිසි පාලනයක් පැවතියේ නම් රෝගීන්ට වත්මන් වියදමෙන් හතරෙන් එකකට ප්‍රතිකාර ලබාගැනීමට ඉඩ තිබූ බවද පෙන්වා දෙනු ලැබිණි.

රජයේ ක්‍රමානුකූල ස්ථාවරය සහ ආයෝජන රැකවරණය

රජය වෙනුවෙන් පෙනී සිටි අතිරේක සොලිසිටර් ජනරාල් අයිෂ්වර්යා භාටි කරුණු දක්වමින් කියා සිටියේ, දැඩි පාලනයක් හරහා ඖෂධ ක්ෂේත්‍රයේ නව නිපැයුම් හා වෙළෙඳපොළ තරගකාරිත්වය අඩපණ විය හැකි බවයි.

අත්‍යවශ්‍ය ඖෂධ සාධාරණ මිලකට ලබාදීම මෙන්ම නිෂ්පාදන ක්ෂේත්‍රයට අඛණ්ඩව ආයෝජන ආකර්ෂණය කරගැනීම අතර තුලනයක් පවත්වා ගැනීම රජයේ අරමුණ බව ඇය සඳහන් කළාය. ඒ අනුව හදිසි දැඩි පාලනයකට වඩා පියවරෙන් පියවර ක්‍රියාත්මක වන තුලනාත්මක ක්‍රමවේදයක් අනුගමනය කරන බව රජයේ ස්ථාවරය විය.

රෝහල් වියදම් තර්කය සහ අය නොවූ බිලියන ගණනක හිඟය

රෝහල් සංගම් වෙනුවෙන් පෙනී සිටි ජ්‍යෙෂ්ඨ නීතිඥ මුකුල් රොහට්ගි තර්ක කළේ, වෛද්‍ය වැටුප්, තාක්ෂණය සහ යටිතල පහසුකම් සඳහා විශාල වියදමක් දැරීමට සිදුවන බැවින් ඖෂධ ලාභය එක්වරම අඩු කළහොත් රෝහල් පවත්වාගෙන යාම බිඳවැටෙන බවයි. එම පාඩුව පියවා ගැනීමට රෝගීන්ට සපයන අනෙකුත් සේවාවල ගාස්තු ඉහළ දැමීමට සිදුවන බව ඔහු පැවසීය.

එම තර්කය ප්‍රතික්ෂේප කළ විනිසුරු මඩුල්ල, ප්‍රතිකාර පතා එන අසරණ රෝගීන් කිසිසේත්ම එවැනි "මංකොල්ලයකට" (dacoity) ලක් නොවිය යුතු බව අවධාරණය කළේය. නියමිත මිල ඉක්මවා අය කිරීම හේතුවෙන් ඖෂධ සමාගම්වලින් රජයට අයවිය යුතු ඉන්දීය රුපියල් කෝටි 10,029ක මුදලින් මෙතෙක් අයකරගෙන ඇත්තේ රුපියල් කෝටි 1,582ක් පමණක් බවට පළවූ විගණන වාර්තාද අධිකරණයේ දැඩි අවධානයට ලක්විය.

සියලු පාර්ශ්වයන්ට ලිඛිත දේශන ඉදිරිපත් කිරීමට සති දෙකක කාලයක් ලබා දෙමින් ශ්‍රේෂ්ඨාධිකරණය සිය තීන්දුව ප්‍රකාශයට පත්කිරීම කල් තැබීය.

මූලාශ්‍ර සබැඳියක් :

The Hindu BusinessLine: Supreme Court on Drug Price Controls and Economic Policy