ජපානයේ නගෝයා නගරයේ පැවැත්වෙන ආසියානු පැරා ක්‍රීඩා උළෙලේ එකම දිනයේදී තෙවතාවක් ම වැරදි ජාතික ගීත වාදනය වුණා. මේ හේතුවෙන්, ප්‍රමාද දෝෂයන්ගෙන් පිරුණු ආසියානු ක්‍රීඩා උළෙලකට සත්කාරකත්වය දක්වා දින කිහිපයක් පමණක් ගතවීමෙන් පසුව සමාව අයැදීමට නගරයේ පුරපතිට සිදුවුණා.
නිවැරදි ජාතික ගීත වාදනය කිරීම ඇතුළුව පෙර වැරදි වැළැක්වීම සඳහා පියවර ගන්නා බවට නිලධාරීන් ප්‍රතිඥා දී තිබියදීත් සිදුවූ ආසන්නතම දෝෂය පිළිබඳව නගෝයා නගරාධිපති ඉචිරෝ හිරොසාවා ඊයේ (21) සමාව ඉල්ලා සිටියා.
තායිවානයටත් මොන්ගෝලියාවටත් වැයුණු ඉරාන ගීය
පිරිමි පැරා ටේක්වොන්ඩෝ තරගාවලියක් තායිවාන ක්‍රීඩකයෙක් සඳුදා ජයග්‍රහණය කළත් වාදනය වුණේ ඉරානයේ ජාතික ගීය යි. නිලධාරීන්ට ඔවුන්ගේ වැරැද්ද අවබෝධ වුණේ පදක්කම් පිරිනැමීමේ උත්සවයෙන් පසුවයි.
එදින ම, කාන්තා පැරා ටේක්වොන්ඩෝ පදක්කම් ප්‍රදානය කිරීමකදී මොන්ගෝලියානු ක්‍රීඩකයෙක් රන් පදක්කම ලබා ගත් මොහොතේ නැවත වරක් වාදනය වුණේ ඉරාන ජාතික ගීය යි. වැරදි සංගීතය වාදනය කිරීම නතර වුණේ මොන්ගෝලියානු නියෝජිත කණ්ඩායම ඒ දෝෂය පෙන්වා දීමෙන් පසුවයි. නියෝජිතයන් විසින් මොන්ගෝලියානු ජාතික ගීය ලබා දීමෙන් පසුව සංවිධායකයින් එය වාදනය කළා.
චීනය වෙනුවට දකුණු කොරියානු ගීතය
සඳුදා තවත් අවස්ථාවකදී, චීනය හා ඉරානය අතර ‘වාඩිගත් වොලිබෝල්’ තරගයක් ආරම්භ වීමට පෙර සංවිධායකයින් චීන ජාතික ගීය වෙනුවට දකුණු කොරියානු ජාතික ගීය තත්පර පහක් පමණ විකාශය කළා.
මේ මස මුලදී අවසන් වූ ආසියානු ක්‍රීඩා උළෙල ප්‍රමාණවත් නොවූ ක්‍රීඩක නවාතැන් පහසුකම්වල සිට වැරදි ජාතික ගී වාදනය දක්වා වූ බොහෝ දෝෂයන් සම්බන්ධයෙන් දැඩි විවේචනයට ලක්වුණා. සැප්තැම්බර් 18 වැනිදා, සංවිධායකයින් දකුණු කොරියානු හොකී කණ්ඩායම වෙනුවෙන් උතුරු කොරියාවේ ජාතික ගීය වාදනය කළා.
(සටහන | වර්නන් ගුණසේකර)
සබැඳි පුවත :
දකුණු කොරියාව වෙනුවට සතුරු උතුරු කොරියාවේ ජාතික ගීය වාදනය කර ආසියානු ක්‍රීඩා උළෙල කැළඹූ හැටි