නාන තුවා අස්සේ සඟවා කොළඹ වරායට එවූ මත්ද්‍රව්‍ය තොගය මාට්ටු
පාකිස්තානය කේන්ද්‍ර කරගනිමින් ක්‍රියාත්මක වන ජාත්‍යන්තර මත්ද්‍රව්‍ය ජාවාරම් ජාලයක් ශ්‍රී ලංකාව හරහා විදෙස් වෙළෙඳපොළ වෙත යැවීමට සූදානම් කර තිබූ රුපියල් කෝටි 650කට (ඇමෙරිකානු ඩොලර් මිලියන 21ක්) අධික වටිනාකමකින් යුත් ‘ක්‍රිස්ටල් මෙතැම්පටමින්’ හෙවත් 'අයිස්' (Crystal Methamphetamine) මත්ද්‍රව්‍ය කිලෝග්‍රෑම් 463ක් අත්අඩංගුවට ගැනීමට ශ්‍රී ලංකා පොලිස් මත්ද්‍රව්‍ය නාශක කාර්යාංශය (PNB) සමත්ව තිබේ.
මෙම වැටලීම සිදුකර ඇත්තේ ඇමෙරිකානු මත්ද්‍රව්‍ය මර්දන පරිපාලනයේ (DEA) නවදිල්ලි කාර්යාලය සහ ශ්‍රී ලංකා ආරක්ෂක අංශ ඒකාබද්ධව දියත් කළ විශේෂ බුද්ධි මෙහෙයුමක ප්‍රතිඵලයක් වශයෙනි.
නාන තුවා තොගයක් තුළ සැඟවූ රහස
පාකිස්තානයේ සිට කොළඹ වරාය බලා යාත්‍රා කළ සැකකටයුතු බහාලුම් (Containers) කිහිපයක් පිළිබඳව ඇමෙරිකානු DEA හි විදෙස් ඒකකය සහ පාකිස්තාන මත්ද්‍රව්‍ය නාශක බලකායේ විශේෂ විමර්ශන අංශය (ANF-SIC) පසුගිය අගෝස්තු 14 වැනිදා සිට 29 වැනිදා දක්වා පුළුල් බුද්ධි තොරතුරු රැස්කිරීමක නිරතව ඇත.
එම බුද්ධි තොරතුරු ක්ෂණිකව ශ්‍රී ලංකා පොලිස් මත්ද්‍රව්‍ය නාශක කාර්යාංශය වෙත ලබාදීමෙන් අනතුරුව වහාම ක්‍රියාත්මක වූ නිලධාරීන් අදාළ බහාලුම් පරීක්ෂාවට ලක්කර තිබේ. එහිදී නාන තුවා (Bath towels) තොගයක් අතර ඉතා සූක්ෂ්ම ලෙස අසුරා තිබූ අයිස් මත්ද්‍රව්‍ය කිලෝග්‍රෑම් 463ක තොගය සොයාගැනීමට හැකිව ඇත. මෙම සිද්ධියට සෘජුවම සම්බන්ධ පාකිස්තාන ජාතිකයින් ඇතුළු සැකකරුවන් පිරිසක් මේ වන විටත් මෙරටදී අත්අඩංගුවට ගෙන ප්‍රශ්න කරමින් සිටී.
ත්‍රස්තවාදයට මුදල් සැපයෙන ජාත්‍යන්තර ජාල
කොළඹ පිහිටි ඇමෙරිකානු තානාපති කාර්යාලයේ මහජන රාජ්‍යතාන්ත්‍රික අංශය නිවේදනයක් නිකුත් කරමින් සඳහන් කරන්නේ, මෙවැනි සංවිධානාත්මක ජාත්‍යන්තර අපරාධ ජාල මගින් උපයන මුදල් ත්‍රස්තවාදී ක්‍රියාකාරකම් සඳහා යොදවන බවයි. එමෙන්ම කලාපීය ආරක්ෂාව මෙන්ම දෙරටේම ජනජීවිත දැඩි අවදානමකට ලක්කිරීමට මෙම ජාවාරම්කරුවන් කටයුතු කරමින් සිටින බවද එහි දැක්වේ.
ශ්‍රී ලංකාව මත්ද්‍රව්‍ය සංක්‍රමණික මධ්‍යස්ථානයක් (Transit Hub) ලෙස භාවිත කිරීමට ජාත්‍යන්තර ජාවාරම්කරුවන් දරන උත්සාහයන් පරාජය කිරීම සඳහා කලාපීය සහ ජාත්‍යන්තර බුද්ධි තොරතුරු හුවමාරුව අතිශය තීරණාත්මක සාධකයක් බව මෙරට ආරක්ෂක විශ්ලේෂකයෝ පෙන්වා දෙති.
කලාපීය ආරක්ෂාව සහ තාක්ෂණික සහයෝගය
මෙම සාර්ථක වැටලීම පසුපස ඇමෙරිකා එක්සත් ජනපද රාජ්‍ය දෙපාර්තමේන්තුවේ ජාත්‍යන්තර මත්ද්‍රව්‍ය සහ නීතිය ක්‍රියාත්මක කිරීමේ කටයුතු පිළිබඳ කාර්යාංශය (INL) ශ්‍රී ලංකා පොලිසියට සහ රේගු දෙපාර්තමේන්තුවට දිගුකාලීනව ලබාදුන් විශේෂ පුහුණුව හා තාක්ෂණික සහයෝගය පවතින බව නිල නිවේදනයේ සඳහන් වේ.
දේශසීමා ඉක්මවා යන මෙවැනි සංවිධානාත්මක අපරාධ මැඩපැවැත්වීම, මත්ද්‍රව්‍ය ජාවාරම්කරුවන්ගේ මූල්‍ය ශක්තිය බිඳවැට්ටවීම සහ කලාපයේ පුරවැසියන් මත් උවදුරෙන් මුදාගැනීම වෙනුවෙන් ඉදිරියටත් ශ්‍රී ලංකාව ඇතුළු කලාපීය පාර්ශ්වකරුවන් සමඟ සමීපව කටයුතු කරන බව ඇමෙරිකා එක්සත් ජනපදය වැඩිදුරටත් අවධාරණය කරයි.
සබැඳි පුවත :
වරායේ බහාලුමෙන් හසුවූ රුපියල් බිලියන ගණනක අයිස් තොගය පිටුපස ජාත්‍යන්තර ජාලයක්?
