ෂැන්ග්‍රි-ලා ඉඩම් ගනුදෙනුව විමර්ශනයට ඉල්ලීමක් : ආයෝජන සුරක්ෂිතතාවට අභියෝගයක්ද?

පැමිණිල්ලේ මූලික කරුණු සහ පැනනැගී ඇති ගැටලු

2010 සහ 2011 වසරවලදී කොළඹ ගාලු මුවදොර පිහිටි අක්කර 10යි පර්චස් 11ක රජයේ ඉඩම් කොටසක් ෂැන්ග්‍රි-ලා සමාගම වෙත සෘජුව පැවරීමේදී නීතිමය ක්‍රමවේද උල්ලංඝනය වී ඇති බවට අල්ලස, දූෂණය හා නාස්තියට එරෙහි පුරවැසි බලය සංවිධානය චෝදනා කරයි.

එම සංවිධානයේ සභාපති ජාමුණි කමන්ත තුෂාර මහතා විසින් අල්ලස් හෝ දූෂණ චෝදනා විමර්ශන කොමිෂන් සභාව වෙත යොමු කරන ලද ලිපිය මඟින් පෙන්වා දෙන්නේ එවකට පැවති පාලනාධිකාරිය යටතේ රුපියල් මිලියන 13,749ක මුදලකට මෙම ඉඩම් පැවරීම සිදුව ඇති බවයි.

පැමිණිල්ල මතු කරන ප්‍රධාන ප්‍රශ්න 3 මෙසේය:

1- ක්‍රියාවලියේ වේගය: පළමු ඉඩම් කොටසට අදාළ මිනින්දෝරු පිඹුර සකස් කිරීම, ඔප්පුව ලිවීම සහ ලියාපදිංචිය දින තුනක් තුළ අවසන් වීම පිළිබඳව නීතිමය විමර්ශනයක් අවශ්‍ය බව පැමිණිලිකරුවෝ පවසති.

2- විනිවිදභාවය: විවෘත ටෙන්ඩර් කැඳවීමක් හෝ ප්‍රසිද්ධ වෙන්දේසියක් රහිතව රාජ්‍ය ඉඩම් පැවරීම සඳහා නිසි අමාත්‍ය මණ්ඩල අනුමැතිය සහ රජයේ නිල තක්සේරු වාර්තා පැවතියේද යන්න තහවුරු කළ යුතුය.

3- බලතල භාවිතය: රජයේ ඉඩම් ආඥා පනත යටතේ විධායකයට පැවරී ඇති බලතල අදාළ ගනුදෙනුවේදී නිසි සීමාවන් තුළ භාවිත කර ඇත්දැයි සොයා බැලිය යුතුය.

ආයෝජන වටිනාකම සහ සාර්ව ආර්ථික බලපෑම

චෝදනා සම්බන්ධයෙන් ස්වාධීන පරීක්ෂණයක් ඉල්ලා සිටින අතරතුර, ෂැන්ග්‍රි-ලා ව්‍යාපෘතිය මෙරට ආර්ථිකයට එක් කළ සැබෑ දායකත්වය සහ එහි ප්‍රාග්ධන වටිනාකම කෙරෙහිද ක්ෂේත්‍ර නිරීක්ෂකයින්ගේ විශේෂ අවධානය යොමුව තිබේ.

හොංකොං හි කූක් (Kuok) මූල්‍ය සමූහය සතු ෂැන්ග්‍රි-ලා සන්නාමය, යුද සමය නිමාවීමෙන් පසු ශ්‍රී ලංකාවට පැමිණි ප්‍රථම දැවැන්ත ගෝලීය සන්නාමයයි. ලොව පුරා හෝටල් සහ නිවාඩු නිකේතන 106ක් පවත්වාගෙන යන මෙම සමූහය මෙරට ආයෝජනය කළ මුදල ඩොලර් බිලියනයකට ආසන්න වන අතර, එය යුද්ධයෙන් පසු ජාත්‍යන්තර ආයෝජකයින් තුළ ශ්‍රී ලංකාව පිළිබඳ විශ්වාසය ගොඩනැගීමට මූලික විය.

දේශීය වෙළෙඳපොළට මෙම ව්‍යාපෘතියෙන් ලැබී ඇති ප්‍රධාන ප්‍රතිලාභ:

* සෘජු හා වක්‍ර රැකියා:
හෝටල් පද්ධතිය සහ සාප්පු සංකීර්ණය හරහා දේශීය වෘත්තිකයින් 1,800කට සෘජු රැකියා ද, තවත් පවුල් 5,000කට වැඩි පිරිසකට වක්‍ර ජීවනෝපාය අවස්ථා ද උදා වී තිබේ.

* සුළු හා මධ්‍ය පරිමාණ ව්‍යාපාර සඳහා වෙළෙඳපොළ:
One Galle Face සාප්පු සංකීර්ණය තුළ ක්‍රියාත්මක දේශීය ව්‍යාපාර 370කට අධික සංඛ්‍යාවක් හරහා වාර්ෂිකව රුපියල් බිලියන 25-30ක පමණ ආර්ථික සංසරණයක් සිදුවන අතර, එමඟින් දහසකට අධික අමතර රැකියා උත්පාදනය වේ.

* විදේශ විනිමය ආදායම:
ඉහළ මට්ටමේ සංචාරකයින් ආකර්ෂණය කර ගැනීම තුළින් රටට අඛණ්ඩව ඩොලර් ආදායමක් ගලා ඒමට මෙම ආයෝජනය ඉවහල් වී තිබේ.

නීතියේ ආධිපත්‍යය සහ ව්‍යාපාරික විශ්වාසය ආරක්ෂා කිරීම

රටකට විදේශ විනිමය (FDI) අත්‍යවශ්‍ය මොහොතක, අතීත පරිපාලන තීරණ විමර්ශනය කිරීමේදී වර්තමාන ව්‍යාපාරික ප්‍රජාව වෙත ලබාදෙන පණිවිඩය ඉතා සංවේදී එකකි.

ගනුදෙනුවලදී නිසි ක්‍රියාපටිපාටිය අනුගමනය කර ඇත්දැයි සොයා බැලීම රාජ්‍යයක වගකීමක් වන සේම, ශ්‍රී ලංකාව කෙරෙහි විශ්වාසය තබා දැවැන්ත ප්‍රාග්ධනයක් යෙදවූ අව්‍යාජ ආයෝජකයින්ට අනිසි බලපෑමක් හෝ බියක් ඇති නොවන පරිදි සුරක්ෂිත වටපිටාවක් පවත්වා ගැනීමද රජයක ප්‍රමුඛ වගකීමක් බව ආර්ථික විශ්ලේෂකයෝ පෙන්වා දෙති.

පැමිණිල්ල සම්බන්ධ විමර්ශන සාධාරණව සහ ස්වාධීනව සිදු විය යුතු අතර, ඒවා ක්‍රියාත්මක විය යුත්තේ දැනට දහස් ගණනකට රැකියා සපයමින් රටට විදේශ විනිමය උපයන ආයෝජන ව්‍යාපෘතිවල ස්ථාවරත්වයට සහ මෙරට සමස්ත ආයෝජන ප්‍රතිරූපයට හානි නොවන පරිදිය.