ජීවිත දහසක් බේරාගන්න කාන්තා මන්ත්‍රීවරියන්ගෙන් දීපව්‍යාප්ත මෙහෙයුමක්

නිහඬව පැතිරෙන සෞඛ්‍ය අභියෝගය

මෙරටින් වාර්ෂිකව අලුතින් හඳුනාගන්නා පියයුරු පිළිකා රෝගීන් සංඛ්‍යාව 6,000කට ආසන්න බව පාර්ලිමේන්තු සන්නිවේදන දෙපාර්තමේන්තුවේ දත්ත සනාථ කරයි.

වසරකට කාන්තාවන් 1,000කට වැඩි පිරිසකට ජීවිත අහිමි වීමට මූලිකම හේතුව වී ඇත්තේ රෝගය අවසන් අදියර දක්වා හඳුනා නොගැනීමයි.

මුල් අවධියේදීම හඳුනාගතහොත් පියයුරු පිළිකා 100%ක්ම පාහේ සුවකළ හැකි බව පිළිකා මර්දන විශේෂඥ වෛද්‍යවරු අවධාරණය කරති.

නොවැම්බර් 02 තෝරාගැනීමේ අරමුණ

ලොව පුරා ඔක්තෝබර් මාසය නම් කර තිබුණේ 'රෝස පැහැ ඔක්තෝබරය' හෙවත් ජාත්‍යන්තර පියයුරු පිළිකා දැනුවත් කිරීමේ මාසය වශයෙනි.

මාසයක් පුරා මාධ්‍ය සහ සම්මන්ත්‍රණවලට සීමා වූ දැනුවත් කිරීම් හුදු වචනවලින් ඔබ්බට ගෙන ගොස්, ක්ෂේත්‍ර මට්ටමේ ප්‍රායෝගික වැඩපිළිවෙළක් බවට පත්කිරීම මෙම ව්‍යාපෘතියේ අපේක්ෂාවයි.

ඔක්තෝබර් මාසයේ ලබාදුන් පණිවිඩය සැබෑ බිම් මට්ටමේ ක්‍රියාවක් බවට පත්කරමින් නොවැම්බර් මුල් සතියේදීම සායන අරඹන්නේ ඒ අනුවයි.

පවුලේ පිරිමි පාර්ශ්වයට පැවරෙන වගකීම

පියයුරු පිළිකා පරීක්ෂාව හුදෙක් කාන්තාවන්ට පමණක් පැවරෙන කටයුත්තක් නොවන අතර එය සමස්ත පවුලේම පැවැත්ම හා බැඳුණු සාමූහික වගකීමකි.

බොහෝ මව්වරුන් සහ තරුණියන් අනවශ්‍ය ලැජ්ජාව, බිය හෝ ගෙදරදොර වැඩකටයුතු නිසා තමන්ගේ සිරුරේ හටගන්නා වෙනස්කම් පරීක්ෂා කරගැනීම කල් දමයි.

තම මව, බිරිඳ, දියණිය හෝ සොයුරිය ළඟම පිහිටි සුවනාරි සායනය වෙත කැඳවාගෙන ගොස් මූලික පරීක්ෂාවට යොමු කරවීම පවුලේ පිරිමි පාර්ශ්වය සතු මඟහැරිය නොහැකි යුතුකමක් ලෙස වෛද්‍ය විශේෂඥයෝ පෙන්වා දෙති.

ගම් මට්ටමට යන සුවනාරි සායන

නොවැම්බර් 2 වැනිදා සිට ආසන සහ දිස්ත්‍රික් මට්ටමින් ප්‍රජා සායන පැවැත්වීමට කාන්තා මන්ත්‍රීවරියන් සෘජුව සම්බන්ධ වෙයි.

විශේෂයෙන්ම ග්‍රාමීය, වතුකරයේ සහ අඩු පහසුකම් සහිත නාගරික ප්‍රජාවන්හි කාන්තාවන් ප්‍රාදේශීය සෞඛ්‍ය වෛද්‍ය නිලධාරී (MOH) කාර්යාල යටතේ ක්‍රියාත්මක 'සුවනාරි සායන' සහ විශේෂඥ පරීක්ෂණ මධ්‍යස්ථාන වෙත යොමු කිරීම මෙහි ප්‍රමුඛ ඉලක්කයකි.

මෙම රජයේ සායනවලදී සියලු පරීක්ෂාවන් සහ උපදෙස් සම්පූර්ණයෙන්ම නොමිලේ ලබාදේ.

වයස 35-45 කාන්තාවන්ට විශේෂ සැලසුමක්

ලබන වසරේ සිට ක්‍රියාත්මක වන පරිදි වයස අවුරුදු 35 ත් 45 ත් අතර මෙරට සියලු කාන්තාවන් විධිමත් පූර්ණ සායනික පරීක්ෂාවකට (Screening) යොමු කිරීමට සෞඛ්‍ය අමාත්‍යාංශය කටයුතු යොදා තිබේ.

මීට අමතරව එළඹෙන ජනවාරි මාසය තුළදී ගැබ්ගෙල පිළිකා පිළිබඳ දැනුවත් කිරීමේ ජාතික වැඩසටහනක් දියත් කිරීමට ද සැලසුම් කර ඇත.