කිංස්බරි සීසීටීවී අර්බුදය: සරත් වීරසේකරගෙන් රු. මිලියන 100ක එන්තරවාසියක්

සීසීටීවී දර්ශන සමාජ මාධ්‍යයට ගිය හැටි

හිටපු මහජන ආරක්ෂක අමාත්‍ය රියර් අද්මිරාල් ආචාර්ය සරත් වීරසේකර පසුගිය ඔක්තෝබර් 24 වැනිදා කොළඹ කිංස්බරි හෝටලය වෙත පැමිණි අවස්ථාවේ පටිගත වූ ආරක්ෂිත කැමරා (CCTV) දර්ශන කිහිපයක් සංස්කරණය කර සමාජ මාධ්‍ය වෙත මුදාහැර ඇති බවට චෝදනා එල්ල වේ.

අදාළ සිදුවීම මුල්කරගනිමින් හෝටල් පාලනාධිකාරියෙන් රුපියල් මිලියන 100 ක වන්දියක් අය කරගැනීමට නීතිමය පියවර ගන්නා බව දන්වමින්, 'පෙරේරා සෙනෙවිරත්න ඇසෝසියේට්ස්' නීතිඥ සමාගම මගින් ඔක්තෝබර් 29 වැනිදා මෙම එන්තරවාසිය යොමු කර තිබේ.

සත්‍යය විකෘති කිරීම සහ බරපතල චෝදනා

අදාළ සංස්කරණය කරන ලද වීඩියෝ පට මගින් සරත් වීරසේකර සහ පූජ්‍ය බලංගොඩ කස්සප හිමියන් එකම අවස්ථාවක හෝ ආසන්න වේලාවන්හිදී හෝටල් කාමරයකට ඇතුළු වූ බවට ජනතාව තුළ මුලා කරවනසුලු මතයක් ජනගත කිරීමට උත්සාහ කර ඇති බව නීතිඥවරු පෙන්වා දෙති. එම මතය සම්පූර්ණයෙන්ම සාවද්‍ය බව ඔහුගේ පාර්ශ්වය දැඩිව අවධාරණය කරයි.

වීඩියෝවේ පෙනී සිටින හිටපු අමාත්‍යවරයාගේ පෞද්ගලික ලේකම්වරයාව, හිටපු ජාතික බුද්ධි ප්‍රධානී කපිල හෙන්දාවිතාරණ ලෙස අසත්‍ය ලෙස හඳුන්වමින් ඇතැම් ෆේස්බුක් පිටු ඔස්සේ ප්‍රචාරය කර ඇති බවද එම එන්තරවාසියේ පැහැදිලිව පෙන්වා දී ඇත.

හෝටල් පාලනාධිකාරියට එල්ල වන සෘජු චෝදනාව

ෆේස්බුක් පිටු සහ යූටියුබ් නාලිකා මෙහෙයවන පාර්ශ්ව කිහිපයක් සමග කුමන්ත්‍රණය කරමින් හෝටල් පාලනාධිකාරිය මෙම දර්ශන සහ ඡායාරූප හිතාමතා පිටතට මුදාහැර ඇති බවට එන්තරවාසිය මගින් සෘජුවම චෝදනා එල්ල කරයි.

පාරිභෝගිකයින්ගේ පෞද්ගලිකත්වය සුරැකීමට බැඳී සිටින තරු පහේ හෝටලයක පූර්ණ භාරකාරත්වය යටතේ පවතින අභ්‍යන්තර ආරක්ෂිත දර්ශන, ආයතනයේ දැනුවත්භාවයකින් තොරව පිටතට යා නොහැකි බව නීතිඥවරු තර්ක කරති. මේ හරහා හිටපු අමාත්‍යවරයා සමාජය ඉදිරියේ දැඩි මානසික පීඩාවකට මෙන්ම අන්තර්ජාල අපහාසයන්ට ලක්ව ඇති බව සඳහන් වේ.

දින 7ක කාලසීමාව සහ නීතිමය ක්‍රියාමාර්ග

එන්තරවාසිය ලැබී දින 7ක් ඇතුළත අදාළ දර්ශන ලබාදුන් පුද්ගලයින් හෙළිදරව් කිරීම, අන්තර්ජාලයේ ඇති වීඩියෝ ඉවත් කිරීම, ප්‍රසිද්ධියේ කනගාටුව පළකිරීම සහ ඉදිරියේදී මෙවැනි අනුමත නොකළ තොරතුරු පිටතට නොයවන බවට ලිඛිත සහතිකයක් දීම හෝටලයට අනිවාර්ය කර ඇත.

මෙම කොන්දේසි පැහැර හරින්නේ නම් අපහාස කිරීම සහ පුද්ගලිකත්වය උල්ලංඝනය කිරීම වෙනුවෙන් රුපියල් මිලියන 100 ක වන්දියක් අය කරගැනීමට නඩු පවරන බව පවසන නීතිඥවරු, මේ සම්බන්ධයෙන් ශ්‍රී ලංකා පොලීසිය, මාර්ගගත ක්‍රමවල සුරක්ෂිතභාවය පිළිබඳ කොමිෂන් සභාව (Online Safety Commission) සහ ශ්‍රී ලංකා සංචාරක සංවර්ධන අධිකාරිය වෙතද පැමිණිලි කිරීමට පියවර ගන්නා බව දන්වා තිබේ.