එම ආයතනයේ ජ්‍යෙෂ්ඨ විද්‍යාඥ වසන්ත සේනාධීර සඳහන් කළේ, පසුගිය අධික වර්ෂාවන් හේතුවෙන් පස් කඳු සේදීයාමෙන් මතුවූ විශාල සහ මධ්‍ය පරිමාණයේ ගල් නැවත පෙරළී පහළට ගලායාමේ අවදානම තවමත් පවතින බවයි.
කුඩා වර්ෂාවක් ඇති වුවද එවැනි ගල් චලනය විය හැකි බව ඔහු පෙන්වා දෙයි.
රත්නපුර සහ බදුල්ල ප්‍රදේශවල පසුගිය දිනවල එවැනි සිදුවීම් වාර්තා වූ බවත්, නායයෑම් ලක්ෂණ පෙන්වන ස්ථාන මෙන්ම පෙර සක්‍රීයව තිබී මේ වනවිට අක්‍රීය වී ඇති ස්ථාන ද නැවත අවදානම් තත්ත්වයට පත්විය හැකි බවත් ඔහු සඳහන් කළේය.
රජයේ ප්‍රවෘත්ති දෙපාර්තමේන්තුවේ පැවැති මාධ්‍ය හමුවකදී අදහස් දැක්වූ සේනාධීර පැවසුවේ, අදාළ ප්‍රදේශ නිරීක්ෂණය කිරීම සඳහා NBRO නිලධාරීන් ප්‍රාදේශීය ලේකම්වරුන් සහ ග්‍රාම නිලධාරීන් සමග එක්ව කටයුතු කරමින් සිටින බවයි.
අවදානම් ස්ථානවල ජනතාව අනුගමනය කළ යුතු ආරක්ෂිත ක්‍රියාමාර්ග පිළිබඳව දැනුවත් කිරීමද මේ වනවිට සිදුකර තිබේ.
“අපට අමිහිරි අත්දැකීම් තිබෙන නිසා කිසිදු ආකාරයක අවදානමක් නොගන්නැයි ජනතාවගෙන් ඉල්ලා සිටිනවා,” යනුවෙන්ද ඔහු පැවසීය.
මේ අතර, බදුල්ල දිස්ත්‍රික්කයේ පස්සර ප්‍රාදේශීය ලේකම් කොට්ඨාසයටත්, මොණරාගල දිස්ත්‍රික්කයේ බඩල්කුඹුර සහ වැල්ලවාය ප්‍රදේශවලටත් අදියර 1 යටතේ නායයෑම් අනතුරු ඇඟවීම් නිකුත් කර තිබේ.
එන්.බී.ආර්.ඕ ආයතනයේ අනතුරු ඇඟවීම් අදියර තුනක් යටතේ නිකුත් කෙරෙන අතර,
* අදියර 1 යනු “විමසිලිමත්ව සිටින්න” යන මට්ටමයි.
* අදියර 2 යනු “අවධානයෙන් සිටින්න, අවශ්‍ය වුවහොත් ඉවත් වීමට සූදානම් වෙන්න” යන තත්ත්වයයි.
* අදියර 3 යටතේ “රතු නිවේදන” නිකුත් කරමින් වහා ඉවත් වීමට උපදෙස් ලබාදෙයි.
පසුගිය පැය 24 තුළ මිලිමීටර් 75කට වැඩි වර්ෂාපතනයක් සහ පාංශු ජල දර්ශකය 100 ඉක්මවූ අවස්ථාවල අදියර 1 නිවේදන නිකුත් කෙරේ.
වර්ෂාපතනය මිලිමීටර් 100 දක්වා ඉහළ ගොස් පාංශු ජල දර්ශකය 125 ඉක්මවුවහොත් අදියර 2 අනතුරු ඇඟවීම් නිකුත් කෙරේ.
මිලිමීටර් 150කට වැඩි වර්ෂාපතනයක් සහ පාංශු ජල දර්ශකය 175 ඉක්මවූ අවස්ථාවල රතු නිවේදන නිකුත් කරන බවද ඔහු පැවසීය.
(සටහන | ගිම්හාන් ද සිල්වා)
