* දේශගුණික අර්බුද සහ අනාගත ලෝකයේ පැවැත්මට විසඳුම් සොයමින් දෙස්-විදෙස් විද්‍යාඥයින් එකම වේදිකාවකට
ශ්‍රී ලංකාවේ විද්‍යාත්මක පර්යේෂණ හා පශ්චාත් උපාධි අධ්‍යාපන ක්ෂේත්‍රයේ ප්‍රමුඛතම ආයතනයක් වන පේරාදෙණිය විශ්වවිද්‍යාලයේ පශ්චාත් උපාධි විද්‍යා ආයතනය (PGIS) විසින් සංවිධානය කරනු ලබන වාර්ෂික පර්යේෂණ සම්මේලනය (RESCON 2026), 2026 සැප්තැම්බර් 24 සහ 25 යන දෙදින තුළ එම ආයතන පරිශ්‍රයේදී පැවැත්වීමට කටයුතු යොදා තිබේ.
මෙවර සමුළුව සංවිධානය වන්නේ PGIS ආයතනය සිය 30 වන සංවත්සරය සමරන සුවිශේෂී වකවානුවක වීම විශේෂත්වයකි. ඒ අනුව, ශ්‍රී ලංකාව තුළ විද්‍යාත්මක දැනුම ප්‍රවර්ධනය කිරීම සහ ජාත්‍යන්තර මට්ටමේ පර්යේෂණ සඳහා මංපෙත් විවර කිරීමේ දීර්ඝ කාලීන කැපවීම මෙමගින් යළිත් තහවුරු කෙරේ.
තිරසාර ලොවක් උදෙසා විද්‍යාවේ කාර්යභාරය
"සොබාදහම, විද්‍යාව සහ තිරසාරභාවය: ප්‍රත්‍යාස්ථ ලොවක් සඳහා පර්යේෂණ" (Nature, Science, and Sustainability: Research for a Resilient Planet) යන්න මෙවර සම්මේලනයේ ප්‍රධාන තේමාවයි. වත්මන් ලෝකය මුහුණ දෙන පාරිසරික අර්බුද, දේශගුණික විපර්යාස සහ ආහාර සුරක්ෂිතතාව වැනි තීරණාත්මක ගැටලුවලට විද්‍යාත්මක හා ප්‍රායෝගික විසඳුම් සෙවීම මෙහි මූලික අරමුණ වී තිබේ.
මෙම සම්මේලනයේදී ප්‍රධාන විෂය ක්ෂේත්‍ර 5ක් ඔස්සේ පර්යේෂණ පත්‍රිකා 200කට අධික සංඛ්‍යාවක් වාචිකව ඉදිරිපත් කිරීමට නියමිත අතර, ඒ සඳහා දේශීය හා විදේශීය පර්යේෂකයින්, විද්‍යාඥයින් සහ සිසුන් 500කට වැඩි පිරිසක් සහභාගී වීමට නියමිතය.
අදාළ ක්ෂේත්‍රයන් පහත පරිදි වේ:
| පෘථිවි හා පාරිසරික විද්‍යාව
| පරිගණක විද්‍යාව, කෘතිම බුද්ධිය (AI), ගණිතය සහ සංඛ්‍යාලේඛන
| ජීව විද්‍යා ක්ෂේත්‍රය
| භෞතික විද්‍යාව
| විද්‍යා අධ්‍යාපනය
නාසා හා අඟහරු ගවේෂණයේ ප්‍රවීණයන්ගෙන් ප්‍රධාන දේශන
සැප්තැම්බර් 24 වන දින පෙරවරුවේ පැවැත්වෙන සමාරම්භක උළෙලේ ප්‍රධාන ආරාධිතයා ලෙස මධ්‍යම පළාත් ආණ්ඩුකාර වෛද්‍ය හර්ෂ සුරංග ප්‍රනාන්දු සහභාගී වේ.
මෙවර සමුළුවේ ප්‍රධාන දේශන (Keynote Addresses) සඳහා ජාත්‍යන්තර වශයෙන් කීර්තියට පත් විද්‍යාඥයින් දෙපළක් එක්වීම කැපී පෙනේ. ඇමරිකාවේ ලුසියානා ප්‍රාන්ත විශ්වවිද්‍යාලයේ මහාචාර්ය සුනීති කරුණාතිලක (නාසා අභ්‍යවකාශ ආයතනය සමඟ එක්ව අඟහරු ග්‍රහයා පිළිබඳ පර්යේෂණවල නිරත විද්‍යාඥයෙකි) සහ චීනයේ පළමු අඟහරු ගවේෂණ මෙහෙයුමේ (Tianwen-1) විද්‍යා කණ්ඩායමේ ප්‍රමුඛ සාමාජිකාවක වූ චෙන්ග්ඩු තාක්ෂණ විශ්වවිද්‍යාලයේ මහාචාර්ය ෂාඕ යුයාන් (Prof. Zhao Yuyan) මෙහිදී විශේෂ දේශන පවත්වති.
මීට අමතරව, චීන විද්‍යා ඇකඩමියේ මහාචාර්ය රොස් මිචෙල් (Prof. Ross Mitchell) සහ ඉන්දියාවේ කේරළ වන පර්යේෂණ ආයතනයේ හිටපු අධ්‍යක්ෂ ආචාර්ය එස්. විශ්වනාත් (Dr. S. Viswanath) යන විද්වතුන් විසින් පූර්ණ සැසි දේශන (Plenary Lectures) පවත්වනු ඇත.
පර්යේෂණ දැනුම ප්‍රායෝගික ක්ෂේත්‍රයට
පේරාදෙණිය විශ්වවිද්‍යාලයේ ජාත්‍යන්තර සතියට සමගාමීව පැවැත්වෙන මෙම සම්මන්ත්‍රණයට පෙර, ක්ෂේත්‍ර රැසක් ආවරණය වන පරිදි ජාත්‍යන්තර වැඩමුළු සහ දේශන මාලාවක් ද සාර්ථකව පවත්වා තිබේ. පරිසර ඩී.එන්.ඒ. (eDNA) තාක්ෂණය ඔස්සේ ජලජ ජෛව විවිධත්වය හැදෑරීම, නවීන ජල තාක්ෂණය, වනජීවී සංරක්ෂණය සහ පුද්ගලාරෝපිත පෝෂණ විද්‍යාව (Precision Nutrition) මගින් දියවැඩියාව පාලනය කිරීම වැනි වර්තමානයට අතිශය කාලීන මාතෘකා ඒ අතර විය.
පශ්චාත් උපාධි විද්‍යා ආයතනයේ අධ්‍යක්ෂ මහාචාර්ය නන්ද බාලසූරිය ගේ මගපෙන්වීම යටතේ, සම්මේලනයේ සභාපති මහාචාර්ය සංජීව මලවීආරච්චි, ලේකම් ආචාර්ය සචින්තානි කරුණාරත්න සහ ප්‍රධාන සංස්කාරක මහාචාර්ය රෝහණ චන්ද්‍රජිත් යන විද්වත් මණ්ඩලය විසින් මෙවර RESCON 2026 සම්මේලනය මෙහෙයවනු ලබයි.
වැඩිදුර විස්තර සහ සම්මන්ත්‍රණ කාලසටහන සඳහා නිල වෙබ් අඩවියට පිවිසෙන්න:
Postgraduate Institute of Science
Highlights from the RESCON 2026 pre-conference series
Highlights from the RESCON 2026 pre-conference series
Highlights from the RESCON 2026 pre-conference series
Highlights from the RESCON 2026 pre-conference series
Highlights from the RESCON 2026 pre-conference series
Highlights from the RESCON 2026 pre-conference series
Highlights from the RESCON 2026 pre-conference series
Highlights from the RESCON 2026 pre-conference series
Highlights from the RESCON 2026 pre-conference series
