*බාහිර ජංගම ගිණුමේ හිඟයක් මැද වුවද ජූනි අවසන් වන විට නිල සංචිත ප්‍රමාණය ඩොලර් බිලියන 6.45ක් දක්වා ඉහළට
දේශීය මෙන්ම ගෝලීය ආර්ථිකයේ සිදුවෙමින් පවතින වෙනස්කම් සහ ඉදිරි ප්‍රවණතාවන් පුළුල් ලෙස විශ්ලේෂණය කිරීමෙන් අනතුරුව, ශ්‍රී ලංකා මහ බැංකුවේ මුදල් ප්‍රතිපත්ති මණ්ඩලය විසින් සිය ප්‍රතිපත්ති පොලී අනුපාතිකය 8.75%ක වත්මන් මට්ටමේම තවදුරටත් පවත්වා ගැනීමට තීරණය කර ඇත.
ඊයේ (21) පැවැති මුදල් ප්‍රතිපත්ති මණ්ඩල රැස්වීමේදී මෙම තීරණයට එළඹි බව මහ බැංකුව නිල වශයෙන් නිවේදනය කළේය.
ගෝලීය සහ දේශීය උද්ධමන පීඩනය
මැදපෙරදිග කලාපයේ පවතින නොසන්සුන්කාරී වාතාවරණය නැවතත් උත්සන්න වීමත් සමඟ ගෝලීය වෙළෙඳපොළේ ඛනිජ තෙල් ඇතුළු ප්‍රධාන භාණ්ඩවල මිල ගණන් ඉහළ යාම මෙම තීරණය සඳහා ප්‍රධාන වශයෙන් බලපා තිබේ. මෙම තත්ත්වය සමස්ත ගෝලීය ආර්ථික වර්ධනයට මෙන්ම විවිධ මාර්ග ඔස්සේ ශ්‍රී ලංකාවේ ආර්ථිකයට ද බලපෑම් එල්ල කළ හැකි බව මහ බැංකුව පෙන්වා දෙයි.
මේ අතර, 2026 ජූනි මාසය වන විට ශ්‍රී ලංකාවේ සමස්ත උද්ධමනය වාර්ෂික පදනම මත 6.8%ක් දක්වා ඉහළ ගොස් ඇත. දේශීය වශයෙන් බලශක්ති සහ ආහාර ද්‍රව්‍යවල මිල ඉහළ යාම ඊට ප්‍රධාන ලෙස හේතු වී තිබේ. ඉදිරි කෙටි කාලසීමාව තුළ උද්ධමනය 5%ක අපේක්ෂිත ඉලක්කගත මට්ටමට වඩා තරමක් ඉහළින් පැවැතිය හැකි වුවද, ඉදිරියේදී එය නැවතත් ඉලක්කගත මට්ටම වෙත ළඟා වනු ඇති බවට පුරෝකථනය කර ඇත.
බාහිර අංශයේ පීඩනය සහ විදේශ සංචිත
මැදපෙරදිග ගැටුම් හේතුවෙන් බාහිර අංශයට එල්ල වූ පීඩනය යම් තරමකට සමනය වී තිබුණ ද, භූ-දේශපාලනික ආතතීන් හමුවේ ඉදිරි ආර්ථික දැක්ම තවදුරටත් අවිනිශ්චිත ස්වභාවයක් ගන්නා බව මහ බැංකුව වැඩිදුරටත් සඳහන් කරයි.
ඉහළ ගිය ඉන්ධන ආනයන වියදම් හේතුවෙන් වෙළෙඳ හිඟය පුළුල් වීම සහ සංචාරක ආදායම්හි දක්නට ලැබුණු මන්දගාමී ස්වභාවය මත 2026 අප්‍රේල් මාසයේ සිට බාහිර ජංගම ගිණුමේ යම් හිඟයක් වාර්තා වී තිබේ. කෙසේ වෙතත්, මෝටර් රථ ඇතුළු අනවශ්‍ය ආනයන පාලනයට ගත් පියවර හේතුවෙන් ඉදිරියේදී ආනයන ඉල්ලුම පහත වැටෙනු ඇති බවට අපේක්ෂා කෙරේ.
සංචිත සහ රුපියල:
විදේශගත ශ්‍රමිකයන්ගේ ප්‍රේෂණ ශක්තිමත්ව පැවැතීම සහ විදේශ ණය සේවා ගෙවීම් පවත්වාගෙන යාම අතරතුරදී පවා 2026 ජූනි මස අවසානය වන විට ශ්‍රී ලංකාවේ දළ නිල සංචිත ප්‍රමාණය ඇමෙරිකානු ඩොලර් බිලියන 6.45ක් ලෙස සටහන් විය. එමෙන්ම පසුගිය සති කිහිපය තුළ ශ්‍රී ලංකා රුපියලද සාපේක්ෂව ස්ථාවර මට්ටමක පැවැති බව මහ බැංකුව පවසයි.
මෙම සියලු තත්ත්වයන් හමුවේ, ආර්ථිකයේ ඉල්ලුම් කළමනාකරණය සහ මිල ස්ථාවරත්වය තහවුරු කිරීම වෙනුවෙන් වත්මන් ප්‍රතිපත්ති පොලී අනුපාතිකය වෙනස් නොකිරීම වඩාත් සුදුසු බවට මහ බැංකුව තීරණය කර ඇත.
