ගව ඝාතනයට ගුජරාටයේ තිදෙනෙකුට ජීවිතාන්තය දක්වා සිරදඬුවම්

ආගමික මූලාශ්‍ර උපුටා දැක්වූ අධිකරණ තීන්දුව

ගුජරාටයේ ගාන්ධිනගර් දිස්ත්‍රික්කයට අයත් කාලෝල් අතිරේක සැසි අධිකරණයේ විනිසුරු බ්‍රිජේෂ්කුමාරි රාජ්පුත් මහත්මිය විසින් මෙම නියෝගය ප්‍රකාශයට පත් කරනු ලැබීය. තීන්දුව ආරම්භයේදීම සංස්කෘත ශ්ලෝකයක් සහ මනුස්මෘතිය උපුටා දක්වමින් අධිකරණය පෙන්වා දී ඇත්තේ ගවයා සුරැකීම ආගමික හා මානුෂීය වගකීමක් වන අතර යුක්තිය පසිඳලීම මගින් සත්‍යය ආරක්ෂා වන බවයි.

වේද ග්‍රන්ථවලට අනුව බ්‍රහ්ම දෙවියන්ගේ අමෘත බිංදු මිහිතලයට පතිත වීමෙන් 'සුරභි' හෙවත් කාමධේනුව පහළ වූ බවත්, ගවයා තිස්තුන් කෝටියක් දෙවිවරුන් වැඩවසන විශ්වයේ මෑණියන් බවත් තීන්දුවේ සඳහන් වේ. ගවයාගේ පාද සතර වේද හතර සංකේතවත් කරන බවද විනිසුරුවරිය පෙන්වා දුන්නාය.

ජම්ලා ගම්මානයේ රහසිගත වැටලීම

නඩුවට පාදක වන සිදුවීම වාර්තා වන්නේ 2024 අගෝස්තු 22 වැනිදා කාලෝල් තාලුකාවේ ජම්ලා ගම්මානයේ ධන්කානි වාස් ප්‍රදේශයේ පිහිටි නිවසක් පරීක්ෂා කිරීමෙනි. එහිදී නිලධාරීන් විසින් නීතිවිරෝධීව ළඟ තබාගෙන සිටි ගව මස් කිලෝග්‍රෑම් 277ක්, මස් ප්‍රවාහනයට සූදානම් කළ වාහනයක් සහ සතුන් ඝාතනයට යොදාගත් ආයුධ සිය භාරයට ගෙන තිබේ.

විමර්ශනවලදී හෙළිව ඇත්තේ ලාල්බායි සෙන්මා සහ ඔහුගේ පුත්‍රයා එක්ව කිරි ලබාගත නොහැකි, දුර්වල ගවයන් සහ මී ගවයන් අඩු මිලට මිලදී ගෙන ඇති බවයි. පසුව අහමදාබාද් සිට පැමිණි පිරිසක් ලවා එම සතුන් ඝාතනය කර මස් අලෙවි කිරීමේ ජාවාරමක් පවත්වාගෙන ගොස් තිබේ.

සාක්ෂි විභාගය සහ වරදකරුවන් වීම

පැමිණිල්ල වෙනුවෙන් සාක්ෂිකරුවන් 54 දෙනෙකුගේ සාක්ෂි සහ ලේඛනගත සාක්ෂි 18ක් අධිකරණයට ඉදිරිපත් කෙරිණි. නම් කරන ලද සැකකරුවන් හයදෙනා අතුරින් ලාල්බායි සෙන්මා නඩු විභාගය අතරතුර මියගිය අතර, ගුලාම් මොයින් සහ විත්තල් නොහොත් භූපත් යන දෙදෙනා සාක්ෂි ප්‍රමාණවත් නොවීම මත නිදහස් විය.

අහමදාබාද්හි පදිංචිකරුවන් වන 34 හැවිරිදි වසීම් කුරේෂි, 24 හැවිරිදි මොහොමඩ් රෆීක් කුරේෂි සහ 19 හැවිරිදි අස්ෆාක් බහෙලිම් යන තිදෙනා චෝදනාවලට වරදකරුවන් බව අධිකරණය තීන්දු කළේය.

2017 සංශෝධිත නීතිය සහ දඬුවම

1954 ගුජරාට් සත්ත්ව සංරක්ෂණ පනත 2017 වසරේදී සංශෝධනය කරමින් ගව ඝාතනය සම්බන්ධ වැරදි සඳහා ජීවිතාන්තය දක්වා සිරදඬුවම් නියම කිරීමට විධිවිධාන සලසා ඇත. ඒ අනුව වරදකරුවන් වූ තිදෙනාට ජීවිතාන්තය දක්වා සිරදඬුවමට අමතරව එක් අයෙකුට ඉන්දීය රුපියල් ලක්ෂ 3 බැගින් වූ දඩ මුදලක් ද නියම කෙරිණි.

මෙම නඩු තීන්දුව සම්බන්ධයෙන් අදහස් දක්වමින් ගුජරාට් ප්‍රාන්ත නියෝජ්‍ය මහ ඇමති හර්ෂ් සංඝවි සිය X ගිණුමේ සටහනක් තබමින් ප්‍රකාශ කර ඇත්තේ ගව ඝාතනය සිදුකරන කිසිවෙකුට නීතියෙන් ගැලවීමක් නොමැති බවට මෙය ප්‍රබල පණිවිඩයක් ලබාදෙන බවයි.

විශ්වාසනීය මූලාශ්‍රය:

The Indian Express: Cow regarded as ‘mother of the world’: Gandhinagar court sentences three to life (Express News Service, Ahmedabad)

විනිවිද නිවුස් වාර්තාව:  ඉන්දියාවේ ගව ඝාතනයකට තිදෙනකුට ජීවිතාන්තය දක්වා සිරදඬුවම්