රජයේ ප්‍රවෘත්ති දෙපාර්තමේන්තුවේ ඊයේ (12) පැවැති කැබිනට් තීරණ දැනුම්දීමේ මාධ්‍ය හමුවේ දී ඇමැතිවරයා මේ බව ප්‍රකාශ කළේය.
පසුගිය ආණ්ඩු සේ එකවර 50,000-60,000 බඳවා ගෙන පුටුවක් මේසයක් නැති තත්ත්වයට උපාධිධාරීන් පත් කිරීමට වත්මන් රජය කටයුතු නොකරන බව හෙතෙම කීවේය.
විද්‍යානුකූලව රටේ පවතින ආර්ථික තත්ත්වය, මහජනතාවට සැපයිය යුතු සේවාව අනුව තීන්දු කර බඳවා ගැනීම් සිදුකරන බව පැවැසූ ඇමැතිවරයා, උද්ඝෝෂණ සිදුකර රැකියා ඉල්ලා සිටීමට අවශ්‍ය නැති බව කියා සිටියේය.
ඇමැතිවරයා වැඩිදුරටත් මෙසේද පැවැසීය.
'' මෙච්චර කාලයක් රැකියා විරහිත උපාධිධාරීන් බඳවා ගෙන තිබෙන්නේ දේශපාලන ඉල්ලීම්, එහෙම නැත්නම් ඒ මොහොතේ රජය ගන්න තීන්දු මත. කවුරු බඳවා ගත්තත් ඒ අයට වැටුප්, දීමනා ලබා දිය යුතුයි. රජය විසින් ඒ වැය බර දරන අතරේ ඒ අයගෙන් උපරිම ඵලදායී සේවයක් මහජනතාව වෙත ලබාදිය යුතුයි. පසුගිය කාලයේම බඳවා ගත්ත සමහර තනතුරුවලට විශාල විවේචනයක් තිබුණා. ඒ බඳවා ගත්ත උපාධිධාරීන් ගැන නෙවෙයි. ඒ බඳවා ගත්ත අයට වැඩ කරගන්නවත් පහසුකම් නැහැ.
ප්‍රාදේශීය ලේකම් කාර්යාලයක වැඩ කරගන්න මේසයක්, පුටුවක් නැහැ. තැනක් නැහැ වගේ කතා බහක් තිබුණා. අපි මැතිවරණ කාලයෙදිත් පැහැදිලිව කිව්වා රාජ්‍ය සේවය කළමනාකරණය කරගැනීම, ඵලදායී කරගැනීම, ප්‍රශස්ත කර ගැනීම සඳහා ඊට වුවමනා බඳවා ගැනීම් කරනව මිසක් අන්ධව බඳවා ගැනීම් කරන්නේ නැහැ කියලා. ඒ අනුව මේ රාජ්‍ය සේවයේ බඳවා ගැනීම් පිළිබඳ තීන්දු ගැනීම සඳහා අගමැති ලේකම්වරයාගේ ප්‍රධානත්වයෙන් කමිටුවක් පත් කරලා තිබෙනවා. ඒ සියලු බඳවා ගැනීම් ගැන අමාත්‍යාංශය ඊට යොමු කරනවා. එතැනදි මුදල් අමාත්‍යාංශය, කළමනාකරණ දෙපාර්තමේන්තුව, රාජ්‍ය පරිපාලන අමාත්‍යාංශය ඇතුළු විෂයට සම්බන්ධ නිලධාරීන් විසින් විටින් විට බඳවා ගැනීම් සඳහා අනුමැතිය ලබා දී තිබෙනවා.
මේ ආකාරයට 62,314ක් අලුතින් රාජ්‍ය සේවය සඳහා බඳවා ගැනීමට අනුමැතිය ලබා දී තිබෙනවා. සමහර බඳවා ගැනීම් අවසන් කරලා තිබෙන්නේ. සමහර බඳවා ගැනීම් සඳහා විභාග පැවැත්වෙනවා. සමහර බඳවා ගැනීම්වලට සම්මුඛ පාරීක්ෂණ සිදු කෙරෙනවා.
මේ 62,314 අතරේ ආරක්ෂක අමාත්‍යාංශයට 12,433ක් බඳවා ගන්න අනුමැතිය ලබා දී තිබෙනවා.
ශ්‍රී ලංකා යුද හමුදාවට නිලධාරීන් ඇතුළු 4415ක්, නාවික හමුදාවට නිලධාරීන් ඇතුළු 5200ක් සහිතව 12,433ට බඳවා ගැනීමට අවසර ලබා දී තිබෙනවා.
සෞඛ්‍ය හා ජනමාධ්‍ය අමාත්‍යාංශයට 11,889ක් බඳවා ගන්න අනුමැතියක් ලබා දී තිබෙනවා. වෛද්‍ය නිලධාරීන් 1408ක්, හෙඳ නිලධාරීන් 3147ක්, පවුල් සෞඛ්‍ය සේවා නිලධාරීන් 976ක්, උපස්ථායකයින් 1000ක්, සෞඛ්‍ය කාර්ය සහායකයන් 1039ක් ඇතුළු සෞඛ්‍ය අමාත්‍යාංශයටත්, ඒ වගේම තැපැල් දෙපාර්තමේන්තුවට තැපැල් සහායකයන් 1000ක්, ලියාපදිංචි ආදේශකයන් 1000ක්, තැපැල් සේවා නිලධාරීන් 600ක්, උප තැපැල් ස්ථානාධිපතිවරුන් 378ක් ලෙස බඳවා ගන්න අනුමැතිය දීල තිබෙනවා. මේ අනුව අමාත්‍යාංශ සියල්ලට ඔවුන්ගේ අවශ්‍යතාව අනුව බඳවා ගැනීම් කරලා තිබෙනවා.
උපාධිධාරීන්ට ඉල්ලුම් කරන්න පුළුවන් තනතුරු දහස් ගාණක් මේක ඇතුළේ තිබෙනවා. රාජ්‍ය පරිපාලන හා පළාත් සභා අමාත්‍යාංශය යටතේ ශ්‍රී ලංකා පරිපාලන සේවයට 297ක්, ශ්‍රී ලංකා ගණකාධිකාරී සේවයට 499ක්, ශ්‍රී ලංකා ක්‍රමසම්පාදන සේවයට 139ක්, ශ්‍රී ලංකා ඉංජිනේරු සේවයට 249ක්, ශ්‍රී ලංකා විද්‍යාත්මක සේවයට 126ක්, කළමනාකරණ සේවා නිලධාරී සේවයට 4505ක්, ලෙස බඳවා ගැනීමට අනුමැතිය ලබා දී තිබෙනවා. අධ්‍යාපන අමාත්‍යාංශයේ තනතුරු ගණනාවක් තිබෙනවා.
ජාතික ජලසම්පාදන හා ජලාපවහන මණ්ඩලයේ කළමනාකාර සහකාරවරුන් ලෙස 95ක්, ධීවර නිලධාරීන් 121ක්, බන්ධනාගාර දෙපාර්තමේන්තුවේ සැරයන්වරු ලෙස 150ක්, සහකාර කෘෂිකර්ම අධ්‍යක්ෂවරුන් 260ක්, කෘෂිකර්ම උපදේශකවරුන් 185ක්, තාක්ෂණ සහයක ව්‍යාපෘති පර්යේෂණ ඉංජිනේරු 123ක්, ගොවිජන සංවර්ධන නිලධාරීන් 126ක්, ආධුනික මින්දෝරුවරුන් 33ක්, සිතියම් තාක්ෂණික නිලධාරීන් 64ක්, මැනුම් ක්ෂේත්‍ර සහායකයන් 75ක්, විදුලි ඉංජිනේරු අධිකාරී 105ක්, ළමා ආරක්ෂක අධිකාරිය සඳහා 109ක්, ප්‍රමිති ආයතනයේ විවිධ තනතුරු සඳහා 179ක්, කාර්මික තාක්ෂණ ආයතනයේ 150ක්, කම්කරු නිලධාරීන් ලෙස විශේෂ ශ්‍රේණියෙන් 159ක්, රජයේ තක්සේරු දෙපාර්තමේන්තුවේ සහකාර තක්සේරුවරුන් 184ක්, සුරාබදු දෙපාර්තමේන්තුවේ අධිකාරී, පර්යේෂක, නියාමක, සැරයන් ආදී 108ක් ලෙස ඉල්ලුම් කරන්න පුළුවන් තනතුරු රාශියක් තිබෙනවා.
ඉදිරියේදී අධ්‍යාපන අමාත්‍යාංශය ගුරුවරුන් දහස් ගාණක් බඳවා ගන්න කටයුතු කරනවා. අපි 50,000-60,000 එකවර බඳවා ගෙන පුටුවක් මේසයක් නැතුව තියන්න බලාපොරොත්තුවකුත් නැහැ. පෝලිමේ එන්න කියලා උස බලලා බඳවා ගන්නෙත් නැහැ. විද්‍යානුකූලව රටේ පවතින ආර්ථික තත්ත්වය මහජනතාවට සැපයුතු සේවාව අනුව තමයි තීන්දු කරලා තිබෙන්නේ. ඉදිරියට තව වැඩි වෙනවා. උද්ඝෝෂණ කරල ඉල්ලන්න දෙයක් නැහැ.”
(dinamina | නුවන් කොඩිකාර)
