බලතල විමධ්‍යගතකරණය සහ මුල්‍ය ප්‍රතිපාදන හමුවේ මධ්‍යම රජය සහ පළාත් සභා අතර මතුවන ව්‍යවස්ථාපිත අභියෝග
දීර්ඝ කාලයක සිට අලුත්වැඩියා නොකිරීම හේතුවෙන් දැඩි ලෙස අබලන් වී ඇති පළාත් සභා සහ පළාත් පාලන ආයතන යටතේ පවතින මාර්ග රැසක පුනරුත්ථාපන කටයුතු මාර්ග සංවර්ධන අධිකාරිය (RDA) වෙත පැවරීමේ හැකියාව අධ්‍යයනය කිරීම සඳහා අමාත්‍ය මණ්ඩල අනුමැතිය හිමිව තිබේ.
මෙම පියවර ජනතාවගේ හදිසි ප්‍රවාහන අවශ්‍යතාවලට ප්‍රතිචාරයක් ලෙස ආණ්ඩුව දක්වන අතර, එමඟින් පළාත් සභා සහ පළාත් පාලන ආයතන සතුව පවතින යටිතල පහසුකම් නඩත්තු කිරීමේ අභියෝගය සහ ප්‍රතිපාදන හිඟකම නැවතත් කරලියට පැමිණ ඇත.
කැබිනට් මාධ්‍ය ප්‍රකාශක අමාත්‍ය වෛද්‍ය නලින්ද ජයතිස්ස සඳහන් කළේ, හදිසි අලුත්වැඩියාවන් අවශ්‍ය වන පළාත් සභා සහ පළාත් පාලන මාර්ග මාර්ග සංවර්ධන අධිකාරිය හරහා සංවර්ධනය කිරීමේ නෛතික හා පරිපාලනමය පදනම අධ්‍යයනය සඳහා නිලධාරී කමිටුවක් පත්කිරීමට අමාත්‍ය මණ්ඩලය තීරණය කළ බවයි.
දිස්ත්‍රික් සංවර්ධන කමිටු රැස්වීම්වලදී ජනතාව සහ රාජ්‍ය නිලධාරීන් විසින් නිරන්තරයෙන් කරනු ලබන ඉල්ලීම් සැලකිල්ලට ගනිමින් මෙම තීරණය ගෙන තිබේ. මෙලෙස පළමු අදියර යටතේ හදිසි සංවර්ධනය සඳහා මාර්ග 60ක් පමණ හඳුනාගෙන ඇති බව වාර්තා වේ.
ව්‍යවස්ථාපිත බලතල සහ මුල්‍ය අර්බුදය
පළාත් සභාවල ව්‍යවස්ථාපිත බලතලවලට හානියක් නොවන පරිදි මෙම යෝජිත ක්‍රමවේදය ක්‍රියාත්මක කරන්නේ කෙසේද යන්න අදාළ කමිටුව හමුවේ ඇති ප්‍රධාන අභියෝගයකි. මාර්ගවල අයිතිය සම්පූර්ණයෙන්ම මධ්‍යම රජයට පවරාගැනීම වෙනුවට, එහි අයිතිය සහ නඩත්තුව පළාත් සභා වෙත තබමින් සංවර්ධන කටයුතු පමණක් මාර්ග සංවර්ධන අධිකාරිය හරහා සිදුකිරීමේ ආකෘතියක් කෙරෙහි ආණ්ඩුවේ අවධානය යොමු වී ඇත.
පත්කරන ලද කමිටුව සඳහා මුදල්, ක්‍රමසම්පාදන හා ආර්ථික සංවර්ධන අමාත්‍යාංශය, ප්‍රවාහන, මහාමාර්ග හා නාගරික සංවර්ධන අමාත්‍යාංශය, රාජ්‍ය පරිපාලන, පළාත් සභා හා පළාත් පාලන අමාත්‍යාංශය, මුදල් කොමිෂන් සභාව, කළමනාකරණ සේවා දෙපාර්තමේන්තුව, පළාත් ප්‍රධාන ලේකම්වරයෙකු, මාර්ග සංවර්ධන අධිකාරිය සහ පළාත් මාර්ග සංවර්ධන අධිකාරියක නියෝජිතයන් ඇතුළත් කර ඇත.
මෙම කමිටුවේ සංයුතිය අනුව, ව්‍යාපෘතිය සඳහා මුදල් වෙන්කිරීම් සහ ප්‍රතිපාදන ලබාදීමේ ක්‍රමවේදය වඩාත් සංකීර්ණ වනු ඇතැයි අපේක්ෂා කෙරේ. සංවර්ධන පිරිවැය මධ්‍යම රජය විසින් දරන්නේද, නැතහොත් පළාත් සභා ප්‍රතිපාදනවලින් කොටසක් වෙන්කෙරෙන්නේද යන්න ඉදිරියේදී තීරණය වනු ඇත.
මධ්‍යම රජය සහ පළාත් සභා අතර මාර්ග බෙදීම
දැනට පවතින නීතිමය රාමුවට අනුව, ජාතික මහාමාර්ග පද්ධතියට අයත් 'A' සහ 'B' ශ්‍රේණියේ මාර්ග, අධිවේගී මාර්ග සහ ප්‍රධාන පාලම් පාලනය වන්නේ මාර්ග සංවර්ධන අධිකාරිය (RDA) යටතේය.
අභ්‍යන්තර සහ ග්‍රාමීය මාර්ග අයත් වන්නේ පළාත් සභා සහ ප්‍රාදේශීය සභා යටතට වන අතර, තාක්ෂණික ශ්‍රම හිඟකම සහ අයවැය සීමාවන් හේතුවෙන් එම මාර්ග දීර්ඝ කාලයක් අලුත්වැඩියා නොවීම පිළිබඳ මහජන විරෝධයක් පවතී.
(සටහන | සම්පත් ධීරසේකර )
මුලාශ්‍රය :
Sixty Provincial Roads Face RDA Takeover amid Maintenance Crisis
