*ඩිජිටල් ගෙවීම් සහ පෞද්ගලික අංශයේ හවුල්කාරිත්වය සමග නාගරික ප්‍රවාහනය නව මාවතකට
ශ්‍රී ලංකාවේ පොදු ප්‍රවාහන පද්ධතිය නවීකරණය කිරීම සහ මගී ජනතාව මුහුණ දෙන ප්‍රවාහන තදබදයට තිරසර විසඳුම් සෙවීමේ වැඩපිළිවෙළ යටතේ, ශ්‍රී ලංකා ගමනාගමන මණ්ඩලයේ (ලංගම) සහ මෙට්‍රෝ බස් සේවාවේ මෙහෙයුම් කටයුතු සැලකිය යුතු මට්ටමකින් පුළුල් කිරීමට ප්‍රවාහන අමාත්‍යාංශය පියවර ගෙන තිබේ.
ඒ අනුව මෙම වසර අවසන් වන විට වායුසමනය කළ නව බස් රථ 600ක් ආනයනය කිරීමටත්, ලංගම අභ්‍යන්තර අරමුදල් මගින් තවත් බස් රථ 200ක් සේවයට එක්කර ගැනීමටත් සැලසුම් කර ඇති බව ප්‍රවාහන, මහාමාර්ග සහ නාගරික සංවර්ධන අමාත්‍ය බිමල් රත්නායක ප්‍රකාශ කළේය. ඊයේ (07) නිල වශයෙන් මෙහෙයුම් ආරම්භ කළ කඩවත මෙට්‍රෝ ඩිපෝ අංගනය ජනතා අයිතියට පත්කිරීමේ අවස්ථාවට එක්වෙමින් අමාත්‍යවරයා මේ බව තහවුරු කළේය.
කඩවත දෙවැනි මෙට්‍රෝ ඩිපෝව සහ මෙහෙයුම් පුළුල් කිරීම
නාගරික බස් සේවා ජාලය පුළුල් කිරීමේ අරමුණින් ඉදිකළ දෙවැනි මෙට්‍රෝ බස් ඩිපෝ අංගනය මෙය වන අතර, මෙහි පළමු ඩිපෝව පසුගිය සැප්තැම්බර් 04 වන දින බත්තරමුල්ල, තලංගම ප්‍රදේශයේදී විවෘත කෙරිණි. පළමු අදියර යටතේ තලංගම, කඩවත, ඒකල සහ රත්මලාන යන ප්‍රධාන ප්‍රවාහන මධ්‍යස්ථාන ඉලක්ක කරගනිමින් මෙට්‍රෝ ඩිපෝ 04ක් ස්ථාපිත කිරීමට සැලසුම් කර ඇත.
දැනට මාකුඹුර සිට මහරගම හරහා කඩවත දක්වා (මාර්ග අංක 01) නවීන පහසුකම් සහිත බස් රථ 15ක් ධාවනය වන අතර, මෙම සැප්තැම්බර් මාසය තුළ සමස්ත මෙට්‍රෝ බස් සංඛ්‍යාව 122ක් දක්වා වර්ධනය කිරීමට නියමිතය. මීට අමතරව තවත් බස් රථ 50ක් අලුතින් එක්කර ගැනීමට අවශ්‍ය කැබිනට් අනුමැතිය සඳහා පියවර ගෙන ඇති බවත්, ඒ ඔස්සේ මෙම වසර අවසානයේදී හෝ ලබන වසරේ මුල් කාර්තුවේදී මෙට්‍රෝ බස් සංඛ්‍යාව 172ක් දක්වා ඉහළ යන බවත් අමාත්‍යවරයා පෙන්වා දුන්නේය.
බස්නාහිරින් ඔබ්බට සහ පෞද්ගලික අංශයේ දායකත්වය
දැනට බස්නාහිර පළාත කේන්ද්‍ර කරගනිමින් ක්‍රියාත්මක වන මෙම සේවාව ඉදිරියේදී මහනුවර, ගාල්ල සහ යාපනය යන ප්‍රධාන නගර කරා ද ව්‍යාප්ත කිරීමට නියමිත බව මෙහිදී අනාවරණය විය. එමෙන්ම, මෙට්‍රෝ ආයතනය සමඟ නිශ්චිත ගිවිසුම්ගත රාමුවක් ඔස්සේ ප්‍රමිතීන්ට අනුකූලව මෙම සේවාව සැපයීමට පෞද්ගලික අංශයට ද විවෘත අවස්ථාවක් ලබාදීම රජයේ අපේක්ෂාවයි.
මෙම ව්‍යාපෘතිය ප්‍රවාහන, මහාමාර්ග සහ නාගරික සංවර්ධන අමාත්‍යාංශය, Clean Sri Lanka ලේකම් කාර්යාලය, ශ්‍රී ලංකා ගමනාගමන මණ්ඩලය සහ ලංකා මෙට්‍රෝ ට්‍රාන්සිට් පෞද්ගලික සමාගම ඒකාබද්ධව ක්‍රියාත්මක කරන පුළුල් වැඩසටහනකි.
නවීන තාක්ෂණය සහ ඒකාබද්ධ ගමනාගමනය
නාගරික ප්‍රවාහනයේ ගුණාත්මක වෙනසක් ඇතිකිරීම සඳහා බස් නැවතුම් නවීකරණය, ඩිජිටල් ඒකාබද්ධ ගෙවීම් පද්ධති (Integrated Payment Systems), රථගාල් (Park & Ride) සහ දුම්රිය ඇතුළු අනෙකුත් ප්‍රවාහන සේවා සමග කාලසටහන් ඒකාබද්ධ කිරීම කෙරෙහි ද මෙහිදී අවධානය යොමු කර ඇත.
විශේෂයෙන් ලෝකයේ බොහෝ රටවල සාර්ථකව ක්‍රියාත්මක වන ‘නාගරික පොදු ප්‍රවාහන ප්‍රතිසංස්කරණ’ (Public Transport Reforms) හා සමගාමීව, ශ්‍රී ලංකාව තුළ ද පෞද්ගලික වාහන භාවිතය අවම කර විශ්වාසනීය පොදු ප්‍රවාහන සේවාවක් බිහිකිරීම මෙම ව්‍යාපෘතිවල ප්‍රධාන අරමුණ වී තිබේ.
